Հակոբ Արշակյանը կարեւորել է կանանց ներգրավվածությունը հասարակական հնչեղության գործընթացներում

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

ՀՀ ԱԺ նախագահի տեղակալ Հակոբ Արշակյանը հոկտեմբերի 30-ին «Կատարինե համայնք կամրջողներ» ծրագրի կազմակերպած կոնֆերանսի շրջանակում մասնակցել է «Կանանց դերը փոխհամաձայնության ձեւավորման, անվտանգության եւ խաղաղության գործում» պանելային քննարկմանը:

Հակոբ Արշակյանը կարեւորել է կանանց ներգրավվածությունը հասարակական հնչեղության գործընթացներում, որոշումների կայացման մակարդակում ու խոսել ոլորտում առկա ե՛ւ խնդիրների, ե՛ւ առաջընթացի մասին:

«Մեր քաղաքական ուժը եւ պետությունը հենց դրա աջակիցն են: Սա կարեւոր եւ անկյունաքարային հարց է, քանի որ հանրության շահերը ներկայացնելիս պետք է հաշվի առնենք՝ կանայք են, որ լավագույնս տիրապետում են իրենց իրավունքներին եւ իրենց վերաբերող խոցելի հարցերին ու որոշում ընդունող մարմիններում պետք է ներգրավված լինեն, որոշումներ ընդունեն»,- արձանագրել է ԱԺ փոխնախագահը: Այս համատեքստում նա վկայակոչել է նաեւ պետական համակարգում կանանց դերի բարձրացմանն ուղղված դրական քայլերն ու հավելել. «Չնայած մեր օրենսդրությամբ քվոտավորումը 30 տոկոսին է վերաբերում, բայց Հայաստանի խորհրդարանում կանանց ներգրավվածությունը 35 տոկոսից ավելի է»:

Պանելային քննարկմանն անդրադարձ է եղել նաեւ բանակցային գործընթացներում կանանց ներգրավվածությանը: «Խնդիրը ոչ միայն բուն բանակցային գործընթացին կանանց ներկայությունն է, որը շատ արժեւորում եմ, այլ այդ խաղաղության գործընթացում նրանց կարծիքի արտահայտման հնարավորությունն ու դրա ազդեցության կարեւորությունը»,- կարծիք է հայտնել Հակոբ Արշակյանը:

ԱԺ նախագահի տեղակալը խնդիրների շարքում ընդգծել է կանանց կրթության, առաջնորդություն ու պատասխանատվություն ստանձնելու հնարավորությունների սահմանափակության հարցերը, հաճախ նաեւ նրանց նկատմամբ հասարակության՝ վարքագծային փոփոխությունների մղող վերաբերմունքը:

Չժխտելով ոլորտում խնդիրների առկայությունը՝ Հակոբ Արշակյանն արձանագրել է նաեւ էական առաջընթացը: Նրա խոսքով կանանց դերի բարձրացմանն ու նրանց նկատմամբ խտրական վերաբերմունքի վերացմանը նպաստելու են խոսքի ու տեղեկատվական դաշտի ազատությունը, ազատ մամուլը, սոցիալական ցանցերը, տեխնոլոգիական առաջընթացը:

Պանելային քննարկմանը մասնակցել են նաեւ «Քաղաքացիական պայմանագիր» խմբակցության պատգամավոր Սոնա Ղազարյանը եւ «Հայաստան» խմբակցության պատգամավոր Աննա Գրիգորյանը: Նրանք եւս տեսակետներ են հայտնել խաղաղության եւ անվտանգության գործընթացում կանանց մասնակցության խոչընդոտների եւ դրանց հաղթահարման ուղիների վերաբերյալ:

Սոնա Ղազարյանը, մասնավորապես, խոսել է կանանց տնտեսական եւ քաղաքական առաջխաղացման համար բարենպաստ միջավայրի ձեւավորման, քաղաքական գործընթացներում երիտասարդ կանանց մասնակցության ապահովման խթանման կարեւորության մասին: Նա եւս արժեւորել է խաղաղությանն ուղղված բանակցություններում կանանց դիրքորոշումը, ինչպես նաեւ բարձր է գնահատել նրանց ակտիվ գործունեությունը խորհրդարանական դիվանագիտության հարթակում:

Աննա Գրիգորյանի գնահատմամբ եւս եթե կանայք ավելի շատ ներգրավված լինեին այդ բանակցություններում, առաջընթացն այդ հարցում ավելին կլիներ: Պատգամավորն անդրադարձել է բարեփոխումների, քաղաքական որոշումների կայացման ու անվտանգության հարցում կանանց ունեցած ազդեցությանը:

Առավել մանրամասն` այստեղ. 

https://t.me/armenia24live