ԵՊՀ նախապատրաստական դասընթացներին կարող են մասնակցել և՛ տեղացիները, և՛ օտարերկրացիները. «Փաստ»

«Փաստ» օրաթերթը գրում է

Երևանի պետական համալսարանում գործում են նախապատրաստական դասընթացներ, որոնք միտված են դիմորդներին և աշակերտներին բուհ ընդունվելու համար նախապատրաստելուն: Դասընթացների բաժնի վարիչ, բանասիրական գիտությունների թեկնածու, դոցենտ Արշալույս Գալստյանն ասում է` ժամանակին համալսարանն ուներ զրո կուրս, որը բովանդակային առումով նույնն էր, ինչ այս դասընթացները:

«Վերջին 15-20 տարվա ընթացքում Հայաստանում ընդունելության քննությունները միասնական դարձան, կազմակերպվում են Գնահատման և թեստավորման կենտրոնի կողմից: Այդ ժամանակվանից սկսած համալսարանում արդեն կազմակերպվել են նախապատրաստական դասընթացներ: Որքան հիշում եմ, գոնե վերջին երեսուն տարում ԵՊՀ-ն այդ դասընթացներն ունեցել է, ուղղակի այս տարիների ընթացքում որոշակի կազմակերպչա-իրավական ձևափոխումներ են եղել, որոնք պայմանավորված են եղել դիմորդների` ընդունելության քննություններին մասնակցելու ձևաչափի փոփոխությամբ»,«Փաստի» հետ զրույցում ասում է Գալստյանը:

Ընդգծում է` նախապատրաստական դասընթացներին գրանցվում են ավարտական դասարանների աշակերտներ և արդեն դպրոցն ավարտած շրջանավարտներ, բոլոր նրանք, ովքեր նպատակ ունեն հաջորդ ուստարում դիմելու բուհերի համապատասխան մասնագիտություններով: «Ըստ էության` դասընթացները նույն պարապմունքներն են, որոնք դիմորդը նախընտրում է կրկնուսույցի, ուսուցչի, դասախոսի մոտ պարապելուց: Պարզապես այս դեպքում դրանք անհամեմատ ավելի մատչելի են, կազմակերպվում են ԵՊՀ-ում, այստեղ է կատարվում նաև վճարումը: Ապագա ուսանողների հետ պարապում են ԵՊՀ այն դասախոսները, որոնք դիմորդների հետ աշխատելու փորձ ունեն, ներգրավված են շտեմարանների կազմման աշխատանքներում, ծանոթ են ընդունելության կարգերին, այլ կերպ ասած` գրանցվելով նախապատրաստական դասընթացներին, դիմորդը հոկտեմբերի մեկից մինչև մայիսի 31-ը ԵՊՀ-ում հանրակրթական իր նախընտրած առարկայի ընդունելության ծրագիրն ուսումնասիրում է ամբողջությամբ` պատրաստ լինելով արդեն հունիսին կազմակերպվող միասնական քննություններին: Յուրաքանչյուր առարկայից դիմորդը շաբաթական մասնակցում է երկու պարապմունքի` յուրաքանչյուրը մեկ ժամ 30 րոպե տևողությամբ: Մեզ մոտ հիմնականում գրանցվում են մայրաքաղաքի և հարակից շրջանների դիմորդներ, ուստի դասերը կազմակերպվում են ժամը երեքից վեցի միջակայքում, որպեսզի նրանք դպրոցից հետո կարողանան մասնակցել պարապմունքներին»,-նշում է մեր զրուցակիցը:

Տարբերակված է, սակայն, օտարերկրացիների համար ուսուցումը: «Աշխարհագրությունը բավականին լայն է, շատ ուսանողներ ունենք Չինաստանից, Իրանից, Ճապոնիայից, Իտալիայից: Նրանց դեպքում նախապատրաստական դասընթացներին դիմելու կարգը մի փոքր այլ է, նախապես դիմում են ԿԳՄՍ նախարարության Սփյուռքի բաժին, այնտեղ գրանցվում, ստանում ուսանողի կարգավիճակ, այնուհետև արդեն հրամանագրված փաստաթղթերն ուղարկվում են համալսարան, և նրանք ուսումնառության ութ ամսվա ընթացքում ուսումնասիրում են հայերեն, հունիսին արդեն պատրաստ լինելով ուսումը շարունակել մայր բուհի կամ բակալավրիատում, կամ մագիստրատուրայում»,-ասում է ԵՊՀ նախապատրաստական դասընթացների բաժնի վարիչը: Նշում է` դասընթացների առարկաների հանդեպ հետաքրքրությունը պայմանավորված է հենց այն մասնագիտություններով, որոնց դիմում են:

«Նորություն չեմ ասի, որ մի շարք մասնագիտություններ շարունակում են մնալ առաջին շարքերում, խոսքն իրավագիտության, ինֆորմատիկայի և կիրառական մաթեմատիկայի, տնտեսագիտության բլոկի մասնագիտությունների մասին է: Դիմորդներն էլ ավելի հակված են պարապելու այդ մասնագիտությունների ընդունելության համար անհրաժեշտ հայոց լեզու, պատմություն, օտար լեզու, մաթեմատիկա առարկաները: Ցավոք, հետաքրքրությունը նվազում է բնագիտական թևի` քիմիա, կենսաբանություն, ֆիզիկա մասնագիտությունների նկատմամբ»,-հավելում է մեր զրուցակիցը:

Տարիների ընթացքում նաև վիճակագրություն են իրականացնում` հասկանալու համար, թե դասընթացների մասնակիցներն ինչ հաջողություններ են գրանցել քննությունների ժամանակ: «Բնականաբար, կազմում ենք վիճակագրություն, որովհետև նախապատրաստական դասընթացները վճարովի ծառայություն են, իսկ ցանկացած վճարովի ծառայություն որոշակի վերջնարդյունք է ենթադրում: Դիմորդների դեպքում այդ վերջնարդյունքը բուհեր ընդունվելն է:

Այս տարվա համար դեռ վիճակագրություն չենք կատարել, քանի որ քննաշրջանն ընթացքի մեջ է, բայց նախորդ բոլոր տարիների վիճակագրության համաձայն` ունենք դիմորդների 90 տոկոսից ավելի շարժ, որոնք հաջողությամբ հաղթահարում են ընդունելության քննությունների շեմը և ընդունվում ինչպես ԵՊՀ, այնպես էլ այլ բուհեր: Նաև մինչև այս տարի ԵՊՀ-ի նախապատրաստական դասընթացներին մասնակցածներն ունեցել են արտոնություն հեռակա բաժնի համար: Այն դիմորդները, որոնք մեզ մոտ պարապել են, ավարտել և ստացել հավաստագիր, համապատասխան արտոնության կետով ունեցել են լրացուցիչ հնարավորություն առկա քննությունների ձախողման կամ իրենց չընտրած, ոչ ցանկալի մասնագիտությամբ ընդունվելու դեպքում դիմել ԵՊՀ հեռակա բաժին` իրենց նախընտրած մասնագիտության գծով»,-եզրափակում է Արշալույս Գալստյանը:

ԼՈՒՍԻՆԵ ԱՌԱՔԵԼՅԱՆ

Մանրամասները՝ «Փաստ» օրաթերթի այսօրվա համարում