«Փորձ է արվում հետևողականորեն սահմանափակել ազատ խոսքը». «Փաստ»

«Փաստ» օրաթերթը գրում է

Այսօրվանից «Երկիր մեդիայի» հեռուստադիտողները հեռուստաընկերության հաղորդումներին կարող են հետևել միայն կաբելային հեռարձակման միջոցով:

Հեռուստաընկերությունը զրկվել է հանրային հեռարձակումից:

«Երկիր մեդիա» հեռուստաընկերության տնօրեն Բագրատ Եսայանը «Փաստի» հետ զրույցում նշել է, որ հեռարձակման արտոնագիր չտրամադրելու որոշումն իր համար զարմանալի չէ: «Այս որոշումն այսօրվա իշխանության քաղաքական ընդհանուր գործելակերպի տրամաբանության մեջ է: Օրինակ՝ խոսվում է ազատ ընտրությունների մասին, բայց «պատահաբար» ձերբակալվում են այն համայնքների ընտրված ղեկավարները, որտեղ ընդդիմությունը հաղթել է կամ առնվազն իշխանության ներկայացուցիչը չի հաղթել: Նույն տրամաբանության մեջ են ընդդիմադիրների դեմ հարուցվող քրեական գործերը՝ ակնհայտորեն շինծու մեղադրանքներով: Նույն տրամաբանության մեջ են քաղաքական առումով օրվա իշխանությանը ձեռնտու ժամանակահատվածում պատգամավորների դեմ նախաձեռնվող քրեական հետապնդումները: 2018-ի իշխանափոխության ընթացքում ժողովրդավարական, մարդու իրավունքների, իշխանությունների ճյուղերի տարանջատման վերաբերյալ թմբկահարվող լոզունգները հետևողականորեն ոչնչացվել են. իր գործելակերպով քաղաքական իշխանությունը ցույց է տվել, որ երբեք չի եղել այդ արժեքները կրողը, և այդ հռետորաբանությունն օգտագործել է բացառապես իշխանությունը վերցնելու համար: Իրականում այս իշխանությունը ՀՀ-ին բռնապետության հաստատման ճանապարհով է տանում»,-ասաց Բագրատ Եսայանը:

Մեր զրուցակիցը նկարագրված ընթացքով է պայմանավորում նաև «Երկիր մեդիային» հեռարձակման լիցենզիա չտրամադրելու փաստը: Ինչ վերաբերում է առհասարակ ԶԼՄ-ների նկատմամբ իրականացվող քաղաքականությանը, Բագրատ Եսայանը հավելեց. «Միանշանակ է, որ այսօր լրատվական դաշտում կան ԶԼՄ-ներ, այդ թվում՝ հեռուստաընկերություններ, որոնք այլ կերպ են ներկայացնում իշխանությունների քայլերը, քան ցանկալի է իշխանություններին: Երբ վերլուծում ենք, թե ում դեմ է ուղղված հիմնական հարվածը, ինչ քայլեր են անում ԶԼՄ-ների գործունեությունը սահմանափակելու ուղղությամբ, ակնհայտ է դառնում, որ ճնշումը ոչ միայն կոնկրետ մեկ լրատվամիջոցի նկատմամբ է, այլ հետևողական է և բազմավեկտոր: Օրինակ է լրագրողների գործունեության սահմանափակումն ԱԺ-ում: Մինչդեռ, իրենց իսկ եզրույթով ասած, նախկինների օրոք նման սահմանափակումներ երբևէ չեն եղել: Եթե անգամ պատգամավորը լրագրողի նկատմամբ ոչ հարգալից կամ ոչ պատշաճ քայլ է արել, ընդհուպ մինչև ֆիզիկական բախում է եղել, հետո այդ պատգամավորները ներողություն են խնդրել լրատվամիջոցից: Իսկ այսօրվա ԶԼՄ-ների և լրագրողների գործունեության սահմանափակումներն ինստիտուցիոնալ բնույթ ունեն՝ սահմանափակվում են ԱԺ նախագահի սահմանած ինչ-որ կարգերով, օրենսդրական նախաձեռնություններով: Բազմաթիվ օրինակներ կան, որոնք ապացուցում են, որ փորձ է արվում հետևողականորեն սահմանափակել ազատ խոսքը»:

