Հայաստանը ներկայացնող ալբոմային գրականության անհրաժեշտություն կա
ОБЩЕСТВОՊետական պատվերի և աջակցության շրջանակում 2016 թվականին կհրատարակվի Հայաստանի անկախության 25-ամյակին նվիրված, ինչպես նաև ալբոմատիպ գրականություն: Այս մասին լրագրողների հետ զրույցում նշեց ՀՀ մշակույթի նախարարի տեղակալ Ներսես Տեր-Վարդանյանը:
«Յուրաքանչյուր տարի աջակցում ենք 100-ից ավելի գրքերի տպագրության: Օժանդակությունը տրամադրվում է ըստ առաջնահերությունների: Ուղղությունների մեջ ներառված են և' ժամանակակից գրողներ, և' հայ դասականներ, և' այդ տարվա կարևորագույն թեմային առնչվող գրականությունը: 2015-ին հատուկ շեշտադրում կար Հայոց ցեղասպանության տարելիցին նվիրված գրականությանը: Այսօր երկիրը ներկայացնող ալբոմային գրականության անհրաժեշտություն կա»,-«Արմենպրես»-ի փոխանցմամբ`նշեց Ներսես Տեր-Վարդանյանը:
Նախարարի տեղակալը շեշտեց, որ ոլորտում 2016-ի համար ընդլայնվելու է պետական աջակցության ծրագիրը`ի հաշիվ պետպատվերի: «Հիմնական նպատակն այն է, որ աջակցության շնորհիվ գրահրատարակիչները կարողանան ավելի մատչելի, հասանելի դարձնել ընթերցողներին գիրքը: Մյուս կողմից`ունենք պետական ներքին և արտաքին քարոզչության համար ստեղծվելիք և անհրաժեշտ գրականության խնդիր, որը ալբոմային գրականության միջոցով ևս պետք է լուծենք:Հաջորդ տարի հրատարակվելու է Հայաստանին նվիրված ալբոմ, անկախության 25-ամյակին նվիրված գիրք, կունենանք մեր մեծերին նվիրված շարք, այդ թվում`Արտավազդ Փելեշյանի մասին պատմող ալբոմային գիրք: Որոշվել է թվայնացնել Հրանտ Մաթևոսյանի անտիպ ստեղծագործությունները»,-շեշտեց նա:
ՀՀ մշակույթի նախարարի տեղակալն ընդգծեց, որ հատուկ ուշադրություն է դարձվում նաև թարգմանական գրականության հրատարակման`օտար լեզուներից հայերեն, հայերենից`այլ լեզուներ թարգմանությունները:
Նա տեղեկացրեց, որ այս տարի հրատարակվել են բազմաթիվ թարգմանական ստեղծագործություններ, այդ թվում`աշխարհի մի շարք երկրներում Հայոց ցեղասպանությանը նվիրված գրքեր են լույս տեսել:
Ներսես Տեր-Վարդանյանը հատուկ շեշտեց, որ այս տարի երկու անգամ տեղի է ունեցել «Գրական տապան» փառատոնը, և այն հյուրընկալել է բազմաթիվ հյուրերի տարբեր երկրներից: Նա նաև առանձնացրեց ArmBookExpo երկրորդ ցուցահանդեսը`նշելով, որ ցուցահանդեսին ներկայացվել է հայկական թեմայով Հայաստանում և արտասահմանում հրատարակված գրականություն:



