Հայաստանում գործում է Մուսոլինիի ձևակերպումը՝ «մեր բարեկամներին ու ընկերներին թույլ է տրվում ամեն ինչ, օրենքները մեր հակառակորդների համար են»․ «Փաստ»

«Փաստ» օրաթերթը գրում է

Արդարադատության նախարարությունը նոր նախագիծ է ներկայացրել, որի ընդունման դեպքում քրեորեն պատժելի արարքներ են համարվելու ինքնիշխանությունից հրաժարվելուն՝ բռնություն գործադրելու կամ բռնություն գործադրելու սպառնալիքի միջոցով հօգուտ այլ պետության կամ միջազգային կամ վերպետական հանրային կազմակերպության ՀՀ ինքնիշխանությունը լրիվ կամ մասնակի սահմանափակելուն ուղղված գործողություններ կատարելը, ինչպես նաև ինքնիշխանությունից հրաժարվելուն ուղղված հրապարակային կոչերը: Ըստ իշխանությունների, նախագծի նպատակն անմիջականորեն պետության ինքնիշխանության պաշտպանությանն ուղղված քրեաիրավական միջոցների նախատեսումն է: Նշված գործողությունների համար, ըստ նախագծի, 12-15 տարի ժամկետով ազատազրկում է նախատեսվում:

«Հայաստանի Հելսինկյան կոմիտե» իրավապաշտպան հասարակական կազմակերպության նախագահ Ավետիք Իշխանյանը, անդրադառնալով նախագծին, «Փաստի» հետ զրույցում նշել է, որ այն հերթական օրենքն է լինելու, որն ընդունվելու է որպես մահակ՝ ընդդիմադիրների դեմ: Ավետիք Իշխանյանը նախագծին առնչվող երեք հանգամանք է մատնանշել: «Առաջին հերթին՝ Հայաստանն իրավական պետություն չէ, և Հայաստանի իրավապահ մարմիններ կոչվածները գործում են գործադիր իշխանության ցուցումով: Ցանկացած քրեական օրենք ոչ թե օբյեկտիվ է գործում, այլ ընդդիմադիրների դեմ: Հայաստանում գործում է Մուսոլինիի ձևակերպումը՝ «մեր բարեկամներին ու ընկերներին թույլ է տրվում ամեն ինչ, օրենքները մեր հակառակորդների համար են»: Այս օրենքն ընդունվելու է, ինչպես ընդունվեց ծանր վիրավորանքինը: Այդ օրենքները, ընդհանուր առմամբ, որպես մահակ օգտագործվում են ընդդիմությա դեմ: Այս նախագիծը, որը օրենք է դառնալու, ևս նախատեսված է կիրառել ընդդիմադիրների դեմ»,-ասաց Ա. Իշխանյանը:

Անդրադառնալով երկրորդ հանգամանքին՝ նա խոսեց վերոնշյալը կիրառելու մասին: «Ինչպե՞ս կիրառել: Շատ հետաքրքիր հարց է: Նախ՝ ի՞նչ է նշանակում Հայաստանի ինքնիշխանություն: Ձևակերպումը պետք է լինի: Օրինակ՝ եթե Հայաստանը ԵԱՏՄ, ՀԱՊԿ, ԱՊՀ, Եվրոպայի խորհրդի կամ ԵԱՀԿ անդամ է, դա որևէ կորպ խոչընդոտո՞ւմ է ՀՀ ինքնիշխանությանը, թե՞ ոչ: Էական է սա: Օրինակ՝ եթե Հայաստանի արևմտամետներն ասում են, որ Հայաստանը պետք է դառնա Եվրամիության և ՆԱՏՕ-ի անդամ, սա ինքնիշխանությանը վտա՞նգ է, թե՞ ոչ: Կամ եթե ռուսամետները ասում են, որ Հայաստանը պետք է դառնա Միութենական պետության մաս, վտա՞նգ է, թե՞ ոչ: Իմանալով այսօրվա իշխանությունների կողմնորոշումը՝ հստակ կարող եմ ասել, որ այս օրենքը կօգտագործվի, օրինակ՝ նույն Միութենական պայմանագրի կողմնակիցների դեմ: Կամ ցանկացած մեկը, որը կասի, որ, օրինակ՝ ռուսական ռազմաբազան պետք է մնա ՀՀ-ոմ, այդ օրենքը ևս կարող են օգտագործել այդ անձի դեմ: Միևնույն ժամանակ ՆԱՏՕ-ի անդամ դառնալու, ամերիկյան զորախումբ, տարբեր դիտորդներ բերելու կոչերը այդ օրենքի տեսանկյունից անարձագանք կմնան»,-նշեց Ա. Իշխանյանը:

Անդրադառնալով երրորդ հանգամանքին, նա մինչ այս արված մի շարք հայտարարություններ օրինակ բերեց, որոնց պետք է հետևեին մեղադրանքներ: «Եթե Հայաստանը լիներ իրավական պետություն, ապա այդ օրենքի կարիքը չէր լինի, քանի որ Սահմանադրությամբ շատ հարցեր արդեն իսկ կարգավորվում են: Հիշենք, որ, օրինակ՝ վարչապետ կոչեցյալն ասում էր՝ «ձյունածածկ տարածքների համար կռիվ չպետք է անեն»: Իրավական պետություն լինելու դեպքում այս և նման այլ բարբաջանքների համար արդեն մեղադրանքներ պետք է առաջադրված լինեին: Հիշենք նաև հայտարարությունը, թե «Գորիս-Կապան ճանապարհը Հայաստանի տարածքում չէ»: Մի պատգամավոր էլ ասում էր՝ բանակը ոչ թե հողերը, այլ մարդկանց պաշտպանելու համար է: Եթե իրավական պետություն լիներ Հայաստանը, բոլորին մեղադրանքներ պետք է առաջադրվեին, կամ առնվազն նրանք բարձր պաշտոն չէին ունենա»,-եզրափակեց մեր զրուցակիցը:

ԱՆՆԱ ԲԱԴԱԼՅԱՆ

Մանրամասները՝ «Փաստ» օրաթերթի այսօրվա համարում