«Մենք պայքարում ենք իրավունքի, անվտանգ ապրելու, իսկ թուրքը` զավթելու համար». Վազգեն Սիսլյան

ИНТЕРВЬЮ 1 Октябрь, 2020 12:58

Մեր մարտունակությունը, մեր ռազմավարությունը, մեր պրոֆեսիոնալիզը շատ բարձր է: Մենք պայքարում ենք այն իրավունքի համար, որը մեզանից խլել են, իսկ ադրբեջանցին` ուրիշի աշխատածն ու կառուցածը սեփականացնելու համար: Հայը իրենից խլված իրավունքը վերադարձնելու, գոյություն պաշտպանելու ու անվտանգ ապրելու, իսկ թուրքը զավթելու ու իր թրքաբարո գործն անելու համար է պայքարում: Այսօր Ադրբեջան և Թուրքիա պետություններն օրենքով պետք է գոյություն չունենան: Past.am-ի հետ զրույցում ասաց «Վան» օպերացիայի ղեկավար, ԱՍԱԼԱ-ի անդամ Վազգեն Սիսլյանը:

«Մենք ավելի ուժեղ ենք, քան Թուրքիան ու Ադրբեջանը միասին վերցրած: Մենք մեր հողի վրա ենք: Պատահական խոսքեր չեմ ուզում ասել, բայց մենք ամուր ենք, մենք ճիշտ ենք ու մենք, վերջիվերջո, իրավունքի տեր ենք: Մեծ պետություններն իրականում այսօր լավ գիտեն, թե Թուրքիան ինչպես է իր ահաբեկիչներին ուղարկում նույն Եվրոպա: Այդ ամենից հետո նոր միայն սկսում են անհանգստանալ: Թուրքիան ոչ թե իր քաղաքացուն, այլ մարդասպանների է ուղարկում: Ու դրանք անգամ Ադրբեջանի գլխին են փորձանք և արդեն այսօր խնդիրներ ունեն: Այնպես որ, ինչ էլ լինի, մենք պետք է առաջին հերթին հույսը մեզ վրա դնենք: Մենք շատ ուժեղ Սփյուռք ունենք և ամեն ինչ ճիշտ կազմակերպելու դեպքում միայն մեր ուժերով ամեն ինչի կարող ենք հասնել: Հավատացնում եմ, շատ ուժեղ ենք, երբ իրար հետ ենք: Իսկ աշխարհը լռում է մինչև այն պահը, երբ արդեն իր համար է վտանգ զգում: Նոր-նոր սկսում են ինչ-որ բաներ ասել: Դա ինձ համար ոչ մի նշանակություն չունի: Ասում են, հայտարարում են, բայց այդ սրիկաները գալիս են, չէ՞, դեմն առնողն ո՞վ է: Դեմն առնողը մենք ենք: Ինչ ուզում են՝ թող անեն: Մի լավ խոսք կա այսօր, որը գրվում ու լսվում է ամենուրեք: Հաղթելու ենք: Ես իսկապես վստահ եմ, որ հաղթելու ենք: Պատերազմի դաշտում հենց այս իրավիճակն է: Մեր էրեխեքն առյուծի սիրտ ունեն, զինվորին նայում ենք՝ ժպիտը դեմքին է: 18-19 տարեկան տղան պայքարում է, ասում՝ մինչև վերջ գնալու ենք, իսկ ադրբեջանցի սրիկան լացում է»,-ասաց մեր զրուցակիցը՝ շեշտելով, որ կարևոր է բանակին լիարժեք վստահելու գիտակցումը:

«Մենք պրոֆեսիոնալ բանակ ունենք: Պետք չէ տեղից թելադրել, ասել՝ ինչո՞ւ սա չենք օգտագործում, այն չենք օգտագործում: Սա բանակ է, զինվորական կառույց է, ամեն ինչ բացահայտ չի լինի: Ամեն մի քաղաքացի պարտավոր չէ ամեն ինչ իմանալ: Բանակին պետք է վստահել հարյուր տոկոսով: Վերջիվերջո, մենք ենք բանակը, ժողովուրդն էլ բանակ է»,-եզրափակեց նա:

Աննա Բադալյան