Իմ կյանքում արդեն կա մեկն, ում նվիրել եմ սիրտս. Լեւս Դավթյանը՝ հեռուստաեթեր վերադառնալու եւ անձնական կյանքի մասին

Դերասան Լեւս Դավթյանին երկարատեւ հեռուստատեսային դադարից հետո շատ շուտով կրկին էկրաններին կտեսնենք: Այս մասին Life.panoarama.am-ին պատմել է Լեւսն ու մանրամասներ հայտնել առաջիկա ծրագրերից:

«Շատ շուտով Հարութ Շատյանի ռեժիսորությամբ 20 մասանոց ֆիլմում պետք է նկարահանվեմ, որը կհեռարձակվի «Արմենիա TV»-ով: Դեռեւս փակագծեր բաց անել չեմ կարող, բայց կնշեմ, որ այս անգամ հեռուստադիտողը ինձ կտեսնի բոլորովին այլ կողմից. ներկայանալու եմ նոր կերպարով, այսինքն՝ լինելու է նոր շունչ ու նոր ասելիք»,- նշեց նա:

Մեր այն նկատառմանը, թե դերասանն ինչպե՞ս է համաձայնել նկարահանվել բազմասերիանոց ֆիլմում, քանի որ նախորդ տարվա ընթացքում կրկին մեզ հետ զրույցում նշել էր, որ սերիալներում մեծ ցանկություն չունի ներկայանալու, Լեւսը նշեց. «Այո, ինձ համար շատ կարեւոր է այն արտադրանքը, որտեղ կներկայանամ: Այս առաջարկը ինձ շատ հետաքրքրեց, նախ շատ եմ հավանում Հարութ Շատյանի աշխատանքները, հետո ինձ գրավեց նաեւ իմ անելիքը այս նախագծում, ինչու չէ նաեւ դերասանական կազմը: Ես շատ ուրախաց, որ այս աշխատանքը երկարաշունչ հեռուստասերիալ չէ, ունի իր արդեն մտածված եւ գրված սցենարը: Հուսամ, ամեն բան կընթանա այնպես, որ ես ինձնից գոհ մնամ»:

Բացի ֆիլմից, Լեւս Դավթյանը շուտով նոր ներկայացմամբ կներկայանա. «Շատ շուտով ձեռնամուխ կլինենք նոր ներկայացման՝ Մարգարիտա Գրիգորյանի «Կայարան» պիեսի հիման վրա, որի ռեժիսորն է Սամսոն Մովսիսյանը: Այս ժանրում մենք կրկին աշխատել ենք՝ լինելու է հոգեբանական դրամմա: Ինձ շատ հաշելի է այս ժանրում աշխատել՝ կարողանում ես ինքնաարտահայտվել եւ միաժամանակ շատ բան սովորել: Պիեսը ընտանիքի մասին է, հերոսներին կմարմնավորենք ես, Անի Ղազարյանը, Սամսոն Ստեփանյանը, Սոնա Մաթեւոսյանը եւ Արսեն Չաչոյանը»:

Անաիս Սարդարյանի, Լեւս Դավթյանի եւ Սոնա Մաթեւոսյանի «410» անունը կրող դերասանական դպրոց-ստուդիան շուոտով կրկին իր դռները կբացի սաների առաջ. «Մարտից մեր դպրոցում կլինեն նոր ընդունելություններ: Արդեն հաջողված աշխատանքից հետո հույս ունեմ կրկին բարեհաջող ընդունելություն եւ ուսումնական շրջան կլինի: Դպրոցը մի պահ դադար վերցրեց զուտ Անաիսի եւ Սոնայի զբաղվածությունից ելնելով, բայց այդ դադարը շուտով կչեղարկվի»,- հավելեց Լեւս Դավթյանը:

2016-ից դերասանը մեծ ակնկալիքներ ունի. «2015-ը ինձ համար այնքան էլ բարեհաջող տարի չէր, իսկ նոր տարուց մեծ ակնկալիքներ ունեմ: 2016-ը արդեն լավ է սկսվել, լավ կլինի, որ այդպես էլ շարունակվի»,- նկատեց նա:

Ի դեպ,  Լեւս Դավթյանի անձնական կյանքում վերջին շրջանում դրական փոփոխություններ են գրանցվել, ինչի մասին առաջինը նա պատմեց Life.panorama.am-ին. «Իմ կյանքում արդեն կա մեկն, ում նվիրել եմ սիրտս, նա ապրում է Փարիզում, բայց աշխարհագրական դիրքի պատճառով մեր միջեւ ընկած հեռավորությունը չի խանգարում զգացմունքների խորացմանը: Դեռեւս չգիտեմ, թե մեր շարունակությունը, որ երկրում կլինի, բայց հույսով եմ՝ այդ շարունակությունը կլինի»,- նշեց դերասանը՝ խոստանալով անձնական կյանքի առավել մանրամասները ապագայում կրկին մեզ վստահել: