«Մեր դեպքում խաղաղության համար մի կողմ կա, որը խաղաղության օրակարգ է հորինել ու առաջնորդվում է դրանով». «Փաստ»

«Փաստ» օրաթերթը գրում է

Ադրբեջանի զինված ուժերը ՀՀ ինքնիշխան տարածքի նկատմամբ ռազմական գործողություններ են սկսկել՝ հրետակոծման ենթարկելով Սոթքի, Վարդենիսի, Գորիսի, Կապանի, Արտանիշի և Իշխանասարի ուղղությամբ տեղակայված դիրքերը: Հարվածներ են հասցվում նաև քաղաքացիական ենթակառուցվածքներին: Հայկական կողմն ունի զոհեր և վիրավորներ: «Ռազմինֆո» կայքի վերլուծաբան Ռոբերտ Նազարյանի հետ վերլուծել ենք թշնամու գործողությունները, խոսել նաև տեղեկատվական դաշտում առկա պատերազմի, տեղեկատվական հոսքերի մասին:

«Մինչև պատերազմական գործողություններ սկսելը թշնամին տեղեկատվական դաշտում ռազմական գործողություններ սկսելու հող էր նախապատրաստում, ինչը նորություն չէ իրենց դեպքում: Նման մարտավարություն թշնամին դրսևորել է թե՛ 44- օրյա պատերազմից, թե նաև 2016 թ. Ապրիլ յան պատերազմից առաջ: Բայց, ի տարբերություն Ապրիլ յան պատերազմից առաջ կամ ավելի վաղ ժամանակահատվածներում կիրառվող նման մարտավարությունների, այս դեպքում մեր կողմից ինֆորմացիոն դաշտում համարժեք պատասխան, ցավոք, չկար»,- «Փաստի» հետ զրույցում նման կարծիք է հայտնել Նազարյանը:

Խոսելով արդեն ռազմական գործողությունների մասին՝ նա շեշտեց. «Նախ՝ իմ կարծիքով, մասշտաբային առումով պատերազմական այս գործողություններն Ապրիլ յան պատերազմից անցել են: Հաշվի առնենք նախ ուղղությունները, որտեղ ընթանում են պատերազմական գործողությունները: Դրանք Հայաստանի Հանրապետության տարածքում գտնվող այն ուղղություններն են, որտեղ թշնամին ավելի քան մեկուկես տարի է՝ ամրացել էր ու արժանի պատասխան չէր ստացել: Դրանով իսկ պատերազմական գործողությունների համար թշնամին բարենպաստ դիրքային պայմաններ ուներ: Մասնավորապես թե՛ Իշխանասարում, թե՛ Գեղարքունիքի մարզում՝ Վերին Շորժայում, հիշենք, որ դիրքային առաջխաղացումներ ունեին: Մյուս կողմից՝ մենք նկատում ենք, որ թշնամին այս անգամ օգտագործում է իր նոր՝ պատերազմից հետո ձևավորած ստորաբաժանումները: Այս ամենը համադրելով՝ թշնամու նպատակներից մեկը հետևյալն է. կարծելով, որ մաքսիմալ խոցելի շրջանում ենք մենք, մեզանից կարելի է խլել առավելագույնը»:

Նշված համատեքստում անդրադառնալով լայնածավալ ռազմական գործողություններին նախորդած բանակցային գործընթացին՝ նա շեշտեց. «Մի հայտնի բանաձև կա՝ «պատերազմի համար մի կողմ է պետք, խաղաղության համար՝ երկու կողմ»: Մեր դեպքում խաղաղության համար մի կողմ կա, որը խաղաղության օրակարգ է հորինել ու առաջնորդվում է դրանով: Խոսքը ՀՀ գործող իշխանությունների մասին է, որոնք, իմ կարծիքով, չեն ներկայացնում Հայաստանի Հանրապետության շահերը: Թշնամին թե՛ 44-օրյա պատերազմից առաջ, թե՛ 44-օրյա պատերազմից հետո ո՛չ բանավոր խոսքում, ո՛չ գործնականում ու ո՛չ էլ գործողություններում երբեք չի թաքցրել իր հետագա պատերազմական նկրտումները: Ավելին, պատերազմական նկրտումների ու հավակնությունների մասին խոսելիս՝ մինչև անգամ «Երևան է հասնում»: Այստեղ որևէ խաղաղության օրակարգի կամ գործընթացի մասին խոսք լինել չի կարող, որովհետև այդ խաղաղությունը հորինված, կեղծ օրակարգ է, որը փորձում են փաթաթել մեզ վրա»:

Դիտարկելով այս փուլում ռազմաքաղաքական հատվածի պատրաստվածության հարցն ու խոսելով զուտ երևացող իրողությունների մասին՝ Ռ. Նազարյանը առանձնացրեց տեղեկատվական դաշտը: «Տեղեկատվական դաշտում էլի պատրաստ լինելու խնդիր կար: Պատրաստ չէին, որովհետև մենք կրկին տեսնում ենք նույն ինֆորմացիոն վակուումը, որտեղ չկա համակարգված պետական ինֆորմացիոն քաղաքականություն: Փոխարենը կան ինչ-որ Տելեգրամյան ալիքներ, ինչ-որ Youtube-յան անանուն ալիքներ, որոնք տեղեկություններ են փոխանցում, որոնց մի մասը կեղծ է, մի մասը՝ ճիշտ: Համենայն դեպս մասնագետը դրանց վրա պետք է ժամանակ ծախսի, հասկանա՝ ճիշտ է, թե ոչ, իսկ սովորական քաղաքացին, որը չունի բավարար մասնագիտական գիտելիքներ, ստանալու է այն քարոզչական թեզերը, որ իրեն հրամցնում են նշված ալիքները»,ասաց մեր զրուցակիցը:

Իսկ թե ինչպես վարվել այս դեպքում, նա հավելեց. «Ես տարիներ առաջ կասեի՝ հետևեք պաշտոնական լրահոսին, հիմա, բնականաբար, նման բան չեմ ասի, բայց մարդիկ պետք է զգոն լինեն, պետք է մաքսիմալ քիչ էմոցիոնալ լինեն, թեպետ դա այդքան հեշտ չէ. բոլորն էլ ռազմաճակատում ազգական, հարազատ ու բարեկամ ունեն, բայց պատերազմ է, ու այն բավականին սառնասրտություն է պահանջում: Մեր քաղաքացիներին միակ օգտակար խորհուրդս այն կլինի, որ ցանկացած տեղեկատվություն հնարավորինս ստուգեն և նոր հավատան կամ տարածեն»:

ԱՆՆԱ ԲԱԴԱԼՅԱՆ

Մանրամասները՝ «Փաստ» օրաթերթի այսօրվա համարում