«Չեմ նեղանում Արամեից»․ Աննա Թովմասյանի 34-ամյակը, տարեդարձի ամենայուրահատուկ խնջույքն ու Արամեի ուշացող նվերը

Երգիչ Արամեի կինը՝ երգչուհի Աննա Թովմասյանը, այսօր դառնում է 34 տարեկան։ Տարեդարձի օրը սիրելին հեռու է Աննայից, բայց երգչուհին նման փորձ էլի է ունեցել։ Հեռավորության վրա սպասում է իր հասանելիք անակնկալին:)

Tert.am Life–ի հետ զրույցում Աննան պատմել է Արամեի շնորհավորանքի, ամենատպավորիչ տարեդարձի և օրը տոնելու իր տարբերակի մասին։ Երգչուհին իր ամենամեծ ձեռքբերումը համարում է ընտանիքը, որը ստեղծել են Արամեի հետ և երեխաներին՝ 4-ամյա Աննա Մարիային և 1-ամյա Մարտինին։

«Արամեն գիշերը շնորհավորել է ինձ, բայց կարծում եմ, որ իր շնորհավորանքը դեռ առջևում է,– ասաց Աննան, ապա ծիծաղելով նկատեց, որ նվեր դեռ չի ստացել։ – Նվեր չեմ ստացել, բայց հույսեր դեռ փայփայում եմ:) Սովորաբար Արամեին հուշում եմ՝ ինչ նվեր կարող է ընտրել ինձ համար, այս անգամ ոչինչ չեմ «պատվիրել», խելոք էի։ Իմ մատը խառը չէ, ուշանում է:)»։

Երգչուհին նկատեց, որ ամուսինը շատ լավ գիտի ինքն ինչ է սիրում, ըստ դրա կարող է որոշել, այնպես որ, ընտրությունը շատ բարդ չի լինի։

«Տարեցտարի «ուզելը» քչանում է, երևի, երեխաների գորոծոնով է պայմանավորված, կամ էլ հասունանում ես, բայց սկսում ես քեզ դնել երկրորդ պլանում։ Ավելի շատ երեխաների մասին ես մտածում։ Հիմա շատ ավելի պասիվ եմ, քան առաջ։ Նախկինում ինչ-որ բան կուզեի, կխառնվեի իրար, հիմա հանգիստ եմ»,– ասաց նա։

Աննան  նկատեց, որ ինքն ու Արամեն ռոմանտիկ անակնկալներ սիրահար չեն։ «Քանի որ ոչ Արամեն է ռոմանտիկ, ոչ էլ ես, իրար հետ հանգիստ «յոլա ենք գնում»։ Չեմ նեղանում ռոմանտիկայի բացակայությունից»,– ասաց նա, ապա հավելեց, որ օրն սկսել է երեխաների հետ, ինչպես բոլոր մայրիկների դեպքում, պարզապես այսօր առավոտից շնորհավորական զանգեր է ստանում։ Վաղ առավոտյան մայրիկն էլ ծաղիկներ է ուղարկել Աննային, ինչը նրա համար անակնկալ է եղել։

Աննայի խոսքով՝ այսօր մեծ խնջույք չի սպասվում, բայց հավաքվելու են ընկերուհիների և հարազատների հետ։

Երգչուհին վերհիշեց, որ իր ամենագեղեցիկ ծնունդը եղել է 30–ամյակի օրը, երբ վայելում էր առաջին հղիության ընթացքը. «Երբ սպասում էի Աննա Մարիայի ծննդին, շատ յուրահատուկ ծնունդ ունեցա։ Թե՛ հոգեվիճակս էր այդպիսին, թե՛ խնջույքի մասշտաբն ու հյուրերի քանակը։ Իսկ առհասարակ, երբեք չեմ սիրել ծննդյանս օրը, չգիտեմ ինչու, ամաչում եմ այդչափ ուշադրությունից։ Գուցե նաև օրը կապել եմ մեծանալու փաստի հետ»։

Ըստ Աննայի՝ առաջին կնճիռներին առերեսվելը հաճելի փաստ չէր, բայց սթրեսային չի դարձել իր համար։ «Կարծում եմ՝ ոչ մի կնոջ համար դա հաճելի չէ, բայց սթրեսի մեջ չեմ ընկել։ Հուսով եմ՝ հետագայում էլ չեմ ընկնի։ Մեծանալուց չեմ վախենում, կարևորը՝ հոգով դեռ մեծ չեմ։ Մեկ–մեկ մտածում եմ՝ վայ, մամա ջան, արդեն 34 տարեկա՞ն եմ։ Լինում են պահեր, երբ մտածելակերպիս մեջ եմ զգում տարիքս։ Ի վերջո, հասունանում ես, տարիքն իրեն ասում է, հատկապես, երեխաների ծննդից հետո, երբ քո հետաքրքրությունները, քեզ կարող ես դնել երկրորդ, երրորդ պլանում»։