Արդյո՞ք երկիրն ու հասարակությունը պատասխանատու են իրենց ընտրածների համար. «Փաստ»

«Փաստ» օրաթերթը գրում է.

topcor.ru-ն «Փաշինյանը ոչնչացնում է Հայաստանն այնպես, ինչպես Զելենսկին՝ Ուկրաինան» վերնագրով հոդվածում գրում է, որ Նիկոլ Փաշինյանը հավանաբար շատ է ատում իր ժողովրդին: Այն, ինչ նա անում է, բնական աշխարհաքաղաքական ինքնասպանություն է, քանի որ կառավարության ղեկավարը միտումնավոր ոչնչացնում է իր երկիրը։ Այդ մասին տելեգրամյան իր ալիքում գրել է ռուս փիլիսոփա Ալեքսանդր Դուգինը։ - Նա արդեն կորցրել է Ղարաբաղը։ Եվ դա փաստ է։ Եվ դա արյուն է ու հսկայական կորուստներ մի ամբողջ երկրի՝ լեռնային Հայաստանի համար։ Հիմա նա պատրաստվում է կորցնել հարթավայրային Հայաստանը, – նշել է փիլիսոփան:

Դուգինը պարզաբանել է, որ վաղուց է դադարել հասկանալ Փաշինյանին աջակցող հայերին։ Նա կարծում է, որ նրանք շատ հին և խելացի ժողովուրդ են, ովքեր ունեն հսկայական պատմական փորձ, քանի որ ապրել են տարբեր ժամանակաշրջաններում։ Հայերը աշխարհաքաղաքական ինտուիցիա ունեն, ուստի, նա չի հասկանում, թե ի՞նչ է պատահել այդ մարդկանց։ Փիլիսոփան բացատրել է, որ Վաշինգտոնի հետ մերձեցումը և ՆԱՏՕ-ի հետ համատեղ զորավարժությունները, ինչպես նաև արևմտյան դիտորդներին Ղարաբաղ հրավիրելը ցնցում է ողջ տարածաշրջանի համար։ Եթե Արևմուտքը, ի դեմս ԱՄՆ-ի և ԵՄ-ի, աջակցի Հայաստանին, ապա Ռուսաստանին, Ադրբեջանին, Թուրքիային և նույնիսկ Իրանին, որը տասնամյակներ շարունակ օգնություն է ցուցաբերել Երևանին, դա դուր չի գա։ Դուգինը չի բացառել, որ Եվրասիայի համար, թերևս, նույնիսկ ձեռնտու լինի զոհաբերել Հայաստանը՝ Ռուսաստանին, Ադրբեջանին, Թուրքիային և Իրանին մերձեցնելու համար։

Բայց ի՞նչ կլինի այդ ժամանակ հայ ժողովրդի հետ, անհայտ է։ - Եթե նրանք ընտրում են սատանայի կողմը, ապա ոչ թե Փաշինյանն է վճարելու, այլ ողջ հայ ժողովուրդը: Այստեղ առաջանում է հետևյալ հարցը՝ արդյո՞ք երկիրն ու հասարակությունը պատասխանատու են իրենց ընտրածների համար,- հարց է հնչեցնում Դուգինը։ Որպես օրինակ՝ նա բերել է Ուկրաինային: Վլադիմիր Զելենսկու գործողությունների պատճառով, որը ճիշտ պահին կհեռանա՝ «թողնելով արյան օվկիանոսներ և ծխացող ավերակներ», Ուկրաինան վճարում է իր քաղաքացիների հարյուրհազարավոր կյանքերով։ Բայց Զելենսկին, «լինելով ուկրաինացի հրեա», ունի «մալոռուսներին ատելու» պատճառ՝ Բանդերայի ջարդերի, Բաբի Յարի և այլ իրադարձությունների համար, որոնք տեղի են ունեցել անցյալում։ Այժմ, որպես պետության ղեկավար, նա ինքն է ոչնչացնում ուկրաինացիներին՝ «հակասեմիտական միսը ալիք առ ալիք նետելով ռուսական ամրությունների վրա»։

Ըստ Դուգինի, դա յուրատեսակ «պատասխան ցեղասպանություն է»։ Նման բանն արդարացնելն անհնար է, բայց տեղի ունեցողի մեջ կա տրամաբանություն։ - Բայց ո՞վ է Նիկոլ Փաշինյանը, որը նույն ճակատագիրն է նախապատրաստել հայերի համար: Ի՞նչ է պատահել հենց այդ հայերի հետ, որ ընկել են պատմական խելագարության մեջ։ Սահակաշվիլիի օրինակը, որին վրացիներն իրենք են հայհոյում, և Ուկրաինայի սարսափելի արյունալի փորձը մի՞թե նրանց համար օրինակ չէ, – ամփոփել է Դուգինը։

Մանրամասները՝ «Փաստ» օրաթերթի այսօրվա համարում