Գազալցակայանի պայթյունից արդեն զոհ կա, բայց մեղադրյալ չկա․ ովքե՞ր են ողբերգական դեպքի պատասխանատուները

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

2024 թվականի հունիսի 6-ին՝ ժամը 23.10-ի սահմաններում Երևան-Սևան ավտոճանապարհի 16-րդ կմ հատվածում գտնվող գազի լցակայանում տեղի էր ունեցել պայթյուն, որի հետևանքով կան վիրավորներ և զոհ։ 

Դեպքի առթիվ Քննչական կոմիտեում նախաձեռնվել է քրեական վարույթ Քրեական օրենսգրքի 172-րդ հոդվածի 2-րդ մասով (երկու կամ ավելի անձանց առողջությանը անզգուշությամբ ծանր վնաս պատճառելը), 356-րդ հոդվածի 2-րդ մասով (պայթյունավտանգ օբյեկտներում անվտանգության կամ աշխատանքի պաշտպանության կանոնները կամ պահանջները խախտելը, որն անզգուշությամբ առաջացրել է մարդու մահ կամ այլ ծանր հետևանք), 357-րդ հոդվածի 2-րդ մասով (հրդեհային անվտանգության կանոնները կամ պահանջները խախտելը, որն անզգուշությամբ առաջացրել է մարդու մահ կամ այլ ծանր հետևանք), 358-րդ հոդվածի 2-րդ մասով (դյուրավառ կամ այրիչ նյութերի պահպանման, հաշվառման, փոխադրման, առաքման կամ օգտագործման կանոնները կամ պահանջները խախտելը, որն անզգուշությամբ առաջացրել է մարդու մահ կամ այլ ծանր հետևանք) և 412-րդ հոդվածի 2-րդ մասի 2-րդ կետով (անվտանգության պահանջներին չհամապատասխանող հումքերի կամ ապրանքների շրջանառությունը, աշխատանքների կատարումը կամ ծառայությունների մատուցումը, որն անզգուշությամբ առաջացրել է մարդու մահ, առողջությանը ծանր վնասի պատճառում կամ այլ ծանր հետևանք) նախաձեռնվել է քրեական վարույթ: Նախաքննության կատարումը հանձնարարվել է քննչական խմբին։ 

Քննչական կոմիտեից MediaHub-ին ասացին, որ այս պահին դեռևս մեղադրյալներ կամ կասկածյալներ չկան, առհասարակ չկան այնպիսի անձինք, որոնց նկատմամբ քրեական հետապնդում է նախաձեռնվել։ 

«Քրեական վարույթով նախաքննություն է իրականացվում, դեռ վարույթը չի հասել քրեական հետապնդումներ հարուցելու փուլին։ Նշանակված են մի քանի փորձաքննություններ, որոնց նպատակը հենց պայթյունի և առաջացած հրդեհի պատճառները պարզելն է։ Դրանց եզրակացությունները դեռևս չենք ստացել, բացի այդ, իրավասու մարմիններին հարցումներ են արվել, և այս փուլում ստացվում են պահանջվող փաստաթղթերը՝ կապված տվյալ օբյեկտի շահագործման, գործունեության օրինականության, անվտանգության կանոնների պահպանման և այդ կանոնների պահպանման նկատմամբ հսկողություն իրականացնելու վերաբերյալ, որոնք ուսումնասիրվում են։ Եւ միայն այդ ամեն ինչի, ինչպես նաև այլ քննչական գործողությունների արդյունքում ձեռք բերված փաստերի համադրմամբ հնարավոր կլինի իրավական գնահատականներ տալ։ Այս պահին դեռևս վաղ է այդ մասին խոսելը»,-ասացին Քննչական կոմիտեից։ 

Հարցին՝ հարցաքննվողներ եղե՞լ են, ՔԿ-ից դրական պատասխան տվեցին, որ բազմաթիվ անձինք են հարցաքննվել, սակայն անուններ չտվեցին, թե ովքեր։ 

Նշենք, որ MediaHub-ը գրել էր, որ այդ օբյեկտի շահագործման և անվտանգության կանոնների խախտման առթիվ պետական իրավասու մարմինները, մասնավորապես Քաղաքաշինության, տեխնիկական և հրդեհային անվտանգության տեսչական մարմինը գազալցակայանի գործունեության դադարեցման որոշում էր կայացրել, սակայն սեփականատերը որոշումը բողոքարկել էր դատարանում, և դատարանը բավարարել էր հայցը՝ չեղարկելով Տեսչական մարմնի կայացրած ակտը։ Եւ գազալցակայaնը շարունակել էր գործել։ Այս մասին մեզ հետ զրույցում հայտարարել էր նաև Կոտայքի մարզպետ Ահարոն Սահակյանը։

Թեպետ նկատենք, որ պայթյունի օրը լցակայանի սեփականատերն ասել էր, թե իբրև իր մոտ «թղթերով ամեն ինչ կարգին է եղել», որևէ խնդիր լցակայանը չի ունեցել։ Ու այստեղ մեղադրանքի սլաքներն ակամա ուղղվում են դեպի դատարան, որը բավարարել է գազալցակայանի տիրոջ հայցը և թույլ տվել, որ տվյալ օբյեկտը շարունակի գործել խախտումներով։ Մեզ ասացին, որ լցակայանի տերը խնդիրներ է ունեցել նաև համայնքային իշխանությունների և Կոտայքի մարզպետարանի հետ, անգամ գնացել և մարզպետարանի դիմաց սպառնացել է ինքնավնասման դիմել, եթե հանկարծ իրեն պատկանող օբյեկտի գործունեությունը դադարեցվի։ Այս ամենի հետևանքը եղավ այն, որ այսօր ունենք պայթած գազալցակայան, զոհ և վիրավորներ։ Եւ այս ամենը՝ պետական մարմինների և դատական համակարգի ոչ պրոֆեսիոնալ, թերի աշխատանքի կամ կիսատ-պռատ գրված օրենքների պատճառով։ 

Առավել մանրամասն` այստեղ.

https://t.me/armenia24live