Նվեր-տուփեր՝ Արցախում ծնվող նորածինների համար

«Աննա Աստվածատուրյան» հիմնադրամի «ՍերԱրցախ» ծրագիրն ուղղված է Արցախում նորածին երեխաներ ունեցող ընտանիքների աջակցությանը: Նորածինների համար տուփեր պատրաստելու գաղափարը Աննա Աստվածատուրյան Թերքոթի մոտ առաջացել է վեց տարի առաջ: «Կարդում էի Ֆինլանդիայի մասին, այնտեղ պետությունը օգտակար պարագաներով տուփեր է պատրաստում նորածինների համար: Վաղուց ուզում էի նման ծրագիր իրագործել Արցախի համար: Հիմա ճիշտ ժամանակն է: Ցանկանում ենք աջակցել նորածիններին՝ հոգեպես և, իհարկե, ֆինանսապես՝ այս նվերների տեսքով: Գաղափարն ունեի, բայց ինչի՞ց սկսել: Նախ՝ զրուցեցի ընկերուհիներիս հետ, որոնք երեխաներ ունեն, և հարցրեցի՝ ի՞նչ կցանկանայիք տեսնել նման նվեր-տուփի մեջ: Այսպես կազմվեց անհրաժեշտ իրերի ցանկը, հետո արդեն երկրորդ հարցն առաջացավ՝ ո՞ւմ հետ աշխատել, ինչպե՞ս կազմակերպել ամենը: Ծանոթացա տեղական ընկերությունների հետ, մասնավորաբար սկսեցինք համագործակցել «Լալունց» հագուստի արտադրական ընկերության, «Թեոֆարմա» դեղատների ցանցի, փայտե խաղալիքներ պատրաստող «Play Artsakh»-ի և երեխաների համար փափուկ գրքեր պատրաստող «Թմբլիկ» ընկերության հետ: Այդ գրքերը միասին ենք գրել՝ հայրենիքի և թռչնակի՝ մեր նախագծի խորհրդանիշի թեմայով: Հավաքված տուփը օգնություն չէ, այն նվեր է Արցախի նորածիններին»,-ասում է «Աննա Աստվածատուրյան» հիմնադրամի նախագահ Աննա Աստվածատուրյան Թերքոթը:

Նա բնակվում է ԱՄՆ-ում և անընդհատ Հայաստանում ու Արցախում լինել և կազմակերպչական հարցերով զբաղվել չի կարող: Այստեղ օգնության է գալիս Լիլիան Գալստյանը՝ Հայաստանում հիմնադրամի ներկայացուցիչը: Նա կապ է պահպանում բոլոր ընկերությունների հետ, կազմակերպում տուփերի հավաքումը և տեղափոխումը Արցախ, իսկ այնտեղ արդեն հիմնադրամի ներկայացուցիչը կազմակերպում է նվեր-տուփերի տեղափոխումը ծննդատներ, արդյունքում դրանք հասնում են նորածիններին: Աննա Աստվածատուրյանն օրերս եղել է Արցախում, մի շարք հանդիպումներ ունեցել այն մարդկանց հետ, որոնք աշխատում են տարբեր, այդ թվում՝ «Սեր Արցախ» ծրագրի վրա: «Արցախում խնդիրները շատ են, դրանցից են փախստականներին տներով, մարդկանց աշխատանքով ապահովելու հարցերը, նրանց, ովքեր ամեն ինչ են կորցրել Արցախի տարբեր բնակավայրերում: Եվ ամենակարևորը՝ Արցախն ուզում է հասկանալ, թե ինչ է լինելու ապագայում: Ցավոտ է մարդկային կյանքերի և տարածքների կորուստը, բայց մարդիկ չեն կարողանում ապագայի պլաններ կազմել: Սփյուռքի համար խնդիր է տեղեկատվական վաակումը, մեզ հիմնականում հասնում է այն տեղեկատվությունը, երբ կրակում են, երբ գազն են անջատում: Բայց քիչ է տեղեկատվությունն այն մասին, թե ինչ է կառուցվում, ինչ փոփոխություններ են տեղի ունենում և այլն: Շատերը տարբեր պատճառներով չեն կարողանում այցելել Արցախ և տեղում հասկանալ իրավիճակը: Նաև նման նախագծերի շնորհիվ փորձում եմ պատմել Արցախի մասին, այն մասին, որ այնտեղ մարդիկ շարունակում են ապրել, բայց դրան զուգահեռ նրանք խնդիրներ ունեն, պետք է հասկանանք, թե ինչպես օգնենք նրանց, ընդ որում՝ ոչ միայն պատերազմի ժամանակ օգնենք ու հետո մոռանանք, այլ միշտ ուշադրության կենտրոնում պահենք Արցախը»,-հավելում է հիմնադրամի նախագահը:

«Սեր Արցախ» ծրագրի խորհուրդն է արժևորել պատմական հողի վրա ընտանիքներ կազմելու և երեխաների ապագան այստեղ կերտելու դերն ու կարևորությունը: Նախագիծը մեկնարկել է հունիսի 1-ին՝ Երեխաների պաշտպանության միջազգային օրը՝ ի նշան 2020 թ.-ի Արցախյան 44-օրյա պատերազմից հետո ծնված և իրենց հայրենի հողին նոր կյանք տվող երեխաներին պաշտպանելու անհրաժեշտության և պատասխանատվության։ «Սեր Արցախ» ծրագրի շրջանակներում Արցախի ծննդկան մայրիկներին տրամադրվող նվեր-տուփերի մեջ ներառված պարագաները՝ գիշերանոցը, քնապարկը, սրբիչները, վերմակը, խնամքի հիմնական պարագաները (անձեռոցիկներ, մանկական շամպույն, ջերմաչափ և ծծակ), ծննդկանի համար նախատեսված հիգիենայի պարագաները, ինչպես նաև Հայաստանում անհատական պատվերով նախագծված փափուկ մանկական գրքերը և փայտե անիվներով խաղալիքները պատրաստվում են Հայաստանում և Արցախում: Արցախում հոգատարությամբ հավաքվում և ուղարկվում են ծննդատներ՝ սպասելու հերթական բալիկի ծննդյան պահին:

Լուսինե Առաքելյան