Իրաքը թուրքական զորքերի հարցով նամակ է հանձնել ՄԱԿ-ի անվտանգության խորհրդին

Իրաքի իշխանությունները նամակ են հանձնել Միավորված ազգերի կազմակերպության Անվտանգության խորհրդին՝ պահանջելով ստիպել Թուրքիային դուրս հանել զորքերը իրաքյան տարածքից, ինչը համարվում է ՄԱԿ-ի կանոնադրության կոպիտ խախտում: Վկայակոչելով ռուսական ՏԱՍՍ-ը, այս տեղեկությունը հաստատել է ՄԱԿ-ում ԱՄՆ մշտական ներկայացուցիչ Սամանթա Փաուերը, ով դեկտեմբերին նախագահում է Անվտանգության խորհուրդը:

Նամակում նշված է, որ պաշտոնական Բաղդադը փորձել է Թուրքիայի հետ խնդիրը կարգավորել «դիվանագիտական ճանապարհով», սակայն չի կարողացել «համոզել թուրքական կողմին զորքերը դուրս բերել օկուպացրած իրաքյան տարածքներից»:

«Իրաքը ցանկանում է տեղեկացնել անդամ երկրներին, որ անօտարելի իրավունք ունի ինքնապաշտպանության՝ համապատասխան ՄԱԿ-ի կանոնադրության և միջազգային իրավունքի նորմերի, ինչպես նաև ձեռնարկել բոլոր անհրաժեշտ միջոցառումները, որպեսզի դադարեցվի այդ թշնամական գործողությունը և վերջ տրվի ինքնիշխան իրաքյան տարածքում թուրքական կասկածելի հավակնություններին»,-նշվում է նամակում: ՄԱԿ-ում Իրաքի մշտական ներկայացուցիչն ընդգծել է, որ նմանօրինակ գործողությունները «վիրավորական են բարÇդրացիական հարաբերությունների համար, ինչպես նաև սպառնում են միջազգային խաղաղությանն ու անվտանգությանը»: Նա հավելել է նաև, որ թուրքական զորքերի ներխուժումը տեղի է ունեցել առանց Իրաքի կենտրոնական իշխանությունների համաձայնությանը:

Թուրքիան դեկտեմբերի 4-ին Իրաքի հյուսիսում գտնվող Բաշիքա բնակավայրի մոտ, որտեղ տեղակայված են քրդական փեշմերգայի (քրդական զորամիավորումներ) ճամբարները, տեղայակայել է իր զորքերը, այդ թվում տանկ և զրահատեխնիկա: Թուրքական կողմի հավաստմամբ՝ այդպես նրանք պատրաստվում են հարձակվել Մոսուլի վրա, որը գրավել են ԻՊ ծայրահեղականները, ինչպես նաև վարժեցնել քրդական փեշմերգային ԻՊ-ի դեմ պայքարի համար: Իրաքի ԱԳՆ-ն իր մոտ է կանչել Բաղդադում Թուրքիայի դեսպանին ու պահանջել, որ Թուրքիան անմիջապես դուրս բերի իր զորքերը երկրի հյուսիսային շրջաններից: Իրաքի արտաքին քաղաքական գերատեսչությունից հայտարարել են, որ պաշտոնական Անկարան իր զորքերը մտցրել է առանց Բաղդադի հետ համաձայնության, ինչը որակվում է որպես «թշնամական գործողություն»:

Իրաքի իշխանությունները պահանջել են պաշտոնական Անկարայից 48 ժամվա ընթացքում դուրս բերել զորքերը հյուսիսային Իրաքի տարածքներից: Իրաքի վարչապետ Հայդար էլ-Էբադին հայտարարել է, որ եթե Թուրքիայի իշխանությունները չկատարեն իրենց պահանջը, ապա իրենք ստիպված կլինեն կիրառել հնարավոր բոլոր տարբերակները, այդ թվում և Միավորված ազգերի կազմակերպության Անվտանգության խորհուրդ դիմելը: Դեկտեմբերի 8-ին այդ հայտարարությունը կրկնել է արդեն Իրաքի արտգորնախարար Իբրահիմ էլ-Ջաֆարին՝ նախազգուշացնելով, որ վերջնաժամկետը մոտենում է ավարտին:

Թուրքիայի վարչապետ Ահմեդ Դավութօղլուն նամակ է ուղարկել Իրաքի վարչապետ Հայդար էլ-Էբադիին՝ տեղեկացնելով, որ Թուրքիան մտադիր չէ հավելյալ զորքեր ուղարկել Իրաքի հյուսիսային շրջաններ: Այդուհանդերձ, Թուրքիայի ԱԳՆ-ից հայտնել են, որ իրենք չեն պատրաստվում զորքերը դուրս բերել հյուսիսային Իրաքից: