Ե՞րբ կավարտվեն Սիսիանի պանթեոնում շիրմաքարերի տեղադրման և բարեկարգման աշխատանքները. «Փաստ»

«Փաստ» օրաթերթը գրում է

Այս տարվա մայիսի 21-ին 44-օրյա պատերազմում զոհված և Սիսիանի պանթեոնում հուղարկավորված 65 զինծառայողների հարազատները ստորագրահավաք էին նախաձեռնել, որով պահանջում էին Սիսիանի համայնքապետարանից 65-օրյա ժամկետում իրականացնել պանթեոնի բարեկարգումը և շիրմաքարերի տեղադրումը։ Նշել էին, որ «Սիսիան համայնքի եղբայրական պանթեոնը միակն է ողջ հանրապետությունում, որտեղ մինչ օրս 44-օրյա պատերազմում զոհված հերոսների շիրմաքարերը տեղադրված չեն»։

Ստորագրահավաքից մի քանի օր անց տարածքային կառավարման և ենթակառուցվածքների նախարարությունը համապատասխան նախագծով առաջարկեց պետբյուջեի պահուստային ֆոնդից 77,5 մլն դրամ տրամադրել զոհված զինծառայողների տապանաքարերի տեղադրման համար։

«Սիսիանի համայնքապետարանի ներկայացրած տեղեկատվության համաձայն՝ 44-օրյա պատերազմում զոհված և Սիսիանի պանթեոնում հուղարկավորված 64 զինծառայողի, և 2020 թ.-ին Տավուշի մարզում զոհված 1 զինծառայողի, ինչպես նաև Սիսիանի գերեզմանատանը հուղարկավորված 2 զինծառայողի շիրմաքարերը տեղադրված չեն, իսկ զինծառայողների ընտանիքներին գերեզմանների բարեկարգման, տապանաքարերի պատրաստման և տեղադրման համար հատուցման գումարներ չեն տրամադրվել, ուստի խնդիր է առաջացել վերոհիշյալ 67 զոհված զինծառայողների տապանաքարերի պատրաստման և տեղադրման հարցում։ Հատկացվելիք գումարով պատրաստվելու և տեղադրվելու է 67 տապանաքար։ Մեկ միավորի համար (սև գրանիտե շիրմաքարերն իրենց լրակազմերով) հիմք է ընդունվել ՊՆ-ի կողմից Երևանի «Եռաբլուր» զինվորական պանթեոնի համար ձեռք բերված մեկ միավորի արժեքը»,նշված էր համապատասխան նախագծում:

Դեռ օրեր առաջ «Փաստին» դիմել էին զոհվածների հարազատները: Նրանք նշել էին, որ տեղյակ են գումարի հատկացման որոշման մասին և սպասում են դրա կյանքի կոչմանը: Մեզ հետ զրույցում նրանցից մեկը նշել էր. «Խնդիրը հետևյալն է, որ պանթեոնն առհասարակ խնամքի, հոգածության կարիք ունի: Այնտեղ հուղարկավորված են Արցախյան, Ապրիլյան և 44-օրյա պատերազմների մեր նահատակները: Եթե մի պահ չքննարկենք անգամ շիրմաքարերի հարցը, ամբողջ պանթեոնը պարբերական խնամքի կարիք ունի: Ծնողներն ու հարազատներն ամեն անգամ այցելելիս մաքրում են տարածքը խոտից, փշերից ու փոշուց, բայց ընդհանուր բարեկարգում պետք է լինի»:

Ի դեպ, դա ակնհայտ էր անգամ լուսանկարները նայելիս: Ինչպես հարազատներն էին նշում, անձնական միջոցներով փոքրիկ հուշաքարեր են տեղադրել, որոնք պետք է ժամանակավոր լինեին, իսկ հետո տեղադրվելու էին միանման շիրմաքարեր, որոնց ձևի, քարի տեսակի մասին պետք է խորհրդակցեին ծնողների ու հարազատների հետ, նրանց ցանկությամբ բոլոր նահատակների շիրմաքարերը պետք է միանման լինեին: Պատերազմի ավարտից անցել է 1 տարի վեց ամիս, իսկ Սիսիանի պանթեոնի անխնամ վիճակն, ըստ զոհվածների հարազատների, միայն ցավ ու ափսոսանք է առաջացնում:

«Հաճախակի ենք լինում պանթեոնում, մաքրում տարածքը, որ փշերն ու խոտը տղերքին չծածկեն: Պանթեոնը սրբավայրին հավասարազոր վայր է, և նման անուշադրությունն ուղղակի անթույլատրելի է: Ընդ որում, քիչ թե շատ բարեկարգ է պանթեոնի ներքևի հատվածը, բայց վերևի մասը, որտեղ տասը զոհերից ավելի են հուղարկավորված, բացարձակ անխնամ վիճակում է»,-հավելել էր մեր զրուցակիցը:

Սիսիանի համայնքապետարանից «Փաստի» հետ զրույցում ասացին, որ գումարը կառավարությունից փոխանցվել է պաշտպանության նախարարությանը, իսկ այնտեղից էլ՝ համայնքապետարանին: «Կառավարությունը համաձայնություն տվեց, որպեսզի մեկ անձից գնում կատարվի` գործընթացն արագացնելու նպատակով: Այս որոշումը շատ կօգնի ժամկետների առումով, քանի որ միայն երեսուն օր պետք է մրցույթ հայտարարվեր: Այս պահին ակտիվ քննարկումների մեջ ենք քարերի տեսակների և այլ հարցերի վերաբերյալ: Սիսիանում խնդիրը եղել է հետևյալը. նախքան սա, մի քանի անգամ հանրային քննարկումներ են կազմակերպվել, սակայն ծնողների հետ ընդհանուր հայտարարի գալ չէր հաջողվում, և շիրմաքարերի տեղադրման ուշացման հիմնական պատճառը դա է եղել: Սա քաղաքային պանթեոն է, համայնքի ղեկավարի պաշտոնակատարը ցանկանում էր մի ընդհանուր հայտարարի գալ բոլորի հետ, և շիրմաքարերը լինեին միանման: Կարծես թե, բանակցությունների, քննարկումների արդյունքում, ի վերջո, ստացվել է գալ համաձայնության, չնայած կան բողոքող ծնողներ, որոնք թվով քիչ են, ուստի ամեն ինչ կարվի այնպես, ինչպես ցանկանում է մեծամասնությունը»,-«Փաստի» հետ զրույցում փոխանցեցին համայնքապետարանից:

Ժամկետների հետ կապված նշում են, որ ամեն ինչ արվելու է, որ թե՛ շիրմաքարերի տեղադրումը, թե՛ պանթեոնի բարեկարգման աշխատանքներն ավարտվեն մինչև սեպտեմբերի 27-ը` 44-օրյա պատերազմի տարելիցը:

«Պանթեոնը բավականին փոքր է եղել, մեր բյուջեի միջոցներով կատարվել են բարեկարգման աշխատանքներ, տարածքը, ցավոք, մեծացել է: Պետք է տեղադրվեն շիրմաքարերը, և ընդհանուր տարածքը բարեկարգվի: Հուսով ենք տեղավորվել նշված ժամանակահատվածում»,-եզրափակեց մեր զրուցակիցը:

ԼՈՒՍԻՆԵ ԱՌԱՔԵԼՅԱՆ

Մանրամասները՝ «Փաստ» օրաթերթի այսօրվա համարում