«ԶՊՄԿ-ում, բնականաբար, ադրբեջանցիներ չեն աշխատում». ԶՊՄԿ

Օրերս մի քանի լրատվամիջոցներում լուր տարածվեց այն մասին, թե Զանգեզուրի պղնձամոլիբդենային կոմբինատում (ԶՊՄԿ) աշխատանքի են անցել ադրբեջանցիներ, այդ թվում՝ բարձր պաշտոնների։ Ըստ տարածված լուրերի, որը վերնագրված է «ԶՊՄԿ-ն անցնում է Ադրբեջանին», ընկերությունում աշխատանքի անցած ադրբեջանցիների  թիվը 5-6-ն է, իսկ մեկը՝ Արտյոմ Բորոդաևը, որ զբաղեցնում է կապիտալ շինարարության գծով տնօրենի պաշտոնը, ժամանակին իր ֆեյսբուքյան էջին ունեցել է Բաքվում արված նկար, որը հետո հեռացրել է Ֆեյսբուքից։ Ինչո՞ւ կամ ինչպե՞ս պետք է ԶՊՄԿ-ում աշխատանքի ընդունեին ադրբեջանցիների: 168.am-ը դիմեց ԶՊՄԿ-ին՝ խնդրելով պարզաբանել որոշ ԶԼՄ-ներում տարածվող այդ լուրը:

ԶՊՄԿ-ում խնդրեցին գրավոր ուղղել հարցերը, ապա լրատվական բաժնից փոխանցեցին հետևյալ պատասխանը։

«Անհեթեթությունները կգերադասեինք չմեկնաբանել, բայց, հաշվի առնելով այն հանգամանքը, որ նման վտանգավոր զրպարտությունը տարածվում է այս զգայուն շրջանում, համառոտ անդրադառնանք.

1. ԶՊՄԿ-ում, բնականաբար, ադրբեջանցիներ չեն աշխատում։ Կարծում ենք պատկան մարմինների խնդիրն է՝ պարզել, թե այն շրջանում, երբ ԶՊՄԿ-ն և Հայաստանի հանքարդյունաբերությունը հետևողականորեն թիրախավորվում են ադրբեջանական հատուկ ծառայությունների կողմից՝ նպատակ ունենալով հարված հասցնել Հայաստանի տնտեսությանը, ո՞ւմ շահերից է բխում Հայաստանի ներսում նման զրպարտչական, վտանգավոր թեզերի տարածումը։

2. Ինչ վերաբերում է ազգությամբ ռուս աշխատակցի կողմից Բաքվի տուրիստական նշանի մոտ տարիներ առաջ արված լուսանկարին, ապա ԶՊՄԿ-ում միշտ աշխատել են տասնյակ ազգությունների մասնագետներ՝ գերմանացիներ, կանադացիներ, ռուսներ, ռումինացիներ, ուկրաինացիներ և այլն։ Նրանցից շատերը նախկինում կարող են շրջագայած լինել տասնյակ քաղաքներում և այդ քաղաքների լուսանկարները տեղադրած լինել իրենց սոցիալական էջերում, ինչպես անում են բոլոր տուրիստները, և ենթադրում ենք, չեն անում լրտեսները։ Կարծում ենք՝ այստեղ նույնպես մեկնաբանություններն ավելորդ են»։