«Ար­մա­տա­կան փո­փո­խու­թյուն­ներ պետք է մտցնենք մեր ար­տա­քին քա­ղա­քա­կան ռազ­մա­վա­րու­թյան մեջ».«Փաստ»

«Փաստ» օրաթերթը գրում է

Թշնամու հիմնական նպատակն անփոփոխ է՝ Արցախի և հայոց պետականության կործանում, իսկ Արցախի կործանումն ինքնին հայոց պետականության կործանումն է: Արցախի նախագահի խորհրդական Դավիթ Բաբայանի դիտարկումն է, որի հետ զրույցում անդրադարձել ենք մի շարք հարցերի՝ հաշվի առնելով առկա իրողությունները: «Թշնամու մեթոդները ևս չեն փոխվել. իր նպատակին փորձում է հասնել պատերազմի, ցեղասպանության միջոցով:

Մինչդեռ այսօր առկա իրողությունն այն է, որ Արցախը կանգուն է, տղաները ցույց են տալիս օրինակելի, աներևակայելի խիզախություն, որը նույնիսկ համաշխարհային պատմության համար է բացառիկ օրինակ: Ընդհանուր առմամբ, այսօր ունենք թշնամու ագրեսիա, պատերազմը, և սեփական հողի, ընտանիքի, հայրենիքի համար պայքար ու դիմադրություն»,-«Փաստի» հետ զրույցում ասաց Դ. Բաբայանը: Ադրբեջանա-թուրքական տանդեմի կողմից մինչ այս ձեռքբերված համաձայնությունները շարունակ խախտելու ոճը Դ. Բաբայանը պայմանավորում է թշնամի պետությունների բնույթով: «Ահաբեկչական-ցեղասպան վարքագիծ ունեն:

Բայց անընդհատ միջազգային հանրությանը թյուրիմացության մեջ դնելը և պայմանավորվածությունները խախտելը, կարծում եմ, երկար չի կարող տևել: Մենք արդեն իսկ տեսնում ենք, որ համանախագահող երկրները դժգոհում են: Խոսքը մասնավորապես Ռուսաստանի մասին է, որովհետև սա ինչ-որ տեղ հարված է նաև Ռուսաստանին: Համաձայնություններն իրենց համար առոչինչ են, որովհետև իրենց բնույթն է այդպիսին. փորձում են օգտագործել ամեն ինչ՝ ահաբեկչական գործողություններ իրականացնելու համար: Բացի այդ, այլ հանգամանք էլ կա. զինադադարը ձեռնտու չէ, քանի որ այնքան շատ զոհեր ունեն, որ չեն կարողանում ներկայացնել իրենց հանրությանը: Եթե իրենց հասարակությունը տեսնի, թե ինչքան զոհեր են տալիս, կարող է պոռթկում լինել:

Ադրբեջանում հիմա, ըստ ամենայնի, քողարկում են, փորձում են ճնշել բոլոր բողոքները, բայց միևնույն ժամանակ այնտեղ քաղաքական ու հասարակական բողոք է հասունանում»,-ընդգծեց ԱՀ նախագահի խորհրդականը: Դավիթ Բաբայանի խոսքով, ընդհանրապես այս պատերազմը շատ բաներ ցույց տվեց, որոնցից պետք է արդեն այսօր հետևություններ անել: «Մենք արդեն պետք է ձերբազատվենք միամտությունից. միջազգային հանրություն, PR-ներ, միջազգային կազմակերպություններ:

Այո, այդ ամենը շատ կարևոր է, բայց անվտանգության, բնականոն զարգացման ամենակարևոր գրավականներից մեկը մեր երկկողմ հարաբերություններն են եղբայրական երկրների հետ: Կարծում եմ՝ այս պատերազմը պետք է ցույց տա, որ ճիշտը դա է, որովհետև մենք էլ երբեմն վարում ենք այնպիսի քաղաքականություն, ինչն էֆեկտիվ չէ: Պետք չէ հույս դնել ինչ-որ կազմակերպությունների ու այլ պետությունների վրա, որոնք իվիճակի չեն ազդեցություն ունենալ և առավելագույնը կարող են միայն բարոյական աջակցություն ցուցաբերել:

Դրա համար արմատական փոփոխություններ պետք է մտցնենք մեր արտաքին քաղաքական ռազմավարության մեջ, դասակարգենք երկրները: Առաջին կատեգորիայում պետք է եղբայրական երկրները լինեն, երկրորդում՝ դաշնակից երկրները, երրորդում՝ հարևան երկրները, չորրորդում՝ երկրներ, որոնց հետ պարզապես պետք է ֆորմալ կապեր պահպանենք: Հենց այս կերպ պետք է առաջնորդվել ու շարունակել: Իհարկե, դա չի նշանակում, որ պետք է հրապարակենք: Բայց, օրինակ՝ Ռուսաստանի հետ, որը եղբայրական երկիր է, պետք է զարգացնենք հարաբերությունները: Այլ կատեգորիայի երկրների հաշվին եղբայրական երկրների հետ հարաբերությունները վատթարացնելն անթույլատրելի է:

Երբ այս ռազմավարությունը լինի, շատ հարցերի պատասխան ավելի հեշտ կլինի, ու արձագանքն ավելի օպերատիվ կլինի»,-ընդգծեց Դավիթ Բաբայանը: Նա շեշտեց արմատական փոփոխություններ մտցնելու անհրաժեշտության մասին, որ այլևս չնայենք, թե ինչ կասեն այս կամ այն կազմակերպությունները: «Ունենք պատերազմ, ունենք օրհասական վիճակ, և պետք է հարցերը դիտարկենք ու աշխատենք՝ ով է եկել մեզ օգնելու, ով կարող է իրականում մեզ օգնել, և ում հետ են մեր շահերը համընկնում տրամաբանության մեջ:

Մենք զոհեր ենք տալիս, և ոչ ոք իրավունք չունի այդ ամենն անտեսել: Սա արդեն գոյի պայքար է, «մառլեզոնյան բալետը» վերջացել է: Այս ամենը պետք է հաշվի առնենք: Մենք պետք է լավ հասկանանք, որ ճիշտ քաղաքականություն վարելու դեպքում մեր դերակատարությունը, մեր գործոնն ավելանում է: Այսինքն, այդկերպ մենք հետագայում ավելի շատ դիվիդենտներ կարող ենք քաղել: Իսկ դրա համար պետք է պրոֆեսիոնալիզմ և հայրենասիրություն, ուրիշ ոչինչ պետք չէ»,-եզրափակեց Դավիթ Բաբայանը:

Մանրամասները՝ «Փաստ» օրաթերթի այսօրվա համարում