«ԴիջիԹեք» համաժողովի անցկացում, «Արմաթ» լաբորատորիաների ստեղծում Հայաստանում և երկրի սահմաններից դուրս. ԱՏՁՄ-ն ամփոփում է 2022 թվականն ու ներկայացնում այս տարվա ծրագրերը

ОБЩЕСТВО 25 Январь, 2023 15:37

Այսօր Առաջատար տեխնոլոգիաների ձեռնարկությունների միության (ԱՏՁՄ) գրասենյակում տեղի ունեցավ ասուլիս, որի հիմնական նպատակը միության նախորդ տարվա աշխատանքների ամփոփումն էր, ինչպես նաև 2023 թ.-ին սպասվելիք խոշոր նախագծերի ներկայացումը:

ԱՏՁՄ նախագահ Ալեքսանդր Եսայանը լրագրողների հետ զրույցում ընդգծեց, որ միության բոլոր ծրագրերն ուղղված են IT համայնքի զարգացմանը: «Առաջնային կարևորություն ենք տալիս մեր կրթական ծրագրերին: «Արմաթը» մեծ հաջողություն ունի ոչ միայն Հայաստանում, այլ նաև մեր երկրի սահմաններից դուրս: Անցած տարի սկսեցինք աշխատել «Արմաթի» միջազգային շուկա դուրս գալու ուղղությամբ: Կրթությունն այն հիմնական ուղղությունն է, որը բերում է ոլորտի զարգացմանը: Հիմա մշակում ենք «Արմաթ 2»-ը, որի միջոցով էլ ավելի խորը գիտելիքներ կփոխանցենք երեխաներին: Անցած տարվա արդյունքներն ամփոփելով՝ կարող ենք նշել, որ մեր ոլորտում մեծ փոփոխություններ են եղել: Մասնագետների բավականին մեծ ներհոսք է եղել, ինչն ունեցել է նաև իր դրական արդյունքը»,-նշեց Եսայանը:

ԱՏՁՄ գործադիր տնօրեն Հայկ Չոբանյանի խոսքով, վերջին տարիների ընթացքում միությունն էապես խթանել է ոլորտի զարգացումը: «Այս տարիների ընթացքում միությունը 50-ից ավելի օրենսդրական ակտի հեղինակ է: Մեր խնդիրը ոլորտի հեղինակության բարձրացումն է Հայաստանում և երկրի սահմաններից դուրս: Մեր երեխաներն ու երիտասարդները պետք է հետաքրքրված ու շահագրգռված լինեն տեխնոլոգիական ոլորտում կրթություն ստանալու ուղղությամբ»,-ասաց նա: Հավելեց` միությունը ռազմավարական 5 ուղղություն ունի` Հայաստանի դիրքավորումը որպես առաջատար բարձր տեխնոլոգիական երկիր, գիտության և հետազոտության զարգացումը, էլեկտրոնային կառավարումը, ռազմարդյունաբերությունը, կրթության և աշխատուժի զարգացումը: «Առաջին մասով 2022 թ.-ին բավականին լայնածավալ աշխատանք ենք սկսել տեխնոլոգիական ոլորտի բրենդինգի աշխատանքների առումով: Պատրաստվել է փաստաթուղթ, այն անցել է բոլոր փուլերով և արդեն մարտին տեղի կունենա Հայաստանի տեխնոլոգիական նոր բրենդինգի ներկայացումը: Գիտահետազոտության ոլորտի մասով անցած տարվա մեր հիմնական ձեռքբերումը «Հայաստանի տեխնոլոգիական ապագա» հարթակի ստեղծումն է: Այն մեր, հինգ համալսարանների ու գիտահետազոտական հաստատությունների և կառավարության համատեղ հարթակն է, մեր նպատակը հինգ ուղղություններով, բայց հատկապես կրթական և գիտահետազոտական ուղղություններով ծրագրեր իրականացնելն է: Ակնհայտ էր, որ ռազմարդյունաբերությունը պատերազմից հետո պետք է լիներ ԱՏՁՄ-ի հիմնական ռազմավարական ուղղություններից մեկը: Կազմակերպել ենք մի շարք քննարկումներ ռազմարդյունաբերական ընկերությունների ներգրավմամբ, սա այն թեման է, որը շատ բարձրաձայնել, սակայն, չենք կարող: Կրթության և աշխատուժի զարգացումը մեր աշխատանքի ամենածավալուն հատվածն է: Ամենամեծ ծրագիրը «Արմաթ» լաբորատորիաների զարգացումն է: 2022 թ.-ին 32 նոր լաբորատորիա ենք ներդրել: Այս տարի մտադիր ենք 50 լաբորատորիա բացել Հայաստանում և 50-ը վաճառել արտերկրում: Այսօր «Արմաթ» լաբորատորիաներ ունենք Ֆրանսիայում, Քուվեյթում, Գերմանիայում և այլուր: Ստեղծվել է «Արմաթն օդում» 12 լաբորատորիա, որոնք ավելի խորացված ուսուցում են մատուցում օդային ռոբոտաշինության ոլորտում: Ծրագիրն իրականացվել է Արցախում և ՀՀ սահմանամերձ բնակավայրերում»,-ընդգծեց Չոբանյանը:

Միությունն անցած տարի միայն «Արմաթ» ծրագրի շրջանակներում 15-ից ավելի միջոցառումներ են իրականացվել: «Բացի դա, անցած տարի Իջևանում և Արցախում ևս նորարարական նախագծեր ենք մեկնարկել»,-հավելեց միության գործադիր տնօրենը:

Միության 2023 թ.-ի ուղղությունները ևս մնում են նույնը: «Ունենք որոշակի առաջնահերթություններ, այն է` Համապարփակ պաշտպանության համակարգի զարգացման ուղղությամբ աշխատանքները և այն պետական ծրագիր դարձնելը, երկրորդն Արցախն է: Նոր իրավիճակ ունենք պատերազմից հետո: Պատերազմը շարունակվում է հիբրիդային տեսքով, տեխնոլոգիական ոլորտը պետք է առավելագույն ջանք գործադրի այս գործընթացում դերակատարություն ունենալու առումով: Ավելի մեծ ուշադրություն պետք է դարձնենք ոչ միայն անվտանգության, այլ նաև Արցախի հետ կապված ծրագրերին»,-նշեց Հ. Չոբանյանը:

Այս տարվա կարևորագույն իրադարձություններից մեկը լինելու է մարտի 10-12-ը կայանալիք «ԴիջիԹեք 2022» ցուցահանդեսն ու համաժողովը: Միջոցառումը նախապես ծրագրված էր իրականացնել նախորդ տարվա հոկտեմբերին, սակայն սեպտեմբերյան մարտական գործողությունների հետևանքով այն հետաձգվեց: Ի դեպ, մարտին կայանալիք միջոցառումը չի բացառում աշնանը «ԴիջիԹեք 2023» միջոցառման կազմակերպումը: Մյուս կարևոր իրադարձությունը մարտի 18-ին Գլենդելում «Արմաթ» լաբորատորիայի բացումն է:

Լուսինե Առաքելյան