«Երջանիկ լինելու համար ինձ պետք է հասկացող կողակից». Սյուզաննա Մելքոնյան

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Tert.am Life-ի բլից հարցերին այս անգամ պատասխանել է երգչուհի Սյուզաննա Մելքոնյանը:

-Ո՞ր ժամին եք արթնանում ու ինչպե՞ս եք սկսում օրը:

-Միջին վիճակագրականով արթնանում եմ առավոտյան 9-9.30-ին, իսկ եթե շատ հոգնած ու սպառված եմ լինում՝ 10-10.30-ին: Օրը սկսում եմ լոգանքով և մեկ բաժակ շատ համեղ սուրճով:

-Ի՞նչ կփոխեիք Ձեր արտաքինի մեջ:

-Մի քիչ ավելի շատ կնիհարեի, չնայած նիհարում եմ, և շատ կուզեի աչքերիս գույնը կանաչ լիներ:

-Ինչպիսի տղամարդիկ են Ձեզ դուր գալիս։

-Ինձ դուր են գալիս ծանրակշիռ, կրթված և համեստ տղամարդիկ:

-Ինչի՞ մասին եք երազում:

-Շատ բաների մասին եմ երազում, այս պահին շատ մեծ մենահամերգի մասին եմ երազում:

-Ի՞նչ փոխեց Ձեր կյանքում հայտնիությունը:

-Հայտնիությունը շատ բան փոխեց իմ կյանքում, բայց ամենակարևորը՝ ես մարդկանց միջոցով հասկացա, որ այսքան տարիների իմ աշխատանքը զուր չէ:

-Ամենամեծ սուտը, որ լսել եք Ձեր մասին:

-Որ ես գնել եմ շատ մեծ առանձնատուն Հայաստանից դուրս:

- Ի՞նչը կարող է Ձեզ հունից հանել:

-Դիմացինի «նագլի» լինելը:

-Ֆոբիաներ, վախեր ունե՞ք:

-Շատ-շատ վախենում եմ մթությունից ու բարձրությունից, բայց հետաքրքիր է, որ շատ սիրում եմ օդանավ:

-Ավելի շատ նեղանո՞ւմ եք, թե՞ նեղացնում: 

-Վերջին շրջանում ավելի շատ սրտնեղում ու նեղանում եմ:

-Ի՞նչ է պետք Ձեզ երջանիկ լինելու համար:

-Ինձ հասկացող ընկեր, կողակից (հակառակ սեռի):

-Եթե երգչուհի չդառնայիք, ի՞նչ մասնագիտություն կընտրեիք:

-Դատավոր:

-Երևանում Ձեր ամենասիրելի հատվածը:

-Ամբողջ Երևանը, բայց երևի ամենաշատը սիրում եմ Թումոյի այգին: