«Կառավարությունը շատ հեռու է մնացել իր իսկ սահմանած թիրախից»․ «Փաստ»

«Փաստ» օրաթերթը գրում է

Ինչպես հայտնի խոսքն է ասում, «արևոտ երկնքում կայծակի պես պայթեց» այն լուրը, թե այս տարի «Հայոց լեզու և հայ գրականություն» առարկայի միասնական քննության արդյունքում դիմորդների շուրջ 50 տոկոսը չի հաղթահարել անցողիկ շեմը, այսինքն՝ չի հավաքել նվազագույն ութ միավորը: Հետո, իհարկե, ԿԳՄՍ նախարարությունը պարզաբանում տարածեց, որ խոսքը քննության երկրորդ փուլի մասին է, որին մասնակցել է 98 դիմորդ, և դրական միավորի շեմը չի հաղթահարել 46 դիմորդ կամ մասնակիցների 46,9 տոկոսը:

«Քննությունների հիմնական փուլում «Հայոց լեզու և հայ գրականություն» առարկայի քննությանը մասնակցել է 4005 դիմորդ: Դրական միավորի շեմը չի հաղթահարել 519 դիմորդ կամ մասնակիցների 13 տոկոսը: Ստացվում է, որ հիմնական և երկրորդ փուլերի արդյունքում «Հայոց լեզու և հայ գրականություն» առարկայի քննություններին մասնակցել է 4103 դիմորդ: Դրական միավորի շեմը չի հաղթահարել 565 դիմորդ կամ մասնակիցների 13,77 տոկոսը: ԿԳՄՍ նախարարությունը մտահոգիչ է համարում անբավարար միավորների արձանագրված ցուցանիշները:

Այդ նպատակով նախարարությունն իրականացնում է մի շարք բովանդակային բարեփոխումներ, որոնց առաջնային նպատակը կրթության որակի բարելավումն է»,-ասված է նախարարության տարածած պարզաբանման մեջ: Կրթության փորձագետ Սերոբ Խաչատրյանը նշում է՝ քննության արդյունքների շուրջ քննարկումը սխալ ուղղությամբ է գնում և մի կարևոր բան կա, որը բաց է թողնված: «Վերջին օրերին շրջանառվեց այն տեսակետը, որ «Հայոց լեզվի» քննությունից դիմորդների մոտ 50 տոկոսը «կտրվել է»:

Սա ինքնին մանիպուլ յատիվ մեկնաբանություն է: Նախ՝ խոսքը երկրորդ փուլի մասին է: Պետք է նշել, որ երկրորդ փուլին սովորաբար դիմում են ավելի թույլ դիմորդներ, «պատահական» դիմորդներ, և միշտ երկրորդ փուլի արդյունքները ցածր են լինում: Նախարարությունն էլ ներկայացրեց ճշտումը, որ այս քննությունից դրական միավորի շեմը չի հաղթահարել մասնակիցների 13,77 տոկոսը: Բոլորս էլ գիտենք, որ բուհ դիմողները «պատահական» մարդիկ չեն, ճնշող մեծամասնությունը լուրջ պարապած են, և զավեշտ կլիներ, եթե նրանց հիսուն տոկոսը դրական միավոր չստանար»,-«Փաստի» հետ զրույցում ասում է Խաչատրյանը:

Նշում է՝ այս համատեքստում մի հարց կա, որի մասին չի խոսվում: «2019 թվականին Հայաստանի կառավարությունը որպես թիրախային ցուցանիշ նշել է, որ 2021 թվականին «Հայոց լեզու և հայ գրականություն» առարկայի միասնական քննության միջին թվանշանը կդառնա 15 միավոր, և ֆիքսել է, որ 2018 թվականին այդ ցուցանիշը քսան հնարավոր միավորից եղել է 12,2 միավոր: Ի՞նչ ունենք հիմա այս առումով: Տեսնում ենք, որ 12,2 միավորը չի դարձել տասնհինգ միավոր, անգամ չի էլ մոտեցել: Ընդամենը դարձել է 12,6 միավոր: Այսինքն, կառավարությունը շատ հեռու է մնացել իր իսկ սահմանած թիրախից: Իսկ «Մաթեմատիկա» առարկայի պարագայում ունենք հետընթաց: 2018 թվականին միջին միավորը եղել է 11,5, իսկ այս տարի դարձել է 10,5 միավոր, այնինչ կառավարությունն ասել էր, որ միջին թվանշանը պետք է դառնա 15 միավոր:

Ստացվում է, որ «Հայոց լեզու և գրականություն» առարկայից ունենք շատ աննշան առաջընթաց, իսկ «Մաթեմատիկայից»՝ մեկ ամբողջ միավորով հետընթաց: Սա է հիմնական խնդիրներից ու հարցերից մեկը, որի մասին պետք է խոսել, քննարկել, ուշադրություն դարձնել: Իհարկե, չի կարող այնպես լինել, որ դիմորդների հիսուն տոկոսը «կտրվի» մայրենի լեզվի քննությունից, քանի որ դիմորդները մեր լավագույն սովորողներն են: Օրինակ՝ եթե բոլոր աշակերտներին «Հայոց լեզվից» գրավոր հանձնարարենք, գուցե քառասուն տոկոսը «կկտրվի» այդ քննությունից, բայց դիմորդները պարապում են, նրանք չեն կարող շատ ցածր միավոր ստանալ: Որպես կանոն՝ պատահական դիմած, չպարապած մարդիկ են ութից պակաս միավոր ստանում»,-նշում է մեր զրուցակիցը՝ ընդգծելով, որ տվյալների հրապարակումից հետո շատերն ուշադրություն չէին դարձրել այն հանգամանքին, որ խոսքը երկրորդ փուլի քննությունների մասին է:

Բացի դա, պետք է նշել, որ, բնականաբար, ոչ մասնագետ մարդը չի կարող պատկերացնել, թե ինչ է նշանակում երկրորդ փուլ: «13,77 տոկոսն այդքան էլ մեծ թիվ չէ, ինչպես ասում են, դա էլ պետք է լինի, հատկապես, երբ «Հայոց լեզվի և գրականության» քննությունն այդքան էլ հեշտ քննություն չէ, հակառակը՝ համարվում է ամենաբարդերից մեկը»,-հավելում է փորձագետը՝ շեշտելով, որ այս ցուցանիշը պետք է քննարկման առարկա դառնա: Խոսելով ընդունելության քննությունների ընդհանրական արդյունքների մասին՝ կրթության փորձագետ Սերոբ Խաչատրյանն ընդգծում է, որ դրա մասին կարելի է կարծիք հայտնել այն ժամանակ, երբ կամփոփվեն բոլոր տվյալները, առայժմ վաղ է վերջնական պատկերի մասին եզրահանգումներ անելը:

ԼՈՒՍԻՆԵ ԱՌԱՔԵԼՅԱՆ

Մանրամասները՝ «Փաստ» օրաթերթի այսօրվա համարում