«Իմ և Անուշկայի զույգը շատ է սիրվել». Գևորգ Մկրտչյան

Երիտասարդ երգիչ Գևորգ Մկրտչյանի համար տարին աշխատանքային նորություններով է սկսվել: Գևորգի «Սիրում եմ քեզ հետ լռել» կոչվող երգի տեսահոլովակի պրեմիերան կլինի այսօր՝ փետրվարի 5-ին:

«Քանի որ մի քանի ամսով Ռուսաստանի Դաշնություն եմ մեկնում և հստակ չգիտեմ՝ երբ հետ կգամ, որոշեցի տեսահոլովակներ նկարահանել, որպեսզի ժամանակս հատկացնեմ համերգներիս: Առաջին տեսահոլովակը նկարահանվել է «Սիրում եմ քեզ հետ լռել» կոչվող երգի հիման վրա, որի խոսքերի և երաժշտության հեղինակն Արման Անտոնյանն է»,- Tert.am Life-ի հետ զրույցում ասաց նա:

Տեսահոլովակի ռեժիսորը Դավիթ Ավագյանն է, սցենարի հեղինակը՝ Գևորգը: «Ըստ սցենարի՝ գրադարանում հանդիպում եմ աղջկա, ով գրքի մեջ գրում է՝ «տեսնես մեկը կկարողանա՞ իմ սիրտը 24 ժամում գրավել»: Ես կարդում եմ ու որոշում գրավել նրա սիրտը: Տեսահոլովակի հերոսուհին դերասանուհի Անուշկա Մարգարյանն է, ում հետ նկարահանվել ենք «Անհասցե ծնվածները» հեռուստասերիալում, այնտեղ ամուսիններ էինք, Անուշկային շատ եմ սիրում: Մինչև հեռուստասերիալը նրա հետ շփում ունեցել էի, բայց որպես մարդ չէի ճանաչում: Միասին նկարահանվելուց հետո նրան բացահայտեցի, բացի այդ, մեր զույգը շատ էր սիրվել»,- նշեց Գևորգը:

Երգչի խոսքով՝ երկու տեսահոլովակ է ներկայացնելու, որոնք իրարից էականորեն տարբերվում են: «Երկար ժամանակ էր՝ այլ ոճով էի ներկայանում, շեղվել էի իմ սկզբնական ոճից: «Սիրում եմ քեզ հետ լռել» տեսահոլովակում ներկայացել եմ իմ հին ոճով, որովհետև զգում էի՝ մարդիկ կարոտել են նախկին Գևորգին, որն ավելի դեռահասի կերպար ուներ և ինձ համար այցեքարտային էր: Ներկայանում էի իմ տարիքից փոքր տղայի կերպարում, որը շատ էր սիրվել լսարանի կողմից: Ժամանակն է, որպեսզի ոճափոխվեմ, այդ պատճառով այս տեսահոլովակից հետո կլինի ևս մեկը, որում լրիվ այլ ոճում եմ: Ես հոգնել եմ դեռահաս Գևորգի կերպարից, կարծում եմ՝ հանդիսատեսը նույնպես կհոգնի, եթե անընդհատ այդ ոճում տեսնի ինձ: Առհասարակ, փոփոխությունների հեշտ եմ գնում, ակտուալ մնալու համար փոփոխությունները պարտադիր են»,- ընդգծեց նա:

Հարցին, թե ֆինանսապես բարդ չէ՞ միանգամից երկու տեսահոլովակ նկարահանել, Գևորգը պատասխանեց. «Տեսահոլովակներ նկարահանելը ֆինանսապես բարդ է, բայց իմ վաստակած գումարը փորձում եմ ներդնել նոր տեսահոլովակներ նկարահանելու համար: Ձգտում եմ միշտ ակտուալ լինել, չեմ նկարահանում մեկ տեսահոլովակ ու դրանից սպասում մաքսիմալին, մի քանիսն եմ նկարահանում: Իմ ամենամեծ դադարը 5 ամիս է եղել, այն էլ՝ պատերազմի ընթացքում, հաճախ եմ նոր աշխատանքներ ներկայացնում: Ֆիզիկապես ևս բարդ է, որովհետև իմ տեսահոլովակների սցենարը ես եմ գրում, այս դեպքում էլ պետք է այնպես գրես, որ մարդկանց չհոգնեցնես»: