Ինչ գործունեությամբ է աչքի ընկել Արգենտինայում ՀՀ դեսպան Հովհաննես Վիրաբյանը

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Շարունակելով ընթերցողների ուշադրությանը ներկայացնել արտերկրում հավատարմագրված ՀՀ արտակարգ և լիազոր դեսպանների գործունեությունը՝ այսօր կանդրադառնանք Արգենտինայում ՀՀ արտակարգ և լիազոր դեսպան Հովհաննես Վիրաբյանի գործունեությանը: ՎԵրջինիս կենսագրությունը բավական ուշագրավ է:  2007-2010թթ. նա աշխատել  է իբրև ռեֆերենտ ՀՀ ԱԳՆ «Պետական արարողակարգի ծառայություն» գործակալությունում, 2010-2013թթ.՝ ՀՀ ԱԳՆ «Պետական արարողակարգի ծառայություն» գործակալության պաշտոնական այցերի բաժնի կցորդ, 2013-2014թթ.՝ ՀՀ ԱԳՆ «Պետական արարողակարգի ծառայություն» գործակալության դիվանագիտական անձնակազմի բաժնի երրորդ քարտուղար, 2009-2014թթ.՝ ՀՀ ԱԳ նախարարի արարողակարգի պատասխանատու, 2015-2019թթ.՝ Իսպանիայի Թագավորությունում ՀՀ դեսպանության երկրորդ,քարտուղար, 2019-2021թթ.՝ ՀՀ ԱԳՆ Եվրոպայի վարչության երկկողմ հարաբերությունների առաջին բաժնի պետի պաշտոնակատար: 2021թ. փետրվարի 25-ին ՀՀ նախագահի հրամանագրով նշանակվել է Արգենտինայի Հանրապետությունում Հայաստանի Հանրապետության արտակարգ և լիազոր դեսպան:

Արտերկրում հավատարմագրված Հայաստանի ցանկացած դեսպանի հաջողության թիվ մեկ գրավականը տեղի հայ համայնքի, հայկական կազմակերպությունների, էթնիկ լոբբիստական կառույցների և ավանդական կուսակցությունների հետ տարվող աշխատանքներն ու անխափան համագործակցությունն է։ Այս առումով պետք է փաստենք, որ դեսպանատան պաշտոնական էջում իսպառ բացակայում է լուրեր բաժինը, ինչը թերևս նոնսենս է մի երկրի համար, որտեղ առկա է բավական կուռ և մեծաթիվ հայկական համայնք։  Համայնքն ապրում է ակտիվ հասարակական-քաղաքական կյանքով: Գործում են Հայկական բարեգործական ընդհանուր միության Բուենոս Այրեսի և Կորդոբայի մասնաճյուղերը (արգենտինահայ առաջին կազմակերպությունն է, հիմնադրվել է 1911 թ.), «Արմենիա» մշակութային ընկերակցությունը (ստեղծվել է 1951 թ. ՀՅԴ հովանավորությամբ), ՀՅԴ, ՌԱԿ. ՍԴՀԿ տեղական կազմակերպությունները` իրենց մշակութային, կրթական, երիտասարդական և մարզական ենթակառույցներով, ՀՕՄ-ի մասնաճյուղը, Արգենտինահայ մշակութային միությունը, Մարաշի, Հաճընի հայրենակցական միությունները, «Սիրանուշ և Պողոս Արզումանյան» հիմնադրամը, «Հայաստան» համահայկական հիմնադրամի արգենտինյան մասնաճյուղը, հայ-արգենտինյան առևտրաարդյունաբերական պալատը, «El Deportivo Armenio» սպորտային ակումբն ու այլ կազմակերպություններ: Համայնքի կենտրոնական մարմինը Հայաստանեայց Առաքելական եկեղեցու հոգաբարձությունն է` «Հայ Կենտրոն» անվամբ;

Արտաքին քաղաքականության արդյունավետ իմպլեմենտացիայի կարևորագույն տարրերից է եկեղեցական դիվանագիտությունը՝ մանավանդ, երբ խոսքը Հայաստանի արտաքին քաղաքականության մասին է։ Բուենոս Այրեսում գործում են 6 հայ առաքելական (Սուրբ Գրիգոր Լուսավորիչ, Սուրբ Պողոս Պետրոս, Սուրբ Գևորգ, Սուրբ Հակոբ, Վարագա Սուրբ Խաչ, Սուրբ Երրորդություն), 1 կաթոլիկ (Նարեկա Սուրփ Տիրամայր) և 2 ավետարանական եկեղեցիներ: 1990 թվականից Արգենտինայի թեմի առաջնորդն է Գիսակ արքեպիսկոպոս Մուրադյանը: Բուենոս Այրեսում գործում են Սուրբ Գրիգոր Լուսավորիչ, ՀԲԸՄ Մարի Մանուկյան, Խրիմյան կրթական հաստատությունները, Մխիթարյան վարժարանը, Վիսենտե Լոպեսի հայկական դպրոցը, Արծրունի և Սահակ Բագչեջյան վարժարանը: Սակայն, պետք է փաստենք, որ դեսպան Վիրաբյանը առանձնապես ակտիվ չէ նաև հայ առաքելական եկեղեցու թեմերի հետ համագործակցության առումով, դեսպանատան պաշտոնական ֆեյսբուքյան էջում կարելի է հանդիպել միայն արարողակարգային հանդիպումների մասին տեղեկատվությանը, դիցուք՝ Սուրբ Ծննդյան տոներին դեսպանը պատարագի էր մասնակցել:

Ընդունող պետության գործադիր իշխանության հետ աշխատանքը ցանկացած դեսպանի համար կարևորագույն առաջնահերթություն է։ Պաշտոնական լրահոսից տեղեկանում ենք, որ հանդիպել է Ռասինգ ֆուտբոլային ակումբի ներկայացուցիչների հետ, Արգենտինայի պետական ռադիոհեռուստատեսության (RTA) նախագահ Ռոսարիո Լուֆրանոյի հետ:  Մասնակցել է Ռոսարիոյի պետական համալսարանում անցկացվող ժողովրդավարության 8-րդ միջազգային համաժողովին, ուր հանդես եկավ «Հայաստան. Ամրագրված մարդու իրավունքներ և ժողովրդավարության ամրապնդում. նոր մարտահրավերներ» թեմայով դասախոսությամբ: Պետք է առանձնացնել ևս մեկ ուշագրավ հանդիպում՝ Իսրայելի պետական հիմնադրամի (Keren Kayemet Argentina) արգենտինյան ներկայացուցչության հրավերով, Բուենոս Այրեսի Իսրայելի հրապարակում դեսպան Վիրաբյանը տնկել է Հայաստանի Հանրապետության անվան ծառը: 

Հանրային դիվանագիտությունը ակնհայտորեն դեսպանի ուժեղ կողմերից մեկը չէ: Դեսպանատան ֆեյսբուքյան պաշտոնական էջը առավելապես հիշեցնում է ԱԳՆ կամ կառավարության պատի թերթ, այստեղ գրեթե բացակայում է որևէ հիշատակում առ այն, թե ինչով է զբաղված եղել դեսպան Վիրաբյանը՝ 44-օրյա պատերազմից, նախորդ տարի սեպտեմբերին ադրբեջանական կողմի կազմակերպած ագրեսիայից հետո: Դեսպանատան պաշտոնական ֆեյսբուքյան էջում կարելի է հանդիպել միայն ԱԳՆ ռելիզները: