Ինչ է պատմում դպրոցի տնօրենը 15-ամյա աշակերտի մահվան պատճառների մասին

ОБЩЕСТВО 4 Декабрь, 2023 17:30

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Վաղարշապատի Մաքսիմ Գորկու անվան թիվ 5 ավագ դպրոցի սան՝ 15-ամյա Նարեկ Հ.-ի մահվան փաստով նախաձեռնված վարույթի շրջանակում այսօր հայտնի կլինեն նշանակված դատաբժշկական փորձաքննության արդյունքները։

«Համացանցում պտտվող այն լուրերը, որ երեխայի երկկողմանի վիրուսային թոքաբորբը կապված է որոշ ժամանակ առաջ դպրոցում տեղի ունեցած վիճաբանության հետ, ճիշտ չեն։ Դպրոցում առկա են տեսագրություններ, համագործակցել ենք անչափահասների բաժնի հետ, եկել են, բոլոր տեսագրությունները տարել են, որևէ մեկը կապ չի տեսնում վիճաբանության, երկկողմանի թոքաբորբի ու արյան վարակի հետ»,-Panorama.am-ի հետ զրույցում ասաց դպրոցի տնօրեն Գայանե Սաֆարյանը։

Վկայակոչելով իր ունեցած տեղեկությունները՝ տնօրենը պատմեց, որ մահվանից օրեր առաջ «Սուրբ Աստվածամայր» ԲԿ-ում երեխայի եղունգը հեռացրել են, ինչից հետո չեն ցանկացել մնալ ու բուժում ստանալ հիվանդանոցում։

«Ինչին չեմ տիրապետում, չեմ կարող ասել, այդ արյան վարակը և այլն։ Բայց այսօր կլինեն դատաբժշկական փորձաքննության արդյունքները, ամբողջ ջրերը կզուլալեն»,-ասաց Գայանե Սաֆարյանը։

Նրա խոսքով, դպրոցում լուրջ վիճաբանություն չի եղել։ Ուսումնասիրել են տեսագրությունները։ Ըստ դրանց, հավաքվում են իրար գլխի, իրար հրում։ Հետո երևում է, որ ուսուցիչն ու նրա օգնականը միջամտում են, աշակերտներին հաշտեցնում են, իրար ձեռք ձեռքի են տալիս։

«Երեխան մնում է, դասերին է նստում, յոթերորդ ժամից փախնում է դասից։ Փախչում է, քանի որ հսկող կետում մայորը նստած չի լինում, ինքը վազելով է գնում։ Եթե տրավմա լիներ, չէր վազի։ Դպրոցի հարթակից մինչև ներքև ութ աստիճանը երեք լոքով է անցնում, հետո վազելով, արագ քայլքով դպրոցից դուրս է գալիս։ Թե դրանից հետո ինչ է եղել, ես իրավասու չեմ ասել և դպրոցի հետ չի կապվում»,-ասաց տնօրենը։

Քննչական կոմիտեից Panorama.am-ին ասացին՝ գործի վերաբերյալ մանրամասներ կարող են հայտնել ավելի ուշ։

Հիշեցնենք, որ Shamshyan.com-ը գրել էր, որ դեկտեմբերի 2-ին Երևանի «Սուրբ Աստվածամայր» բժշկական կենտրոնում մահացել է Արմավիրի մարզի բնակիչ 15-ամյա Նարեկ Հ.-ն: Նա ԲԿ էր տեղափոխվել նոյեմբերի 23-ին՝ «Վաղարշապատ» բժշկական կենտրոնից:

Ըստ աղբյուրի, այդ օրը՝ ժամը 18:00-ի սահմաններում, ոստիկանության Վաղարշապատի բաժին ահազանգ էր ստացվել, որ «պոլիտրավմա» ախտորոշմամբ Վաղարշապատի շտապօգնության բժիշկների կողմից «Սուրբ Աստվածամայր» ԲԿ է տեղափոխվել Նարեկ Հ.-ն:ինչ բժիշկները բուժօգնություն էին ցուցաբերում երեխային, ՀՀ ՆԳՆ ոստիկանության Արմավիրի մարզային վարչության ծառայողները պարզում են, որ նոյեմբերի 17-ին, ժամը 12:00-ի սահմաններում Վաղարշապատի Մաքսիմ Գորկու անվան թիվ 5 ավագ դպրոցի ֆիզկուլտուրայի հրապարակում կենցաղային հարցերի շուրջ վիճաբանություն է տեղի ունեցել Նարեկ Հ.-ի, Արմավիրի մարզի բնակիչներ 16-ամյա Արայիկ Կ.-ի և 16-ամյա Մելիք Կ.-ի միջև, որի ժամանակ վերջիններս ծեծի են ենթարկել Նարեկ Հ.-ին, ով տեղափոխվել է հիվանդանոց:

Դեպքի փաստով Վաղարշապատի քննչական բաժնում նախաձեռնվել է քրեական վարույթ: