«Կարող եմ տարբերվող բաներ անել, մարդիկ էլ տեսնեն և կրկնօրինակեն». Դիանա Մխիթարյանը՝ իր ոճային նախասիրությունների և 50.000 ռուբլիով տաբատ գնելու մասին

Երիտասարդ երգչուհի, դերասանուհի Դիանա Մխիթարյանը լսարանին հայտնի դարձավ «Անհասցե ծնվածները» հեռուստասերիալից, որը դեռևս նրա միակ դերասանական փորձն է եղել։ Tert.am Life-ի հետ զրույցում Դիանան խոսել է իր ոճային նախասիրությունների, 50.000 ռուբլիով (մոտ 340.000 դրամ) տաբատ գնելու, տատիկի ուղարկած հագուստների և վերջերս արած ոճափոխությունների մասին:

Երգչուհու խոսքով՝ կոնկրետ մի ոճի հագուստ չի հագնում, ցանկացած ոճի դեպքում կարևորն այն է, որ իրեն հագուստի մեջ հանգիստ զգա: «Երբեմն, ինքս եմ ստեղծում ոճս, կողքից նայելիս կարող են ասել՝ ի՞նչ եմ հագել, բայց ես կարող եմ մազակալը հարմարեցնել ձեռքիս, տարբերվող բաներ անել, մարդիկ էլ տեսնեն, հավանեն և կրկնօրինակեն: Անկեղծ ասած, նորաձևությանը շատ չեմ հետևում, Ինստագրամում հետևում եմ տարբեր երկրներում ապրող աղջիկների, տեսնում՝ ինչ նոր բան են հագել: Ավելի լավ է ստեղծել սեփական ոճը և դրան համապատասխան հագնվել, ոչ թե տեսնել, թե այդ պահին ինչն է նորաձև, ինչը՝ ոչ: Եթե նույնիսկ ասեն, որ տվյալ հագուստն ինձ չի սազում, բայց ինձ դրա մեջ լավ, հարմար զգամ, ուրեմն այն իմն է: Նախընտրում եմ վառ գույներ, բայց այն ժամանակ, երբ լավ տրամադրություն ունեմ, իսկ երբ տխուր եմ կամ ստաբիլ տրամադրությամբ, հագնում եմ սև»,- ասաց նա:

Դիանան շեշտեց, որ հարմարավետ հագուստ է նախընտրում պայմանավորված նաև այն հանգամանքով, որ ուսանող է: «Առավոտյան գնում եմ համալսարան ու մինչև ժամը 4-ն ունենում 80 րոպեանոց դասեր, պետք է այնպես հագնվեմ, որ ինձ հանգիստ զգամ: Բարձրակրունկներ հաճախ եմ հագնում, բայց ոչ համալսարանում, քանի որ առօրյայում հարմար չեն: Ամեն ինչ կախված է մարդու նախասիրություններից»,- նշեց նա:  

Ըստ երգչուհու՝ իր զգեստապահարանում շատ իրեր ունի, իսկ կոշիկների համար տեղ այլևս չունի: «Ինչպես գիտենք, աղջիկների համար որքան շատ է, այնքան քիչ է: Շատ իրեր կան, որոնք գնել եմ և չեմ հասցրել գոնե մեկ անգամ հագնել: Մի օր անպայման կհագնեմ, ինչպես բոլոր աղջիկները:) Հակառակ ասածիս՝ ունեմ իրեր, որոնք այնքան շատ եմ սիրում, որ կարող եմ ամեն օր հագնել: Երբ հանդիպում էի կազմակերպել երկրպագուներիս հետ, նրանք հարցրին՝ բացի այդ սպորտային կոշիկներից, ուրիշը չունե՞մ: Իրականում շատ ունեմ, ուղղակի, երբ մի բան շատ եմ սիրում, ուզում եմ անընդհատ հագնել: Աղջիկների նկատելուց հետո ինձ տրամադրեցի, որ նույն հագուստը, կոշիկը շատ հաճախ չհագնեմ»,- ընդգծեց երգչուհին:

Դիանան նաև նշեց, որ հագուստի, կոշիկների մեծ մասն ուղարկում է Ամերիկայի Միացյալ Նահանգներում բնակվող տատիկը: «Նա գիտի իմ ճաշակը, երբեմն էլ ես եմ ուղարկում կոնկրետ հագուստ, որը չեմ կարողանում գտնել Հայաստանում: Հետևորդներս շատ են հարցնում, թե այս կամ այն հագուստս որտեղից եմ գնել, դրանց մեծ մասը նաև մայրս է գնում Ռուսաստանից, իր հետ բերում, ես տեղյակ չեմ լինում, թե որտեղից է գնված: Օնլայն գնումներ չեմ սիրում, առհասարակ, գնումների վրա ժամանակ չեմ ծախսում, բայց երբ ընկերուհիներս հետ գնում ենք առևտրի կենտրոն, չեմ կարողանում անտարբեր անցնել խանութների կողքով, անպայման գոնե մի բան գնում եմ: Վերջին գնումս երկու օր առաջ էր, գնացել էի նվեր ընտրելու, բայց ինձ համար էլ պայուսակ գնեցի»,- պատմեց նա:

Դիանան ընդգծեց, որ հագուստի գնին ուշադրություն չի դարձնում: «Շատ իրերի գներ անիմաստ թանկ են, ինձ համար գինը կապ չունի: Կարևոր է, որ տվյալ իրն ինձ դուր գա, կարող եմ գնի մասին դրամարկղում իմանալ, երբ արդեն վճարելիս լինեմ: Վերջին շրջանում գոտիներ եմ կապում, դրանք հիմա նորաձև են: Օրինակ, սև կաշվե գոտիս կարված է հատուկ ինձ համար, շագանակագույն գոտիս գնել եմ զեղչված՝ 18.000 դրամով: Ամենաթանկ գնումս Ռուսաստանում եմ արել, տաբատ եմ գնել, որն արժեր 50.000 ռուբլի (մոտ 340.000 դրամ, հեղ․): Մինչ օրս տաբատը կա, թեև գնել եմ 3 տարի առաջ, խնամքով եմ պահում: Այդքան թանկ արժեր, որովհետև վրան ձեռքի աշխատանք էր արված: Երկու բլուզ եմ նաև գնել, որոնք միասին արժեին 20.000 ռուբլի (մոտ 137.000 դրամ), հագել եմ, երևի, մեկ անգամ»,- նշեց նա:

Դիանան պատմեց, որ տեսահոլովակների համար հագուստը գնում է կամ անհատական կարում: Օրինակ՝ «Քո մի համբույրից» տեսահոլովակի համար նախատեսված զգեստը կարվել է 2 օրում:

Վերջերս երգչուհին ոճափոխության էր դիմել, մազերը երկարացրել էր հյուսքերի միջոցով: «Առաջին մի քանի օրն ինձ ամեն ինչ դուր էր գալիս, հետո սկսեցի նյարդայնանալ, 13-րդ օրը հանեցի դրանք, որովհետև կարոտել էի իմ բնական մազերը: Հետո պատահական որոշեցի և մազափունջ կտրեցի: Շատերն ասում են, որ այսպես ինձ ավելի է սազում, մազափնջով ավելի փոքր եմ երևում: Ես սիրում եմ փոփոխություններ և եթե անում եմ այն, ինչ ուզում եմ, հեշտ եմ դրանց գնում, երկար չեմ մտածում: Միշտ ասում եմ՝ եթե նույնիսկ հետո զղջամ, կիմանամ, որ իմ որոշումն է, ինձ ոչ ոք չի դրդել փոփոխությունների գնալ»,- եզրափակեց նա: