Էա­կան չէ՝ ինչ կազմակերպություն է ուզում հանք շա­հա­գոր­ծել, դա ուղ­ղա­կի չի լի­նե­լու. Ամուլ­սա­րի ծրագ­րի հա­վա­նա­կան գնոր­դը պետք է եր­կու փաստ հաշ­վի առ­նի

Ամուլսարի խնդիրը չի հանգուցալուծվում շահագրգիռ երկու կողմերից և որևէ մեկի օգտին: Մի դեպքում՝ Ջերմուկի բնակիչները չեն բացում դեպի Ամուլսար տանող ճանապարհները, մյուս կողմից էլ՝ «Լիդիանը» չի հրաժարվում հանքը շահագործելու մտքից: 

Եվ այնպիսի տպավորություն է, թե կառավարությունն էլ մնացել է երկու քարի արանքում: 

Օրերս համացանցում սկսեց ակտիվորեն շրջանառվել այն տեղեկատվությունը, թե հանքի շահագործման իրավունքը փոխանցվելու է, կամ էլ այն գնելու է մեկ այլ հանքարդյունահանող ընկերություն, սակայն կորոնավիրուսը խանգարել է այդ ծրագրերի իրականացմանը և եռակողմ պայմանագրի կնքմանը: «Լիդիան Արմենիա» ընկերության խոսնակը լրատվամիջոցների հետ զրույցում ո՛չ հերքել, ո՛չ էլ հաստատել էր այս լուրը:

Ջերմուկ համայնքի բնակիչ Շիրակ Բունիաթյանը նշում է, որ հանքարդյունահանման լիցենզիայի վաճառքի հետ կապված տեղեկություններ պարբերաբար հայտնվում են, սա նորություն չէր: 

«Երկու տարի է՝ նմանատիպ խոսակցություններ կան, որ ամեն ինչ կարող է այդ սցենարով ընթանալ, բայց մենք հենց սկզբից ասել ենք, որ մեզ համար էական չէ՝ Ամուլսարում «Լիդիանը» կփորձի հանք շահագործել, թե մեկ այլ կազմակերպություն: Դա ուղղակի չի լինելու»,-«Փաստի» հետ զրույցում ասում է Բունիաթյանը: 

 

Սակայն այստեղ ևս մեկ հարց է առաջ գալիս՝ որևէ կազմակերպություն, իմանալով, թե ներկայումս ինչպիսի իրավիճակ է տիրում Ամուլսարի շուրջ, արդյոք կորոշի՞ մտնել նման «ծանրության» տակ: 

«Եթե նայում ենք իրավիճակին, պետք է ենթադրել, որ որևէ խելոք մարդ կամ կազմակերպություն չի գնի և չի փորձի շահագործել Ամուլսարի ծրագիրը, քանի որ կա հանրային մեծ բողոք դրա շուրջ: Բայց պատմությունը ցույց է տալիս, որ երբեմն արկածախնդիրներ լինում են: Ժողովուրդը պատրաստ է դիմակայել ցանկացած գնորդի, որը կփորձի Ամուլսարում հանք շահագործել: 

Բայց մյուս կողմից մտածում եմ՝ եթե կառավարության կողմից երաշխիքներ լինեն տվյալ կազմակերպությանը, հնարավոր է դա ինչ-որ հիմք հանդիսանա, որ այդ կազմակերպությունը գնի Ամուլսարի ծրագիրը, բայց մենք հավատարիմ ենք մեր դիրքորոշմանը, այն չի փոխվելու»,-նշում է մեր զրուցակիցը: 

 

Ամուլսարի շուրջ ամեն ինչ մնացել է նույնը, արտակարգ դրության հետ կապված «դիրքերը» շրջիկ էին, իսկ օրերս բնակիչները նորից դիրքերում հերթապահություն են սահմանել:

Բունիաթյանը նշում է՝ «Լիդիանն» ունի հանքարդյունաբերություն իրականացնելու թույլտվություն, որը տրվել է նախկին իշխանությունների կողմից: «Այն վաճառելը, նվիրելը, չեղյալ համարելը՝ բոլորը նրա իրավունքներն են: Մենք փորձում ենք չմտնել իրենց տիրույթ, թե ինչպես նրանք կվարվեն իրենց լիցենզիայի հետ»,-ասում է Բունիաթյանը

Նա նշում է՝ կառավարության համար սա ծանր թեմա է: «Հակառակ դեպքում այն երկու տարի չէր երկարի: Իրականում նման մասշտաբների կողմնակիցներ ունենալով, որոնք պնդում ենք, թե Ամուլսարը պետք է սար մնա, կառավարությունը կարող էր վաղուց այս հարցին լուծում տալ: Այստեղ թերևս մեկ բան է մնում՝ խորհուրդ տալ այն հավանական գնորդին, եթե այդպիսին կա: 

Բացի նրանից, որ կա խելամիտ հանրության դիրքորոշումը Ամուլսարի հարցում, որ այն պետք է սար մնա, արդեն մեկ տարուց ավելի է՝ հարուցված է քրեական գործ Ամուլսարում ռիսկերը միտումնավոր թաքցնելու կասկածանքով, և չկան երաշխիքներ, որ քննությունն ավարտվելուց հետո ուղղակի «Լիդիանը» չի կորցնի լիցենզիան: Հավանական գնորդը դա պետք է հաշվի առնի»,-եզրափակում է Շիրակ Բունիաթյանը:

ԼՈՒՍԻՆԵ ԱՌԱՔԵԼՅԱՆ