Սահմանադրական դատարանը պետք է որոշումը փոխի և հոդվածի կիրառումը կասեցնի

ՀՀ մարդու իրավունքների պաշտպանը լրագրողներից ահազանգ է ստացել, որ Քրեական օրենսգրքում ծանր վիրավորանքի հոդվածը խանգարում է իրենց աշխատանքին, քաղաքացիները հրաժարվում են հարցազրույցներ տալուց։

Այս թեմայի մասին զրուցել ենք խոսքի ազատության պաշտպանության կոմիտեի նախագահ Աշոտ Մելիքյանի հետ։

Հարցին, թե արդյոք իրենք էլ են դժգոհություններ ստացե՞լ` Աշոտ Մելիքյանն ասաց․ «Նախ պետք է ասեմ, որ ի սկզբանե մենք դեմ ենք եղել այդ հոդվածի ընդունմանը և դեռ քննարկումների փուլում ասում էինք, որ սա հետընթաց է։ Օրենքի այդ դրույթի խոցելի մասն այն է, որ ակնհայտ է խտրական մոտեցումը հասարակության տարբեր շերտերի նկատմամբ, մասնավորապես՝ այնտեղ թվարկվում են խմբեր, որոնք առավել պաշտպանված են ծանր վիրավորանքից, քան շարքային քաղաքացին։ Սա, իհարկե, լուրջ բացթողում է և որևէ կերպ չի համապատասխանում միջազգային մոտեցումներին։ Մենք մեր հայտարարություններում և մեկնաբանություններում միշտ ընդգծում էինք, որ սա շատ խնդրահարույց հոդված է և կարող է նոր բարդություններ առաջացնել, այս առումով ես համամիտ եմ ՄԻՊ-ի գնահատականներին։ Ինչ վերաբերում է այս գրառման հիմք հանդիսացած առիթներին․ կարծում եմ, սա ևս մեկ առիթ է, որ Սահմանադրական դատարանը որոշումը փոխի և օրենքի այս հոդվածի կիրառումը կասեցնի։ Ինչ վերաբերում է լրագրողների դժգոհություններին կարող եմ ասել, որ ես անձամբ նման այդպիսի փաստեր չունեմ, բայց եթե ճիշտ է այն, որ մարդիկ հրաժարվում են մեկնաբանություններ տալ՝ վախենալով հետևանքներից, շատ մտահոգիչ է։ Իմ խորին համոզմամբ՝ խոսքի ազատությունը վախկոտների համար չէ և այդ իրավունքից օգտվելու համար բավականին մեծ խիզախություն է պետք, որևէ իշխանություն սկուտեղի վրա խոսքի ազատությունը չի մատուցում։ Եթե հարցազրույցում հնչեցված մտքերի համար կանչում են բացատրություններ տալու, հետապնդումներ են լինում, իհարկե այդ մասին պետք է բարձրաձայնել ու շարունակել պայքարը, սա է ակտիվ քաղաքացու մոտեցումն ու վարվելակերպը։ Վախենալով հետապնդումներից՝ հղում կատարելով այդ հոդվածին, լռելը լավ բանի չի բերի, ու այդ պարագայում իշխանությունները կարող են էլ ավելի զսպող մեխանիզմներ կիրառել»։

Սոնա Գիշյան