Թե ինչպես են կենդանասերները հայտնվել ոստիկանությունում

«Դինգո թիմ» կենդանասերների պաշտպանության հարցերով զբաղվող կազմակերպության կամավորներն օրերս հայտնվել էին ոստիկանական բաժանմունքում: Past.am-ի հետ զրույցում կամավոր Գոհար Մանուշակյանը պատմել է մանրամասները:

Բանն այն է, որ սրանից առաջ օգտատեր Միլենա Սահակյանը «Ֆեյսբուքում» գրառումներ էր անում՝ հայտարարելով, թե կորցրել է պուդել ցեղատեսակի իր շանը, ինչից հետո նման ցեղատեսակի շուն գտնողները դիմում էին նրան:

«Պուդել գտնողներն առաջինը նրան էին զանգում և հորդորում գալ և տեսնել, թե արդյոք գտնված շունն իրենն է: Նման ձևով Միլենան մի շուն էր վերցրել, հետո տվել մի այլ տղայի, ով օրեր առաջ համացանցում դրել էր այդ շան վաճառքի վերաբերյալ հայտարարությունը»,- պատմեց Մանուշակյանը: Դրանից հետո կենդանասերներին ահազանգում է մի կին՝ հայտարարելով, որ իրենց շենքի շքամուտքում հայտվել է մի պուդել, մինչև կենդանասերները հասնում են «դեպքի վայր», Միլենա Սահակյանն առաջինը գնում և վերցնում է՝ ասելով, թե դա իր շունն էր:

«Միլենան նույն օրը «Ֆեսբուքում» գրում է, թե շունն իրենը չէր, սակայն ուզում է իր մոտ թողնել և պահել: Մեր կամավորներից մեկն ասում է, որ պետք է ճարել շան իրական տերերին, գուցե նրանք փնտրում են կորած կենդանուն, սակայն Միլենան հրաժարվում է շանը տալ մեզ: Դրանից հետո մենք դիմում ենք խորամանկ քայլի, մեր կամավորներից մեկը նրան գրում է, թե ցանկանում է այդ շանը գնել և պատրաստ է վճարել 70 հազար դրամ, Միլենան ուրախությամբ համաձայնում է իրականացնել այդ գործարքը»,- մանրամասնեց կամավոր Մանուշակյանը՝ շարունակելով պատմել տեղի ունեցածը:

Նրա խոսքով՝ երբ կամավորները գնում են շանը վերցնելու, Միլենան ճանաչում է կամավորներին, շանը նետում է կամավորների վրա և փորձում փախչել: Այդ ժամանակ կենդանասերներից մեկն ասում է, որ դիմելու են ոստիկանություն, քանի որ այդ աղջիկը փորձում է վաճառել ուրիշի սեփականություն հանդիսացող շներին՝ նախապես խաբեությամբ նրանց ձեռք բերելով: Դրանից հետո գալիս է այդ աղջկա հայրը, սկսում կռվել կենդանասերների հետ, որից հետո «Դինգո»-ի կամավորները դիմում են ոստիկանություն: Մանուշակյանի խոսքով՝ ոստիկանության բաժանմունքում իրենք դիմում են գրում՝ պահանջելով կասեցնել Միլենա Սահակյանի ապօրինի գործունեությունը, այն է՝ խաբեությամբ ձեռք բերված և ուրիշի սեփականությունը հանդիսացող շների վճառքը: Դրանից հետո Միլենայի հայրը պատասխան դիմում է ներկայացնում ոստիկանություն՝ նշելով, թե իբրև Մանուշակյանը խլել է շանը:

«Եթե, օրինակ՝ ես «շանը» խլել եմ, ապա բժշկական փորձաքննությունը պետք է ցույց տա, որ ես Միլենային մարմնական վնասվածքներ եմ պատճառել, իսկ եթե այս ամենը չապացուցվի, ես Միլենայի ընտանիքի դեմ համապատասխան բողոք կգրեմ սուտ մատնության հիմքերով»,- ասաց կենդանասեր Գոհարը՝ տեղեկացնելով, որ Միլենայի ձեռքից «փրկված» շունն այժմ գտնվում է իր խնամակալության տակ: ՀԳ: Past.am-ը կհետևի իրադարձությունների ցարգացմանը:

 

Լուսանկարում՝ Միլենա Սահակյանն է

Լիլիթ Լալայան