Կարեն Մկրտչյանն ու ավագ որդին, Արմեն Մարությանն ու Ալլա Վարդանյանը և այլ դերասաններ՝ Ելենա Արշակյանի նոր հեռուստասերիալում

Ռեժիսոր Ելենա Արշակյանը շուտով լսարանին կներկայացնի իր նոր հեռուստասերիալը, որն անդրադառնում է հայկական իրականության համար շատ նուրբ թեմայի․ պատմությունն Արցախյան առաջին պատերազմի միջոցով անցած «Մասիվի ջոկատի» տղաների մասին է, որոնցից 3 ընկեր են ողջ մնացել։ Նրանցից մեկը 1994–ին հայտնվել է գերության մեջ և հիմա վերադարձել Հայաստան։

Tert.am Life–ը ներկա է եղել հեռուստասերիալի նկարահանումներին և ներկայացնում է նախագծի առաջին մանրամասներն ու ֆոտոշարքը։

Ռեժիսոր Ելենա Արշակյանի համար նախագծի թեման շատ զգացմունքային է։ Թեև յուրաքանչյուր նախագիծ սկսելուց առաջ վախ ունեմ, թե ինչպես կընդունվի հեռուստադիտողների կողմից, այս անգամ մտավախությունը կրկնակի է, որպեսզի որևէ մեկին ցավ չպատճառի։ Թեմայից մինչև դերասանական կազմ ընտրությունը նուրբ է։

«Ես ու Անահիտ Մխիթարյանը ցանկացած նախագիծ սկսելուց առաջ մտածում ենք, թե որոնք են հասարակության համար կարևոր խնդիրները։ Այս նախագծում հայերիս համար բավականին ցավոտ թեմա ենք ընտրել․ խոսելու ենք գերիների մասին, պատմելու ենք, թե ինչ ճակատագիր ունի մարդը, որը 1994 թվականին գերեվարվել է և հիմա վերադարձել է Հայաստան, ինչ վատ ազդեցություն ունի համացանցը մարդու հոգեբանության վրա, ինչպես կարելի է մի գրառմամբ, նախադասությամբ ցավ պատճառել մարդուն, ազդել նրա հոգեբանության վրա, երբեմն, որքան անպատասխանատու ենք մենք բոլորս,– ասաց նա, ապա շեշտեց,– Նախագիծը ոչ թե պատերազմի, այլ փրկության մասին է»։

Ելենան իր նախագծերում հաճախ է օգտագործում իրական հիմքեր։ Այս հարցը շատ մանրամասնել նա չցանկացավ, նկատեց, որ պատմության մեջ կան իրական հիմքեր, սակայն սա գեղարվեստական սցենար է։ Արցախյան նոր պատերազմի հետքերը շատ թարմ են։ Ռեժիսորի խոսքով՝ չի ուզում անդրադառնալ վերջին պատերազմին, բայց և չեն կարող չխոսել այդ մասին, որոշակի անդրադարձեր կլինեն։

Ֆիլմի թեման շատ զգայուն է, դերասանական կազմում ընդգրկված են մարդիկ, որոնք նախորդ տարի անձնական դրամաներ են ապրել․ դերասան Կարեն Մկրտչյանը, ով արցախյան պատերազմում կորցրեց իր որդուն՝ Արմանին։ Կարենի ավագ որդին՝ Ակիմը, ևս դեր է ստացել նախագծում։

Ելենան ընդգծեց, որ ողբերգությունը բոլորիս է վերաբերում․ պատերազմը որևէ հայի անմասն չի թողել՝ մտել է յուրաքանչյուրիս տուն։ Այս ամենը նկարահանման հրապարակի աշխատանքն առավել զգայուն է դարձնում։

Ելենան վերհիշեց, որ բավականին բարդ էր, երբ միաժամանակ հանդիպել էր Կարենին, ով պատերազմում կորցրել է որդուն ու ֆիլմի դերակատարներից մյուսին՝ Վարուժան Մարգարյանին, որին պետք էր աչքալուսանք տալ, որովհետև եղբայրը գտնվել էր 70 օր անհետ կորած լինելուց հետո։ Փրկությունն ու ողբերգությունը կողք կողքի են․ հեռուստասերիալի անվանումն էլ պատահական չէ․ «Ծաղիկներ ձյան տակ»։

«Այս պատմություններն ինձ վրա էլ են ազդում։ Կստեմ, եթե ասեմ՝ այնքան պրոֆեսիոնալ եմ, որ նկարահանման հրապարակում այդ թեմաներն ինձ չեն առնչվում։ Ես չէի կարողանում խնդիր տալ Կարենի տղային, ով պետք է շատ կարևոր տեքստ ասեր, ի վերջո, ես կին եմ, հայ եմ, էմոցիոնալ մարդ եմ։ Սակայն կազմի ընտրությունն անելիս հատուկ միտում չեմ ունեցել․ Կարենը բոլորի պես մասնակցել է քասթինգի ու ստացել իր դերը։ Կարենն իրեն շատ ձիգ է պահում, հիացած եմ։ Կարենի որդուն, որը մարմնավորում է նրա երիտասարդությունը, ընտրել ենք արտաքին նմանությամբ։ Բավականին շնորհքով տղա է»,– ասաց նա։

Հեռուստադիտողներն այս նախագծում կտեսնեն նաև դերասան–ամուսիններ Արմեն Մարությանին և Ալլա Վարդանյանին, որոնց համար ևս 2020–ը ողբերգական տարի էր․ մինչև պատերազմը նրանք կորցրին իրենց դստերն ու թոռնիկներին։

Ելենան նշեց, որ հեռուստադիտողները նախագծում կտեսնեն սիրված դերասան, վարպետ Վլադիմիր Մսրյանի թոռնուհուն՝ Անահիտ Մսրյանին, Մերի Երեմյանին, Նորայր  Եղյանին, Անահիտ Կիրակոսյանին, դերասանական կազմում ընդգրկել է նաև նորավարտ դերասան–դերասանուհիների, ինչն իր համար սկզբունքային է դարձել ցանկացած նախագիծ սկսելիս։

Նոր հեռուստասերիալը  «Արմենիա Պրեմիումի» եթերում կլինի փետրվար 8-ից, «Արմենիա TV»–ի եթերում՝ փետրվարի 15–ից։