«Զարմացա, որ Ֆրանսիայում «Նիվա» մակնիշի մեքենա են ունեցել». «ԼադաՆիվա»–ի հայաստանյան համերգն ու ֆրանսիաբնակ երգչուհու բացահայտումը

Ֆրանսիաբնակ երգչուհի Ժակլին Բաղդասարյանը լսարանին հայտնի դարձավ մոտ մեկ տարի առաջ, երբ Ֆեյսբուքի հայկական տիրույթում տարածում գտավ նրա «Վայ աման» երգը: Երգչուհին ստեղծագործում է ֆրանսիացի ընկերոջ՝ Լուի Թոմասի հետ, իրենց խումբը նրանք կոչել են «ԼադաՆիվա»: Նախորդ տարի Ժակլինն ասել էր, որ երազում է Հայաստանում համերգ ունենալու մասին, այս տարի նրա երազանքը կկատարվի․ մայիսի 29-ին Կարեն Դեմիրճյանի անվան մարզահամերգային համալիրում  «ԼադաՆիվա» խումբը կունենա հայաստանյան իր առաջին մենահամերգը: 

Tert.am Life-ի հետ զրույցում Ժակլինը խոսել է այս մեկ տարվա ընթացքում տեղի ունեցած փոփոխությունների, խմբի անվան ընտրության, Հայաստանը բացահայտելու ցանկության և անհամբերությամբ համերգին սպասելու մասին:

Երգչուհու խոսքով՝ մեկ տարվա ընթացքում շատ բան է փոխվել: «Ցավոք սրտի, մեր նախագիծը զարգանում է կորոնավիրուսի ընթացքում, բայց շատ միջոցառումների ենք մասնակցել, նույնիսկ օնլայն համերգներ ենք ունեցել: «Վայ աման» երգից հետո թողարկեցինք «Քեֆ չի լինին», որը մեր լսարանն ավելի մեծացրեց: Չգիտեմ, թե մեր երգերի հաջողության գաղտնիքն ինչումն է, ուղղակի անում ենք այն, ինչ սիրում ենք, մարդկանց էլ դա դուր է գալիս: Մեր տեսահոլովակների համար մեծ գումարներ չենք ծախսում, որովհետև չունենք: Նկարահանում ենք սովորական տեսահոլովակներ մեր ընկերների օգնությամբ, բայց ուրախ կլինենք առաջիկայում ծանոթանալու և համագործակցելու ռեժիսորների հետ: Նորից պարզ տեսահոլովակներ կնկարահանենք, բայց ավելի պրոֆեսիոնալ»,- ասաց նա:

Ըստ երգչուհու՝ «ԼադաՆիվա» խումբն իր կյանքում ևս շատ բան է փոխել: «Դրանից առաջ նախագծեր ունեի, երգում էի, բայց ինչ-որ բան պակասում էր, մտածում էի՝ այդ դատարկությունն ինչպե՞ս լցնեմ: Միայն «ԼադաՆիվայի» շնորհիվ համարձակվեցի իմ գրած մեղեդիները մարդկանց ցույց տալ, մեր խմբի մյուս անդամը՝ Լուին էլ ոգեշնչում էր ինձ: Նա շատ է ճամփորդել, իր մեջ տարբեր երկրների մշակույթներ է կրում, երաժշտական ճաշակով ու գիտելիքներով կիսվում է ինձ հետ: Հիմա «ԼադաՆիվան» իմ միակ նախագիծն է, իմ կյանքն է, ամբողջ էներգիաս տալիս եմ այս նախագծին: Ներկայացնում ենք երգեր, որոնք իրենց մեջ տարբեր երկրների երաժշտություններ են ներառում: Ինքս էլ ծնվել եմ Հայաստանում, տեղափոխվել Բելառուս, հետո Ֆրանսիա, իմ մեջ երեք երկրի երաժշտություն եմ կրում»,- պատմեց երգչուհին:

Ժակլինը շեշտեց, որ խմբի անունը պատահական են ընտրել: «Սկզբում խմբի անվան շուրջ շատ չէինք մտածում, պատահական ասացի՝ «Լադա», իսկ Լուին ասաց՝ «Նիվա»: Հարցրի՝ որտեղի՞ց գիտի մեքենայի մասին, նա էլ պատմեց, որ հայրն ունեցել է «Լադա Նիվա», ասացի՝ իմն էլ է ունեցել: Զարմացա, որ Ֆրանսիայում այդ մակնիշի մեքենա են ունեցել: Ծիծաղեցինք, որոշեցինք անունը հենց այդպես էլ կնքել՝ նաև շեշտը դնելով սովետական երաժշտության վրա»,- ասաց նա:

Ժակլինն ընդգծեց՝ հաճելի է, երբ հանդիսատեսն իրենց ընդունում է այնպիսին, ինչպիսին կան: «Շատ հաղորդագրություններ ենք ստանում, հաճելի է, երբեմն, նույնիսկ հուզվում եմ, որովհետև շատ սրտանց հաղորդագրություններ են: Փորձում եմ բոլորին պատասխանել, բայց չեմ հասցնում»,- նշեց նա:

Երգչուհին պատմեց, որ ծննդով Եղեգնաձորից է, վերջին անգամ Հայաստանում եղել է 6 տարի առաջ: «Շատ եմ կարոտել բարեկամներիս, Հայաստանի բնությունը, ուտեստները՝ քյալագյոշը, տոլման: Որքան էլ մայրիկս այստեղ պատրաստում է այդ ուտեստները, Հայաստանինն եմ ուզում: Շատ եմ ուզում նաև բացահայտել իմ հայրենիքը, բայց այս անգամ դժվար թե հասցնեմ, որովհետև չորս օրով եմ գալիս: Սպասում եմ, թե երբ կգա այն պահը, երբ հնարավոր կլինի անել այն, ինչ ուզում եմ,- ասաց նա և հավելեց, որ անհամբերությամբ է սպասում հայաստանյան համերգին,- Հույս ունեմ՝ ամեն ինչ լավ կանցնի: Հայաստանի հանդիսատեսին այնքան ջերմ եմ պատկերացնում, կարծես ընտանիքիս անդամները լինեն, պատկերացնում եմ, որ բոլորը ժպտալու են, ասելու՝ «Ժակո ջան», հետո գրկեն ինձ, ինչպես հորաքույրներս ու մորաքույրներս»:

Երգչուհին նաև անդրադարձավ հայերենի իր իմացությանը: «Շատերը մտածում են՝ հայերեն չեմ խոսում, բայց ես նորմալ խոսում եմ: Ուղղակի լեզուն քիչ եմ օգտագործում, դժվարանում եմ: Շատ եմ սիրում իմ լեզուն, դրա հնչողությունը, տառերի ձևը, երբ խոսում եմ, լեզուս բացվում է»,- եզրափակեց նա: