«Դեպքեր չգիտեմ, երբ տնտեսական հարցերում Գագիկ Ծառուկյանը մինչև հիմա անիրատեսական գնահատականներ հնչեցրած լինի»

Past.am

Հայաստանի քաղաքական դաշտում նոր՝ լիբերալ-պահպանողական ուղղվածության կուսակցություն կհայտնվի։ Երեկ այս մասին լրագրողների հետ հանդիպմանը հայտարարեց քաղաքագետ Սուրեն Սուրենյանցը։ «Իմ համակիրների խմբի հետ նախաձեռնել եմ «Դեմոկրատական այլընտրանք» կուսակցության ստեղծումը։ Հեղափոխությունից հետո Հայաստանում վերականգնվել են ընտրական ինստիտուտները, ինչը ենթադրում է գաղափարական, քաղաքական, մրցակցային միջավայրի ձևավորում, որը թույլ կտա ակտիվ մարդկանց ինդենտիֆիկացվել քաղաքական դաշտում, ռեալիզացնել իրենց հնարավորությունները։ Եթե հեղափոխության արժեքները չկապիտալիզացվեն, Հայաստանում շատ կարճ ժամանակ հետո կարող է վերականգնվել բռնապետական կառավարման համակարգը, մանավանդ որ նոր իշխանությունը, կարծես թե, չի հրաժարվում սուպերվարչապետական համակարգից, խորհրդարանի դերակատարությունը Հայաստանում դարձյալ հավասարեցված է նվազագույնի։ Ցավոք, խորհրդարանը քաղաքական պայքարի հիմնական հարթակը չէ՝ անկախ այն հանգամանքից, որ ձևավորվել է միանգամայն օրինական ընտրությունների միջոցով»,-ասում է Սուրենյանցը։

Նա ընդգծում է, որ միևնույն ժամանակ քաղաքական իրենց ուժը չի գնալու գործող իշխանությանը հակադրվելու ճանապարհով։ «Մերժում եմ որևէ նախաձեռնություն, որը տեղավորվում է սև-սպիտակի արհեստական դիլեմայի մեջ։ Օրինակ՝ «Վերնատանը» կային մարդիկ, որոնք ոչ թե ունեին քաղաքական, գաղափարական ընդհանրություն, այլ հավաքվել էին գործող իշխանության մերժման հիմքով։ Երբ երկրում ընտրությունների ինստիտուտը վերականգնված է, կա քաղաքական մրցակցություն, այս մոտիվով քաղաքական ուժերի համախմբումը հեռանկար չունի։ Նույնը վերաբերում է նաև Արման Բաբաջանյանի նախաձեռնությանը, որը տեղի է ունենալու դեկտեմբերի 14-ին։ Այն նույնպես արհեստական է, որովհետև այնտեղ էլ հավաքվելու են միայն այն քաղաքական ուժերը, որոնք մերժում են հակահեղափոխականներին՝ հին իշխանության ներկայացուցիչներին»,-նշում է բանախոսը։

Սուրենյանցն ասում է, որ պետք է դուրս գալ հեղափոխական էյֆորիկ վիճակից, դադարել ֆետիշացնել հեղափոխությունը և երևույթներին նայել բանական քաղաքական տրամաբանության շրջանակներում։ «Ներկայումս գործադիր և օրենսդիր իշխանությունները մեկ քաղաքական ուժի և նույնիսկ մեկ անձի տոտալ վերահսկողության ներքո են, հետևաբար որևէ բան չի կարող խանգարել արագ ռեֆորմների իրականացմանը։ Հեղափոխությունն անշրջելի է, բայց միևնույն ժամանակ գործող իշխանության վարած ներքին և արտաքին քաղաքականությունն ինձ թույլ չի տալիս հայտարարել, որ սատարում եմ իշխանությանը։ Այսօրվա ձախողումները չի կարելի անընդհատ բացատրել նախկինների գործոնով։ Սկզբունքային հարցերում ունեմ հակասություններ՝ սկսած արտաքին, կադրային, տնտեսական քաղաքականությունից։ Ամենակարևորը հեղափոխությունից հետո Հայաստանում չի փոխվել համակարգը՝ քրեաօլօգարխիկ համակարգը հեռացել է, բայց մենք չունենք նոր համակարգ։ Բացարձակապես չեմ վիճարկում, որ դեկտեմբերի 9-ի ընտրությունները լեգիտիմ են եղել, այն որ գործող քաղաքական իշխանությունն իսկապես օրինակարգ է թե՛ քաղաքական, թե՛ իրավական հարթության վրա։ Բայց մեկ օրինական ընտրությունները բավարար չեն, որպեսզի խոսենք երկրում ժողովրդավարության անշրջելիության մասին։ Սուպերվարչապետական համակարգից հրաժարվելու որևէ քայլ չի արվել, խորհրդարանը, ինչպես նախկինում, այնպես էլ հիմա, օրենքներ դակելու գործառույթ ունի, ընդդիմությունը՝ խոսքս ԲՀԿ-ի և «Լուսավոր Հայաստանի» մասին է, սահմանափակ դերակատարություն ունի, «Իմ քայլն» իմ իմացած ամենաթույլ խորհրդարանական մեծամասնություններից մեկն է։ Այսինքն՝ ունենք անվերահսկելի գործադիր իշխանություն»,-փաստում է Սուրենյանցը։

Խոսելով քաղաքական տարբեր ուժերի հետ հնարավոր համագործակցության մասին՝ Սուրենյանցը նշեց, որ շատ հարգալից և տոլեռանդ վերաբերմունք ունի խորհրդարանում ներկայացված ընդդիմադիր ուժերի՝ «Բարգավաճ Հայաստանի» և «Լուսավոր Հայաստանի» նկատմամբ, սակայն առայժմ դաշինքներ կամ ալյանսներ կազմելու հարց իրենք օրակարգում չունեն։

Նա անդրադարձավ նաև վերջին օրերի ամենաքննարկված թեմաներից մեկին՝ քաղաքապետ Հայկ Մարությանի և հնարավոր ներդրողների հանդիպման շուրջ առաջացած աղմուկին։ «Թե՛ «Կամազների» նվիրատվության, թե՛ ներդրումների հարցերով Հայկ Մարությանի բացատրություններն ինձ համոզիչ չեն թվում։ Երկու կողմերից ավելի շատ հակված եմ հավատալու պարոն Ծառուկյանի տեսակետին, որովհետև պատճառ չեմ տեսնում չհավատալու նրա պնդմանը։ Դեպքեր չգիտեմ, երբ տնտեսական հարցերում Գագիկ Ծառուկյանը մինչև հիմա անիրատեսական գնահատականներ է հնչեցրել, որպեսզի կասկածի տակ դնեմ նրա ասածները»,-հավելեց քաղաքագետը։