Դիտարկմանը, որ այսօրվա իշխանությունը թե՛ ընդդիմություն եղած ժամանակ, թե՛ հետո շահարկում էր 2002-ին «Ա1+» հեռուստաընկերությանը եթերից զրկելը, Բագրատ Եսայանը նշեց. ««Երկիր մեդիայի» և «Ա1+»-ի դեպքերն իրարից չեն տարբերվում: Այն բառամթերքը, որը «Ա1+»-ին լիցենզիա չտրամադրելու ժամանակ օգտագործում էր այն ժամանակվա իշխանությունը, նույն բառամթերքն օգտագործում է այսօրվա իշխանությունը: Պատճառ են բերվում ֆինանսական, նաև տեխնիկական հարցերը: Եվ ինչքան էլ այսօրվա քաղաքական իշխանությունը վարչապետի պաշտոնը զբաղեցնող անձի ղեկավարությամբ փորձի ներկայացնել, թե իրենք «տարբեր են նախկիններից, որովհետև նախկինների ժամանակ ազատ խոսք էր սահմանափակվում, «Ա1+» էր փակվում», այսօր հենց իրենք են պատմության դատաստանի առաջ արձանագրվել որպես քաղաքական իշխանություն, որը լիցենզիա չի տրամադրում իրենց ոչ հաճո արժեքներ դավանող, հանրությանն այդ արժեքները ներկայացնող հեռուստաընկերություններին»:

Ինչ վերաբերում է իրավական դաշտում հեռուստաընկերության կողմից իրականացված քայլերին, Բագրատ Եսայանը նախ նշեց, որ ավելի վաղ «Հ2» հեռուստաընկերության հայցի և միջնորդության հիմքով հինգերորդ կապուղու համար մրցույթի անցկացման արգելանք էր դրվել: «Մենք դիմել էինք Հեռուստատեսության և ռադիոյի հանձնաժողով, որ «Երկիր մեդիային» այդ կապուղու վրա հեռարձակվելու թույլտվություն տան, մինչև այդ կապուղու համար նոր մրցույթ կանկացվի, նոր հաղթող կճանաչվի: Այսօրվանից այդ կապուղով ոչինչ չի հեռարձակվելու: Մինչդեռ հանձնաժողովը մեզ մերժել է, ու մենք մեր դիմումը բավարարելու պահանջով դիմել ենք դատարան»,-ասաց նա՝ հավելելով, որ մեր զրույցից առաջ դատարանից իրեն զանգահարել են ու ասել, որ հունվարի 19-ին իրենց հայցի վերաբերյալ որոշում է կայացվել: «Միևնույն ժամանակ հայտնեցին, որ ՀՀ դատական դեպարտամենտի գործավարական համակարգը խափանվել է, ինչի պատճառով մեզ չեն կարող տրամադրել կայացված դատական որոշումը: Ասացին, որ չեն կարող տեղեկացնել նաև՝ հայցն ընդունվե՞լ է, թե՞ ոչ, միջնորդությունը բավարարվե՞լ է, թե՞ ոչ: Սա վերոնշյալ «պատահականությունների» տրամաբանության մեջ է: Այս իրողությունը ես դիտարկում եմ իշխանության կողմից դատարանների վրա ազդելու, դատարանի անկախությունը խաթարելու համատեքստում: Մենք, մեծ հաշվով, սկսել ենք ապրել ծուռ հայելիների թագավորությունում»,-եզրափակեց հեռուստաընկերության տնօրենը:

ԱՆՆԱ ԲԱԴԱԼՅԱՆ

Մանրամասները՝ «Փաստ» օրաթերթի այսօրվա համարում