Առաջնագիծ մեկնած և ժամկետային զինծառայող հայ հայտնիները

Արցախում սկսված պատերազմը մեկ գաղափարի շուրջ է հավաքել Հայաստանում, Արցախում և սփյուռքում ապրող մեր հայրենակիցներին: Հայ հայտնիներն էլ անմասն չեն ստեղծված իրավիճակին, շատերն այս օրերին զբաղված են սնունդ և անհրաժեշտ պարագաներ հավաքագրելով, ոմանք էլ ռազմաճակատ են մեկնել:

Դերասան Գևորգ Գրիգորյանը պատերազմի հենց առաջին օրը ֆեյսբուքյան գրառմամբ հայտնեց, որ կամավոր ռազմաճակատ է մեկնում: Դերասանը պարբերաբար գրառումներ է կատարում և լուսանկարներ տեղադրում Արցախից: Վերջին գրառումներից մեկում Գևորգը գրել էր, որ երբ վերադառնա, 6 երեխա է ունենալու:

Երգիչ Արսեն Սաֆարյանն էլ հոկտեմբերի 1-ին լուսանկար էր հրապարակել զինվորական համազգեստով և գրել. «Մենք գնացինք»: Մեկնելուց օրեր անց Արսենը ևս մեկ լուսանկար էր հրապարակել ռազմաճակատ ուղարկված սնիկերսը ձեռքին և գրել. «Ձեր ուղարկած սերը, ջերմությունն ու սնիկերսները հասնում են մեզ: Մենք էլ խոստանում ենք վերադառնալ ու հազարապատիկը տալ` և՛ սեր, և՛ ջերմություն, և՛ սնիկերս»:

ՀՀ վաստակավոր արտիստ, դերասան Բաբկեն Չոբանյանը ևս այս օրերին կամավոր առաջնագծում է, որտեղ նաև նշել է իր 43-ամյակը: Օրեր առաջ Բաբկենը լուսանկար է հրապարակել առաջնագծից և գրել. «Հաղթելու ենք»:

«Բանակում» սերիալից հայտնի Մակարյանը` իրականում Վահան Թովմասյանը, պատերազմի առաջին օրերին կամավոր Արցախ մեկնեց: Tert.am Life-ի հետ զրույցում նա ասել էր, որ կանի այն, ինչ կարող է: Եթե պետք լինի, առաջին գծում կկռվի, պետք լինի` տղաների համար ճաշ կպատրաստի:

Դերասան Հայկ Չոմոյանի Արցախում գտնվելու մասին հայտնի դարձավ, երբ Հայկը վիրավորվեց: Tert.am Life -ի հետ զրույցում դերասանը պատմել է, որ հրազենային վիրավորում է ստացել ոտքերի շրջանում: Հայկին վիրահատել են, արդեն իրեն լավ է զգում:

Մարտարվեստների մարզիչ, դերասան Էրիկ Օհանյանը, ով սեպտեմբերի 29-ից, որպես պահեստազորային սպա, կամավոր առաջնագծում էր, հոկտեմբերի 4-ին դեմքի շրջանում բեկորային վիրավորում էր ստացել: Դերասանին վիրահատել էին և, իր խոսքով, ապաքինվելուն պես պետք է հետ գնա առաջնագիծ:

Սոս Սարգսյանի անվան համազգային թատրոնի դերասաններ Արման Նավասարդյանն ու Վարշամ Գևորգյանը ևս առաջնագծում են, ինչի մասին հայտնել էր թատրոնի գեղարվեստական ղեկավար, դերասանուհի Նարինե Գրիգորյանը:

«Վերջին ուսուցչից» լսարանին հայտնի դերասան Վահագն Սամվելյանը, ով ժամկետային զիվորական ծառայության է մեկնել այս ամռանը, վիրավորվել է սեպտեմբերի 28-ին: Նա արհեստական կոմայի մեջ էր, սակայն օրեր առաջ բժիշկներն արթնացրել են Վահագնին:

Ժամկետային զինծառայող, «Վերջին ուսուցչից»  լսարանի հայտնի դերասան Արման Սիմիկյանը ևս Արցախում է ծառայում: Նա հրազենային վիրավորում է ստացել, հիմա հիվանդանոցում է:

«Ազգային երգիչ» նախագծից հայտնի Արթուր Խաչենցը ևս կամավոր առաջնագծում է: Ծննդով Արցախից Արթուրը տեսանյութ էր տեղադրել սոցցանցերի իր էջերում, որտեղ երգում էր «Գինի լից» հայտնի երգը: Նա տեսանյութին կից գրել էր. «Պատերազմական իրավիճակներում մարտական ոգին երգով բարձրացնելը, երբեմն, անհրաժեշտություն է»:

Դերասաններ Դավիթ Մարդյանն ու Դավիթ Աֆրիկյանը ևս առաջնագիծ են մեկնել, սակայն Հայաստանի սահմանին՝ մարտունու շրջանում: Այդ մասին Tert.am Life-ին ասել էր Դավիթ Աֆրիկյանի եղբայրը` Հայկ Աֆրիկյանը, ով նրանց սահման էր ուղեկցել:

Առաջնագծում է նաև դերասան Դավիթ Հակոբյանը, ով պատերազմի առաջին օրերին ասել էր, որ դեռ Հայաստանի տարածքում է, չգիտի, թե իրեն որ ուղղությամբ կտանեն:

Ռադիոհաղորդավար Եգոր Գլումովը պատերազմի առաջին օրերին ֆեյսբուքյան գրառմամբ հայտնել էր, որ դեռ այնտեղ չէ, որտեղ ցանկանում է լինել: Շուշանիկ Արևշատյանը Tert.am Life-ի հետ զրույցում հաստատեց, որ նա արդեն առաջնագծում է: