Առջևում մեծ իրադարձություններ են սպասվում․ «Փաստ»

«Փաստ» օրաթերթը գրում է

regnum.ru-ն «Լեռնային Ղարաբաղ. ո՞վ կդառնա հետհակամարտային վերակառուցման ճարտարապետը» վերնագրով հոդվածում գրում է, որ Անդրկովկասից թարմ քամիներ են փչում: Բաքուն և Երևանը հանդես են եկել հայտարարություններով՝ կապված Ադրբեջանի և Հայաստանի միջև սահմանազատման և սահմանանշման հետ: Հաղորդվում է, որ այդ կապակցությամբ արվել են «մի շարք կարևոր առաջարկներ», և «այդ ծրագրի իրականացման ուղղությամբ աշխատանքներն արդեն սկսված են»:

Ռուսաստանն այստեղ կարող է ստանձնել խորհրդատուի կամ միջնորդի դեր: Տեսաժողովի ձևաչափով բանակցություններ են անցկացվել Ռուսաստանի և Վրաստանի արտաքին գործերի և տրանսպորտի նախարարությունների ներկայացուցիչների միջև: Ըստ պաշտոնական հաղորդագրության, տարածաշրջանային խնդիրներ քննարկելիս ուշադրության են արժանացել այն հնարավորությունները, որոնք բացվում են Կովկասում տրանսպորտային հաղորդակցությունների և տնտեսական կապերի ապաշրջափակման առումով: Կողմերը պայմանավորվել են շարունակել համակարգել վրացական Ռազմավիրական մայրուղու երկայնքով տրանսպորտային կապերը բարելավելու հետագա քայլերը: Իր հերթին, Ադրբեջանի նախագահ Իլհամ Ալիևը ասել է, որ «ինքը պատրաստ է Հայաստանի հետ խաղաղության պայմանագիր կնքել»:

Նա նաև շեշտել է, որ «իրենք փոխադարձ համագործակցության կարիք ունեն, քանի որ հարևաններ են և պետք է սովորեն ապրել կողք կողքի»: Ավելին, նա նշել է, որ «եկել է ժամանակը Ադրբեջանի, Վրաստանի և Հայաստանի միջև եռակողմ համագործակցության համար», ինչը նշանակում է տարածաշրջանում, այսպես կոչված, հետհակամարտային զարգացման շրջանի սկիզբը: Իրոք, ղարաբաղյան երկրորդ պատերազմից հետո Բաքվի և Երևանի միջև հարաբերությունների ներկա իրավիճակն արտաքուստ համապատասխանում է հետհակամարտային շրջանի գիտական և քաղաքական սահմանումներին:

Զուտ դասական իմաստով այն նկարագրվում է որպես պահ, երբ վերանում են լարվածության հիմնական տեսակները, կողմերի միջև հարաբերությունները վերջապես կարգավորվում են, և համագործակցությունն ու վստահությունը սկսում են գերակշռել: Այնուամենայնիվ, պետք է հիշել, որ հակամարտության ավարտը միշտ չէ, որ հանգեցնում է խաղաղության և ներդաշնակության: Պատահում է նաև, որ մեկ (առաջնային) հակամարտության ավարտը կարող է ազդակ հաղորդել այլ հակամարտությունների, երբեմն՝ բոլորովին այլ ոլորտներում: Մեր դեպքում Հայաստանը պատերազմում պարտության ծանր սինդրոմ է ապրում, որն ուղեկցվում է սուր քաղաքական ճգնաժամով: Ադրբեջանը, որպես հաղթող կողմ, գտնվում է սկզբունքորեն այլ քաղաքական վիճակում: Հետևաբար, հետկոնֆլիկտային վերակառուցման մոդելը դեռ պարզ չէ: Ավելին, հետխորհրդային տարածքում ոչ ոք նման մոդելներ ստեղծելու փորձ չունի: Ինչ էլ որ ասվի, Ղարաբաղյան հակամարտությունը լուծվել է ուժով և ոչ թե միջնորդ երկրների, այս դեպքում՝ ԵԱՀԿ Մինսկի խմբի համանախագահների քաղաքական և դիվանագիտական ջանքերի շնորհիվ:

