«25-րդ ժամը». պրեմիերայից րոպեներ առաջ դերասանների սրտխփոցն ու ետնաբեմի խառնաշփոթը՝ Tert.amLife-ի օբյեկտիվում. Արսեն Սաֆարյանը ներկա էր դստեր առաջնախաղին

ЛАЙФ 15 Октябрь, 2024 17:16

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Ստանիսլավսկու անվան դրամատիկական թատրոնում կայացավ Շունչ թատրոնի «25-րդ ժամը» ներկայացման պրեմիերան:

«25-րդ ժամը» ընտանեկան դրամա է, որտեղ գլխավոր հերոսներին մարմնավորում են Սիրանուշ Լազյանը, Էլեն Սաֆարյանը, Անի Պետրոսյանը, Սևակ Սանթրոսյանն ու Սեյրան Մովսիսյանը: Պիեսի հեղինակը Կարինե Խոդիկյանն է, բեմադրիչը՝ Արթուր Սարիբեկյանը, կոմպոզիտոր՝ Տիգրան Աթայան, բեմանկարիչ՝ Արթուր Սարյան: Պրեմիերայից դեռ օրեր առաջ ներկայացման բոլոր տոմսերը սպառված էին:

Tert.am Life-ը ներկա է եղել առաջնախաղին, պրեմիերայից րոպեներ առաջ զրուցել հուզված դերասանների և ստեղծագործական թիմի հետ:

«Ինձ զանգահարեցին Սամվելն ու Սեյրանը, պատմեցին կերպարի մասին ու ասացին, որ ինձ պատկերացնում են Ջենիսի կերպարում: Թեման ինձ շատ դուր եկավ, պիեսը շատ ակտուալ է: Հասկացա, որ սա ինձ համար մարտահրավեր է և պետք է անպայման փորձեմ: Շատ ոգևորվեցի: Իհարկե, վախեր ունեցել եմ, հենց հիմա էլ լարված եմ մի քիչ, բայց ոգևորությունս ավելի մեծ է:

Ես կինոն միշտ ավելի շատ եմ սիրել, բայց թատրոնը լրիվ այլ աշխարհ է: Այստեղ ահռելի աշխատանք պետք է տարվի: Թիմը շատ հոգատար է եղել իմ հանդեպ և դժվարությունները հեշտությամբ եմ հաղթահարել: Կարծում էի, ավելի կլարվեմ պրեմիերայից առաջ, բայց հիմա անհամբեր եմ, ուզում եմ հանդիսատեսը տեսնի այս 3 ամիսների աշխատանքը»,- Tert.am Life-ի հետ զրույցում պրեմիերայից առաջ անկեղծացավ Էլեն Սաֆարյանն, ով առաջին անգամ է թատրոնի բեմ բարձրանում:

Դերասանուհի Սիրանուշ Լազյանը մեզ հետ զրույցում խոստովանեց, որ կերպարը շատ դժվար է տրվել: «Լրագրողի եմ մարմնավորում և հասկացա, թե ինչ բարդ է լրագրողական պարտականություններ կատարելը: Ներկայացումն այն ընտանիքների մասին է, որոնք ամեն ինչ անում են լավ ապրելու համար, բարելավվում իրենց երեխաների կյանքը բարդ աշխատանքի շնորհիվ, բայց մոռանում են ամենակարևորը, որ երեկոյան պետք է համբուրեն իրենց զավակներին և փոխանցեն ծնողի ջերմությունը: Ներկայացման գլխավոր ասելիքն է՝ վերադարձնել սեղանի շուրջ միասին ընթրելու ավանդական սովորույթները, որովհետև հենց այդ ժամանակ ենք հասկանում, ով է տխուր, ով ինչ խնդիր ունի և փորձում օգնել: Մեզ երբեմն թվում է, թե մեր ընտանիքներում ամեն բան իդեալական է, երբեմն կարիք է լինում կողքի աչքից նայողի, ով այս դեպքում իմ կերպարն է՝ լրագրող Նարեն»,- պատմեց Սիրանուշ Լազյանն ու հավելեց, որ պրեմեիրայից առաջ շատ վատ ապրումներ ունի: «20 տարիների ընթացքում չկարողացա հաղթահարել սրտխփոցն ու հույզերը»:

Սրտխփոց ուներ նաև դերասան Սևակ Սանթրոսյանն, ով 27 տարի անց կրկին բեմ է վերադառնում:

