9 զոհերից երկուսը Արմավիրի մարզի Արգավանդ, մեկը՝ Նոր Կեսարիա, մյուսն էլ՝ Տանձուտ համայնքներից են

ОБЩЕСТВО 18 Декабрь, 2020 17:09

Հին Թաղեր-Խծաբերդ ուղղությամբ տեղակայված հայկական մարտական դիրքերի մերձակա տարածքում հայտնաբերված 9 հայ զոհերից երկուսը Արմավիրի մարզի Արգավանդ, մեկը՝ Նոր Կեսարիա, մյուսն էլ Տանձուտ համայնքներից են։ Չորսն էլ զորակոչվել էին «մոբով»։

NEWS.am-ի հետ զրույցում Արգավանդ համայնքի ղեկավար Արշավիր Աղաջանյանն ասաց, որ զոհերից մեկը 1979թ․-ի ծնված է, մյուսի մասին տեղեկություն չունի։ Նրա փոխանցմամբ՝ դեկտեմբերի 11-ից տղաներից որեւէ լուր չունեին հարազատները։

«Մեր գյուղից 5 հոգի էին գնացել, երկուսը վերադարձել են, երեքից տեղեկություն չունեինք, մեկը ոնց որ գերի է, դե երկուսն էլ զոհվել են»,- ասաց համայնքի ղեկավարը։

Արմավիրի մարզի Նոր Կեսարիա համայնքի ղեկավար Հրայր Գալստյանը մեզ հետ զրույցում ասաց, որ իրենց գյուղից զոհվածը 1993թ․-ին ծնված Հարություն Մկրտչյանն է։

«Հարությունը նոյեմբերի 26-ին է գնացել, հաջորդ օրն արդեն Հին Թաղերում եւ Խծաբերդում էր։ Դեկտեմբերի 12-ից նրանից որեւէ լուր չկար»,- ասաց համայնքի ղեկավարը։

Տանձուտի համայնքի ղեկավար Մխիթար Պետրոսյանն էլ NEWS.am-ի հետ զրույցում միայն հաստատեց, որ զոհերից մեկն իրենց բնակավայրից է, նույնպես «մոբով» զորակոչված։ Այլ մանրամասներ համայնքի ղեկավարը չհաղորդեց։

Ավելի վաղ հայտնել էինք, որ 9 հայ զոհված զինծառայողներից երկուսը Արմավիրի մարզի Առատաշեն, մեկն էլ Մրգաշատ գյուղերից էին։

Նախօրեին Պաշտպանության բանակից հայտնել էին, որ դեկտեմբերի 16-ին Արցախի Հանրապետությունում տեղակայված ռուսական խաղաղապահ զորախմբի կողմից ՊԲ-ին է փոխանցվել, նախնական տեղեկություններով, Հին Թաղեր-Խծաբերդ ուղղությամբ տեղակայված հայկական մարտական դիրքերի մերձակա տարածքում հայտնաբերված 9 հայ զինծառայողի մարմին, որոնց զոհվելու հանգամանքները դեռեւս անհայտ են։

Արցախի նախագահ Արայիկ Հարությունյանը դեկտեմբերի 16–ին ասել էր, որ Խծաբերդի ուղղությամբ մի քանի տասնյակ զինծառայողներ գերի են ընկել ադրբեջանական կողմին։

Հիշեցնենք նաեւ, որ ադրբեջանական կողմը խախտելով նոյեմբերի 9-ին ստորագրված եռակողմ հայտարարության պահանջները, դեկտեմբերի 12-ին վերսկսել էր հարձակողական գործողությունները Արցախի Հանրապետության Հին Թաղեր եւ Խծաբերդ բնակավայրերի ուղղությամբ: Վարչապետի խոսնակ Մանե Գեւորգյանն անդրադառնալով ադրբեջանական հարձակմանն ասել էր, որ այդ պետք է առաջին հերթին արժանանա ՌԴ խաղաղապահների արձագանքին: Ավելի ուշ Գեւորգյանը հայտնել էր, որ հայկական կողմը գրավոր եւ բանավոր բազմիցս դիմել է ռուս խաղաղապահներին, որպեսզի նրանք Հին Թաղեր-Խծաբերդ հատվածում իրականացնեն իրենց գործառույթը եւ այդ մասին ամենաբարձր մակարդակով ձեռք է բերվել պայմանավորվածություն։

Ադրբեջանական հարձակման հետեւանքով, Հին Թաղեր եւ Խծաբերդ գյուղերն անցել են Ադրբեջանի վերահսկողության ներքո։ Դեկտեմբերի 13-ի դրությամբ պաշտոնապես հայտարարվել էր միայն 6 վիրավորի մասին։