Հետևաբար, Բաքվի և Երևանի՝ պատերազմից խաղաղության անցնելու գործընթացը շատ բարդ կլինի և կուղեկցվի ինչպես հակամարտության անմիջական մասնակիցների, այնպես էլ արտաքին դերակատարների կողմից շահերի վերանայմամբ: Միևնույն ժամանակ, Ղարաբաղյան հակամարտությունում հետկոնֆլիկտային շրջանի սկզբի առաջին նշանը կարելի է համարել ոչ թե հաստատված զինադադարը, այլ կողմերի պատրաստակամությունը հանգիստ սահմանազատել սահմանները: Միևնույն ժամանակ, դժվար է ասել, թե այդ գործընթացը այս կամ այն կերպ կանդրադառնա՞ ԼՂՀ-ի կարգավիճակի խնդրին, եթե այո, ապա արդյո՞ք դա չի դառնա նոր բարդությունների ի հայտ գալու պատճառ հետհակամարտային համախտանիշի այլ մակարդակում և մասնակիցների նոր կազմով: Նկատի ունենք, իհարկե, Ստեփանակերտը՝ որպես խնդրի ընդհանուր մաս, և Լեռնային Ղարաբաղի նախապատերազմական ստատուս քվոն «վերակառուցելու» կամ վերականգնելու տարբերակը:

Ղարաբաղյան հակամարտությունում հետկոնֆլիկտային շրջանի սկզբի երկրորդ նշանը կարելի է համարել կողմերի պատրաստակամությունը ապաշրջափակել հաղորդակցության ուղիները տարածաշրջանում: Այդ համատեքստում տարօրինակ են հնչել Լավրովի խոսքերը մայիսի 6-ին Երևանում կայացած մամուլի ասուլիսում, ըստ որի, «տարածաշրջանում տրանսպորտային հաղորդակցությունները ապաշրջափակելու մասին որոշումները կարող են լինել բացառապես կամավոր»: Ուրեմն, ի՞նչը կարող է համարվել 2020 թվականի նոյեմբերի 9-ին Ռուսաստանի, Հայաստանի և Ադրբեջանի միջև եռակողմ խաղաղության համաձայնագրում «ոչ կամավոր»: Առայժմ, դատելով քաղաքական գործիչների հայտարարություններից, հաղորդակցությունների ապաշրջափակումը կապված է Բաքվի և Երևանի միջև հարաբերությունների քաղաքական և հոգեբանական թուլացման, երկարաժամկետ հաշտեցման և հոգեբանական տրավմայի աստիճանական ապաքինման հեռանկարների հետ:

Նկատի առնենք այն, որ Ղարաբաղյան հակամարտության հետկոնֆլիկտային վերակառուցման մոդել դեռ գոյություն չունի: Փոխարենը առկա է ժամանակավոր կապ հակամարտության փուլերի և, այսպես կոչված, փուլ առ փուլ կարգավորման միջոցառումների միջև, բայց երկարաժամկետ կարգավորման փուլը դեռ շատ հեռու է: Մոսկվան մարքսիստական ձևով կենտրոնանում է հաղորդակցությունների ապաշրջափակման հեռանկարների, հակամարտող երկրների միջև առևտրատնտեսական համագործակցության ապագա զարգացման վրա՝ հույս ունենալով, որ նման սցենարում հայերի և ադրբեջանցիների համար անշահավետ կլինի միմյանց դեմ կռվելը, և որ ժամանակի ընթացքում հասարակության հոգեբանական վիճակը երկու երկրներում կփոխվի և կհաստատվի երկարատև կենսունակ խաղաղություն: Անդրկովկասում այժմ ստեղծվել է եզակի հետկոնֆլիկտային իրավիճակ, որը միաժամանակ ունի և՛ լավ հեռանկարներ, և՛ նշանակալի վտանգներ:

Ամեն ինչ անսովոր դինամիկայի մեջ է, որը համեմատելի է 1918-1920-ականների ժամանակաշրջանի հետ: ԱՄՆ-ը հեռու է, իսկ Ռուսաստանը, ըստ ամերիկացի պատմաբան և Միչիգանի համալսարանի պրոֆեսոր Ռոնալդ Գրիգոր Սունիի, շարունակում է մնալ «տարածաշրջանի գլխավոր տիրակալը», մինչդեռ Թուրքիայի և Իրանի ներուժը Անդրկովկասյան ուղղությամբ արդեն իսկ սպառվել է։ Առջևում մեծ իրադարձություններ են սպասվում:

Մանրամասները՝ «Փաստ» օրաթերթի այսօրվա համարում