Tech for Good․ խոշորագույն բիզնես կենտրոններից մեկն արևայնացվեց

ОБЩЕСТВО 4 Март, 2022 14:00

Փետրվարի վերջին Սիներջի Բիզնես կենտրոնում տեղի ունեցավ Արևային էներգետիկան բիզնեսի համար․ արդյունավետ ներդրման Սիներջիի օրինակը բիզնես հանդիպումը։ Միջոցառման ընթացքում նախ տեղի ունեցավ բիզնես կենտրոնի տանիքին վերջերս տեղադրված արևային կայանի հանդիսավոր բացման արարողությունը, որին հաջորդեց բիզնեսի համար արևային էներգետիկայի դերի ու նշանակության ներկայացում-քննարկում։ Միջոցառումը եզրափակվեց մտքերի փոխանակմամբ ու կառուցողական երկխոսությամբ՝ հաճելի մթնոլորտում։

Բիզնես հանդիպումը մեկնարկեց Սիներջի ընկերության հիմնադիր Աշոտ Հովհաննիսյանի և Շտիգեն ընկերությունների խմբի հիմնադիր, Շտիգեն ՍՊԸ-ի տնօրեն Հայկ Շեկյանի կողմից Սիներջի բիզնես կենտրոնում տեղադրված 96կՎտ դրվածքային հզորությամբ արևային կայանի հանդիսավոր բացման արարողությամբ։ Կարմիր ժապավենը կտրելուց հետո, պարոն Հովհաննիսյանը պատմեց, թե ինչպես որոշեցին անցնել արևային տեխնոլոգիային և ինչպես ընտրեցին մատակարար ընկերությանը։ Ընկերության ղեկավարի խոսքերով, մրցույթին մասնակցող մոտ մեկ տասնյակ ընկերություններից առաջարկի գրագիտությամբ և գնի համադրությամբ առանձնացավ Շտիգենը։ «Հայտատարվել էր բավական խիստ մրցույթ, իր բոլոր տեխնիկական պահանջներով։ Աշխատել ենք տարբեր ընկերությունների հետ, որոնցից հինգի առաջարկները դիտարկել եմ անձամբ։ Ես հանգիստ խղճով կարող եմ խորհուրդ տալ այս ընկերության ծառայությունները»,- բացման իր խոսքում, դիմելով միջոցառման հյուրերին, ասաց Աշոտ Հովհաննիսյանը՝ կատակելով, որ այս խոսքերն ասում է անկեղծ մտքով, քանի որ Շտիգենից միջնորդավճար չունի։

Հաջորդիվ Հայկ Շեկյանը հակիրճ խոսեց տարբեր բիզնեսներում արևային էներգետիկայի ստեղծած հնարավորություններից, ներկայացրեց Սիներջի բիզնես կենտրոնի տանիքին տեղադրված արևային կայանի տեխնիկական հնարավորությունները։ Ընկերության ղեկավարը խոսեց որոշակի նորամուծությունների՝ սերվերային տնտեսություն ունեցող ընկերությունների համար նախատեսված արևային UPS տեխնոլոգիաների և աշխատակիցների ու հաճախորդների առողջությամբ մտահոգ ձեռնարկություններում կիրառելի օդը ֆիլտրող ու վիրուսազերծող տեխնոլոգիաների մասին։ Խոսվեց նաև Hozon ապրանքանիշի 100% էլեկտրական մեքենաների, դրանց լիցքավորման ցանցի մասին։

Բիզնես կենտրոնի տնօրեն Հրաչյա Ազատյանի խոսքով այս ծրագիրն իրենց համար կարևոր էր ոչ միայն որպես բիզնես ներդրում, այլև որպես բնության ու հասարակության նկատմամբ պատասխանատու վերաբերմունքի ևս մի հնարավորություն։ «Արևային կայանները լիովին համապատասխանում են Tech for Good (բարիք ստեղծող տեխնոլոգիա) շարժմանը, ինչի ջատագովն ու հետևորդն ենք մենք և Սիներջի բիզնես կենտրոնը։ Վերջինս նաև էլեկտրաէներգիայի ազատականացված շուկան կառավարող ծրագրային ապահովման հեղինակն է, և լիովին տրամաբանական էր, որ մեր բիզնես կենտրոնը ևս հագեցած լիներ արևային կայանով»,- ասաց Հրաչյա Ազատյան։

Սիներջի բիզնես կենտրոնում տեղադրված 96կՎտ հզորությունն ունեցող արևային կայանը կարտադրի տարեկան 127 հազար կՎտժ էլեկտրաէներգիա և էլեկտրաէներգիայի ներկայիս գներով կապահովի ավելի քան 6 մլն դրամի տարեկան խնայողություն։ Հաշվի առնելով, որ արևային էլեկտրակայաններն ունեն բավական երկար կյանքի տևողություն՝ ավելի քան 40 տարի, Էլեկտրաէներգիայի գների հերթական թանկացմանը զուգահեռ՝ կավելանա կայանից ստացվող ավելացված արժեքը։ Էլեկտրակայանի գործունեության մեկ տարվա ընթացքում չի արտազատվի մոտ 56 տոննա ածխաթթու գազ։ Հատկանշական է, որ նույն ծավալի CO2-ը կկլանվեր 37-56 հա սոճու կամ 8-11 հա բարդու անտառի կողմից մեկ տարվա կտրվածքով։

Нет описания.