«Անվտանգության հետ կապված անորոշությունը բացասական ազդեցություն է ունենում զբոսաշրջության ոլորտի վրա». «Փաստ»

«Փաստ» օրաթերթը գրում է

«Տուրիզմի հայկական ֆեդերացիայի» նախագահ Մեխակ Ապրեսյանն ասում է՝ Ադրբեջանի կողմից սեպտեմբերյան հանցավոր ագրեսիան իր բացասական ազդեցությունն ունեցավ զբոսաշրջության ոլորտի վրա: «Տարածաշրջանում անկայուն, սահմաններին պատերազմական վիճակն անպայման էական բացասական ազդեցություն է ունենում: Պոտենցիալ զբոսաշրջիկներն ավելի զգուշավոր են դառնում, շատերն իրենց պլանավորած այցելությունները չեղարկում են, հատկապես, երբ դա զուգորդվում է նաև իրենց երկրների իրավասու մարմինների հայտարարություններով, որ խորհուրդ չեն տալիս կոնկրետ վայրեր այցելել: Մեր երկրում օտարերկրյա դիվանագիտական շատ ներկայացուցչություններ իրենց քաղաքացիներին խորհուրդ չէին տալիս այցելել հատկապես Վայոց ձորի, Սյունիքի, Գեղարքունիքի և Տավուշի մարզեր: Հիմա այցելությունները, կարծես թե, քիչ-քիչ վերականգնվում են, իհարկե, քանակը չենք կարող բավարար ու ցանկալի համարել: Ավելի շատ գալիս են անհատական այցելություններով, խմբային կազմակերպված այցելությունները դեռ շատ քիչ են»,-«Փաստի» հետ զրույցում նշում է նա:

Չնայած սահմանային լարվածություններին, Հայաստանը շարունակում է զբոսաշրջային ցանկալի ուղղություն մնալ հատկապես ռուս զբոսաշրջիկների համար: Ֆեդերացիայի նախագահը սրան նպաստող մի քանի գործոն է առանձնացնում: «ՌԴ-ն տարիներ շարունակ եղել և մնում է մեր հիմնական շուկան: Մինչև համավարակն ու պատերազմը մեր ներգնա զբոսաշրջային այցելությունների շուրջ 40-45 տոկոսը կազմել են ՌԴ-ից այցելությունները: Այսօր ևս այս միտումը պահպանվում է: Համավարակից հետո աշխարհում զբոսաշրջությունը սկսեց վերականգնվել, ճանապարհորդությունների սահմանափակումները վերացան: ՌԴ-ի հետ մեր սահմանային անցման գործընթացները, մեր վիզային ռեժիմը և այլն, շատ ավելի պարզ էր՝ ի տարբերություն այլ երկրների. նրանց անվտանգային միջոցառումներն ավելի խիստ էին և այլն: Ուստի ՌԴ-ի արտագնա և մեր ներգնա տուրիզմի համար խոչընդոտներ չկային: Եվրոպական, արևել յան և մյուս երկրների դեպքում դեռ կային համավարակով պայմանավորված սահմանափակումներ, այդ իրավիճակում ՌԴ-ից այցելությունները բավականին ակտիվ էին: Հետո մեզ մոտ մեկ այլ խնդիր առաջացավ՝ դոլարի ու եվրոյի նկատմամբ դրամի խիստ արժևորումը: Սա զգալիորեն թանկացրեց դոլարով ու եվրոյով վճարող շուկաներից Հայաստան այցելությունները: Այդ շուկաներում հայկական զբոսաշրջային արդյունքի գինը շուրջ 30 տոկոսով թանկացավ: Ռուսաստանի հետ կապված նման խնդիր չեղավ»,-հավելում է մեր զրուցակիցը:

Զբոսաշրջային ոլորտը վերջին տարիներին անընդհատ վայրիվերումների մեջ է: Առկա անորոշությունը խանգարող գործոն է ոլորտի համար: Մեր զրուցակիցը հիշեցնում է՝ նույնիսկ համավարակի ժամանակ մեր գործարարները ձեռքները ծալած չէին նստում, նոր ծրագրեր էին մշակում և կյանքի կոչում: «Հիմա էլ լավատեսությունը պահպանում են, սակայն անվտանգության ու տարածաշրջանային զարգացումների հետ կապված անորոշություններն իրենց բացասական ազդեցությունն ունենում են: Դրանք բացասական են անդրադառնում ներդրումային միջավայրի, օտարերկրյա ներդրումների ներգրավման և, իհարկե, տնտեսական զարգացման վրա: Թող մեկ-երկու ծրագիր էլ հետ ընկնի, առաջնահերթ պետք է լուծենք պաշտպանունակության և անվտանգության հարցը»,-եզրափակում է Մեխակ Ապրեսյանը:

Ընդգծում է` հոկտեմբերը բավականին ակտիվ շրջան է, և, եթե չլինեին մոբիլիզացիայով պայմանավորված այցելությունները, գուցե ՌԴ-ից ավելի շատ այցելություններ ունենայինք` հանգստի, զվարճանքի և այլ նպատակներով: «Տարբեր ուղղություններով այսօր ՌԴ քաղաքացիների դեպքում սահմանափակումներ կան, այս պարագայում ևս Հայաստանն իրենց համար գրավիչ է: Մոբիլիզացիայի հետևանքով ավիատոմսերի գները բավականին բարձրացան, եթե դա չլիներ, ավելի շատ հենց հանգստի համար զբոսաշրջիկներ կընդունեինք ՌԴ-ից, ինչն ավելի օգտակար կլիներ: Առհասարակ ցանկացած երկրի զբոսաշրջիկ իրեն շատ լավ է զգում Հայաստանում, չկա որևէ խտրականություն մարդկանց հանդեպ»,-նշում է նա:

ԼՈՒՍԻՆԵ ԱՌԱՔԵԼՅԱՆ

Մանրամասները՝ «Փաստ» օրաթերթի այսօրվա համարում