Որքա՞ն եկամուտ է ստացել ամրակցված ինտերնետի շուկայի բաժանորդների շուրջ 32 տոկոսը սպասարկող օպերատորը. «Փաստ»

«Փաստ» օրաթերթը գրում է.

Ինչպես արդեն տեղեկացրել ենք, հայաստանյան կապի երեք օպերատորներն էլ գտնվում են առաջին 1000 խոշոր հարկատուների լավագույն հիսնյակում: Նրանցից «Տելեկոմ Արմենիան» (Team) նախօրեին հրապարակել է 2024 թ. 2-րդ եռամսյակում ընկերության տեխնիկատնտեսական և ֆինանսական ցուցանիշները։ Ի մասնավորի, պարզվում է, որ ընկերությունը շարժական կապից ստացել է 4,89 մլրդ դրամ եկամուտ, որը 5,5%-ով կամ 256,6 մլն դրամով ավելի է սույն տարվա 1-ին եռամսյակից և գերազանցում է 2023 թ. 2-րդ եռամսյակի ցուցանիշը 5 %-ով կամ 234,3 մլն դրամով։

Շարժական կապի բաժանորդների թիվը 2024 թ. 2-րդ եռամսյակում կազմել է 1 մլն 51 հազար 679։ 2024 թ. 1-ին եռամսյակի համեմատ արձանագրվել է աճ 1,5%-ով կամ 15 հազար 391 բաժանորդով, իսկ 2023 թ. 2-րդ եռամսյակի համեմատ բաժանորդների թիվն աճել է մոտ 9 %-ով կամ 85 հազար 553 բաժանորդով։

Աճել է նաև շարժական ինտերնետ օգտագործողների թիվը։ 2024 թ. 2-րդ եռամսյակում այն կազմել է 761 հազար 137, ինչը գերազանցում է նախորդ եռամսյակի և 2023 թ. 2-րդ եռամսյակի ցուցանիշը՝ համապատասխանաբար 3,3%-ով և 13,4%-ով։ Շարժական ինտերնետի ծառայություններից 2024 թ. 2-րդ եռամսյակում ստացվել է 2,54 մլրդ դրամ եկամուտ՝ գերազանցելով նախորդ եռամսյակի ցուցանիշը 13 %-ով կամ 292,4 մլն դրամով, իսկ 2023 թ. 2-րդ եռամսյակի համեմատ աճը կազմել է 11,5% կամ 262,8 մլն դրամ։

2024 թ. 2-րդ եռամսյակի դրությամբ ընկերությանը բաժին է ընկնում ՀՀ շարժական կապի շուկայի բաժանորդների մոտ 26 %-ը։

2024 թ. 2-րդ եռամսյակում «Տելեկոմ Արմենիան» ամրակցված կապից ստացել է 3,93 մլրդ դրամ եկամուտ, ինչը գերազանցում է նախորդ տարվա նույն ժամանակահատվածի ցուցանիշը 5,2 %-ով կամ 194,4 մլն դրամով։ Ամրակցված ինտերնետի բաժանորդների թիվը 2024 թ. 2-րդ եռամսյակի դրությամբ 96,9 հազար է, 2023 թ. 2-րդ եռամսյակի համեմատ արձանագրվել է աճ 4,3 %-ով կամ 3,964 բաժանորդով։

2024 թ.-ի 2-րդ եռամսյակի արդյունքում «Տելեկոմ Արմենիա»-ին բաժին է ընկնում ամրակցված ինտերնետի շուկայի բաժանորդների 32,3%-ը:

«Մեր ռազմավարական ծրագիրը՝ 25 Գբ/վ թողունակությամբ գերարագ օպտիկամանրաթելային ցանցի կառուցումը տալիս է իր դրական արդյունքները։ Հազարավոր բաժանորդներ վերամիանում են ֆիքսված ինտերնետի մեր նոր ցանցին, ինչպես նաև կայուն աճում է նոր բաժանորդների թիվը։ Գոհունակության ցուցանիշը այս ցանցի դեպքում շատ բարձր է, և մենք ակնկալում ենք պահանջարկի ավելացում ապագայում։ Այս ցանցը նաև հիմք է հանդիսանալու Հայաստանի ողջ տարածքում ամենաժամանակակից բջջային ծառայությունների գործարկման համար՝ ապահովելով եկամտի կայուն աճ»,- նշում է Team Telecom Armenia-ի գլխավոր տնօրեն Հայկ Եսայանը:

Մանրամասները՝ «Փաստ» օրաթերթի այսօրվա համարում