«Անակնկալ որոշում էր: Սամվելի ասելուց 1 վայրկյան մտածելուց հետո ասել եմ՝ «իսկ ինչո՞ւ ոչ»: Կարծես, ինչ որ բան ասեր՝ փորձիր: Խումբը շատ լավն էր, միանգամից ինտեգրվեցի»,- նշեց Սևակ Սանթրոսյանն, ում կարծիքով՝ ինքը ֆիլմերում ավելի հետաքրքիր է, քան թատրոնում: «Բայց ամեն ինչ կանեմ, որ հակառակը լինի: Ուզում եմ, որ մուտքս թատրոն շարունակական լինի »,- խոստովանեց Սևակը:

Դերասանուհի Անի Պետրոսյանն էլ նշեց, որ ներկայացումն իր համար նոր ու յուրահատուկ է: «Անտերպրիզային ներկայացումները հիմնականում կոմեդիայի վրա են հիմնված լինում, բայց սա դրամա է ու հոգուս ավելի մոտ է: Ես շատ կուզեմ ապացուցել, որ դրամայով էլ է հնարավոր գումար աշխատել և դա ավելի խորը կատարսիս կբերի հանդիսատեսին, քան ցանկացած կոմեդիա»,- նշեց դերասանուհին:

«Կարինե Խոդիկյանի հետ պիեսը գրելու ընթացքում անընդհատ աշխատել ենք և հենց նյութի ասելիքն ու բովանդակությունն էր պատճառը, որ բոլորս համախմբվեցինք: Դերասանները փոքր երեխաների նման լուռ լսել ու ենթարկվել են: Ներքին վախեր են եղել, որոնք փորձերի ընթացքում հաղթահարվել են»,- ասաց ռեժիսոր Արթուր Սարիբեկյանը:

Ըստ նրա այս ներկայացման գլխավոր ասելիքն է, որ գնահատենք այն ժամանակը, որը ունենք, և փորձենք այն ճիշտ բաշխել մեր ընտանիքում, ընկերների շրջապատում և հնարավորություն տանք ինքներս մեզ ապրելու: «Տեղավորվենք 24 ժամվա մեջ, այլապես 25-րդ ժամը գոյություն չունի»,-նշեց ռեժիսորը:

Շունչ թատրոնը բացելու գաղափարը Սամվել Դանիելյանինն ու Սեյրան Մովսիսյանինն էր: Այս ընթացքում հասցրել են տարբեր ժանրերի 4 ներկայացում բեմադրել: Սամվել Դանիելյանը խոստովանեց, որ մտավախություն կար թատրոնը բացելուց առաջ. «Թատրոնը բացվեց հենց այն ժամանակ, երբ վտանգի տակ էին ու փակվում էին տարբեր թատրոններ: Մտավախություն կար, բայց համարձակությունն ավելի մեծ էր: Կար հստակ որոշում՝ ոչ մի կերպ չհանձնվել, եթե անգամ ձախողում ունենանք առաջին ներկայացմամբ, միևնույն է՝ գնանք առաջ»,- մեզ հետ զրույցում ասաց թատրոնի տնօրենը:

«25-րդ ժամը»՝ ըստ Սամվելի շատ նուրբ ու խոցելի թեմա է շոշափում, ընտրված է հենց այս ժամանակի համար: «Դերասանական խաղը, բեմադրությունը, ամեն ինչ արված է այնպես, որ բավարարենք հանդիսատեսի պահանջը»:

Պրեմիերայից հետո երգիչ Արսեն Սաֆարյանը չթաքցրեց, որ հուզված է ու դժվարությամբ կարողացավ գնահատական տալ դստեր առաջնախաղին:

«Որպես հայր շատ էի հուզվել, կարծես ես եմ խաղալու, ընթացքում իր հետ մտածում էի, հետո նստած տեղից իր հետ խաղում, ապա հանգստացա, որ իր մեջ ճանապարհ տեսա դեպի նոր որակ: Դեռ շատ անելիքներ ունի, վստահ եմ, այս ճանապարհին դեռ շատ հղկումներ կունանա, բայց պրեմիերայի համար՝ ես գոհ եմ: Ես բեմում Էլենին այսպես չէի տեսել»,- անկեղծացավ երգիչը: Ըստ նրա՝ ներկայացումը շատ հետաքրքիր թեմաներ է շոշափում:

«Ընտանիքում ծնողների և երեխաների հավերժ կոնֆլիկտը, որը թվում է չլուծվող, բայց լուծելի է: Ներկայացումը մեզ ցույց տվեց, որ ուղղակի պետք է սիրել իրար ու փորձել կոմպրոմիսներ գտնել տարբեր հարցերի շուրջ»,- ամփոփեց Արսեն Սաֆարյանը: