«Վստահաբար կարող ենք տպավորել իրանցի և հայ հանդիսատեսին». իրանական «Յոթ գեղեցկուհիներ» ներկայացման մեջ ընդգրկված են նաև հայ դերասաններ. «Փաստ»

«Փաստ» օրաթերթը գրում է

Փետրվարի 26-ին Երիտասարդական թատրոնում տեղի կունենա «Յոթ գեղեցկուհիներ» ներկայացման պրեմիերան։ Սա Երիտասարդական թատրոնի և Իրանի Իսլամական Հանրապետության «Թանդիս» թատերական խմբի առաջին համագործակցությունն է: Ֆաթեմեհ Աբդուր Ռահիմիի ղեկավարությամբ «Թանդիսը» Թեհրանի լավագույն թատրոններում ներկայացրել է 23 թատերական ներկայացում։ Խումբը երկու տարի ճանաչվել է ամենաարդյունավետ խումբը, այն ունի նաև արվեստի քոլեջ, որտեղ անցկացվում է թատերական ուսուցում։ Նախքան ներկայացման պրեմիերան, «Փաստը» զրուցեց գրող, բեմադրիչ, դերասան Համեդ Շեյխի հետ:

Նշում ենք՝ հայ և իրանցի հարևան ու բարեկամ ժողովուրդները համագործակցում են տարբեր, այդ թվում՝ մշակույթի ոլորտում: Թատերական խմբի այցը Հայաստան ևս նման համագործակցության արդյունք է: Առաջարկում եմ զրուցակցիս պատմել ներկայացման մասին: «Նախ նշեմ, որ սա «Թանդիս» թատերական խմբի թվով 23-րդ ներկայացումն է, որպես գրող և ռեժիսոր՝ իմ 16-րդ ներկայացումը։ Այն հիմնված է իրանական պատմության և գրականության բնագավառում կատարված ուսումնասիրությունների վրա և Հաքիմ Նիզամի Գյանջավիի «Հաֆթ Պեքիր» բանաստեղծության և Բահրամ V Սասանյանների թագավորության պատմության աղբյուրն է: Այս ներկայացման պատմական շրջանը կապված է այն ժամանակաշրջանի հետ, երբ Իրանն ու Երևանն ընդհանուր տարածքում էին: Երևանցիներին համարում ենք մեր բարեկամները, ուստի որոշեցինք այս ներկայացումը բեմադրել նաև Երևանում։ Այն մեծ ընդունելության է արժանացել Թեհրանի թատերական համալիրում, և հուսով եմ՝ կընդունվի ձեր մայրաքաղաքում ևս։Այս ներկայացման ընթացքում ականատես կլինենք Իրանի շահի միությանը յոթ երկրների իշխանների հետ, ինչը ցույց է տալիս այս երկրի հաշտեցումն աշխարհի հետ: Ներկայացման մեջ տեղի են ունենում իրադարձություններ, որոնք հետագայում կրկնվում են պատմության ընթացքում»,-ասում է Համեդ Շեյխը։

Հաջորդիվ հետաքրքրվում եմ՝ ինչպիսի՞ն են տպավորությունները հայ գործընկերների հետ համագործակցությունից: Նշենք, որ ներկայացման մեջ ընդգրկված են նաև հայ դերասաններ: ««Թանդիս» խմբի միջազգային կապերի տնօրեն Սամուել Ջաֆարիպուրիի միջոցով ծանոթացանք Ազգային երիտասարդական թատրոնի տնօրեն Արսեն Ազիզյանի հետ, նա մեզ շատ օգնեց, ծանոթացրեց պրոդյուսեր Լիլիթ Մովսիսյանի հետ: Ծանոթացրեցին հայ դերասանների հետ, առաջարկեցին նրանց ևս ներկայացման մեջ ընդգրկել:Այսպիսով՝ բեմում կտեսնեք Նվեր Պետրոսյանին, Մարիամ Մելիքյանին,Վարդուհի Էլբակյանին,Անահիտ Կարապետյանին, Նարե Ավագյանին և Լիլիթ Մովսիսյանին: Նրանց ներկայությամբ և այս ներկայացման շնորհիվ, վստահաբար, կարող ենք տպավորել իրանցի և հայ հանդիսատեսին: Ընդհանուր ոգի ունենք հայերի, հատկապես սիրելի երևանցիների հետ: Արդեն սիրելի դարձած հայ արտիստների հետ համագործակցությունը մեր խմբի համար ձեռքբերում ենք համարում և հուսով ենք՝ կունենանք այլ համատեղ համագործակցություններ ևս հայ արտիստների հետ ինչպես Երևանում, այնպես էլ Թեհրանում»,-նշում է մեր զրուցակիցը։

Մեր երկու ժողովուրդներն ունեն աշխարհայացքի, մտածելակերպի տարբերություններ: Հարցնում եմ՝ կա՞ն մտավախություններ, թե ինչպիսին կլինի հայ խստապահանջ հանդիսատեսի արձագանքը: «Ո՛չ, այս ներկայացումով կարող ենք հասնել զգալի ընդհանրությունների մշակույթի ոլորտում, սա ասում եմ՝ հիմնվելով տարբեր տեսահոլովակների միջոցով և իրանական փառատոններում մեր դիտած հայկական ներկայացումներից ստացած տպավորությունների վրա»,-եզրափակում է ռեժիսորը:

ԼՈՒՍԻՆԵ ԱՌԱՔԵԼՅԱՆ

Մանրամասները՝ «Փաստ» օրաթերթի այսօրվա համարում