Տոնային քսուկ. ինչպե՞ս է առաջացել այն ստեղծելու միտքը

Հին ժամանակներում եգիպտացի կանայք փորձում էին իրենց մաշկը գունատ դարձնել, քանի որ դա գեղեցիկ էր համարվում: 

Այդ նպատակով նրանք տարբեր միջոցներ էին օգտագործում, որոնք, ըստ էության, կարող են համարվել առաջին տոնային (երանգային) քսուկները: 

Այդ նպատակով ամենաշատը օգտագործվում էր ալ յուրի, կարագի և կավիճի խառնուրդը: Առաջին ժամանակակից տոնային քսուկն ստեղծվել է 1936 թվականին այդ տարիների թիվ մեկ դիմահարդար-կոսմետոլոգ Մաքս Ֆակտորի կողմից: 

Այդ ժամանակ կանայք արդեն իսկ ակտիվորեն օգտագործում էին շրթներկ, կարմրաներկ (ռումյանա) և տուշ, իսկ տոնային քսուկները օգտագործում էին միայն դերասանները: 

Դիմափոշին (պուդրա) մեծ դեֆիցիտ էր, և այն արտադրում էին միայն մի քանի ընկերություններ: 

Մաքս Ֆակտորը կոսմետիկայի արտադրության սեփական ընկերությունն ուներ և հանդիսանում էր կինոարտադրության համար պահանջվող կոսմետիկայի մատակարար: 

Այն ժամանակ կոսմետոլոգը նկատել էր, որ խիտ դիմահարդարումը և դիմափոշին դերասանի դեմքին տալիս են դիմակի նմանություն, և դեմքը դառնում է անբնական։ 

Բանն այն է, որ սկզբից դերասանների դեմքին յուղերի ու մոմի խառնուրդ էին քսում, որից հետո ակտիվորեն դիմափոշի ցանում: 

Այս ամենը պահանջում էր դիմահարդարի ճշգրիտ աշխատանք, իսկ առաջացած անբնական դիմագծերի էֆեկտը վերացվում էր գրագետ կերպով լուսավորելու շնորհիվ: 

Եվ Մաքս Ֆակտորը որոշեց միավորել յուղը, մոմը և փոշին՝ նպատակ ունենալով ստեղծել դիմահարդարման նյութի այնպիսի նոր տեսակ, որը կլինի հեղուկ քսուկի տեսքով: 

Ստեղծված նոր նյութը հեշտությամբ էր քսվում դեմքին սպունգի օգնությամբ, և ամեն ինչ ստացվում էր շատ բնական: 

Մաքս Ֆակտորի գյուտը իսկապես կարելի է հեղափոխական համարել, քանի որ տոնային քսուկը նաև հնարավորություն էր տալիս կանանց այն օգտագործել առօրյա կյանքում: 

Նախկինում օգտագործվող դիմափոշին չափազանց չոր էր, անհավասարաչափ էր նստում դեմքին և հաճախ անգամ ընդգծում էր մաշկի թերություններն ու կնճիռները: 

Մաքս Ֆակտորի նոր քսուկը հավասարապես էր ծածկում մաշկը և բաց տեղեր չէր թողնում:

 Այդ իսկ պատճառով, այս կոսմետիկ արտադրանքը կարելի է անվանել անցյալ դարի կոսմետիկայի ոլորտի ամենահաջողված գյուտերից մեկը: 

Տոնային քսուկի շնորհիվ դերասանները ստացան արագ և բարձրորակ դիմահարդարման հնարավորություն: 

Անգամ Չարլի Չապլինը նկարահանվելուց առաջ օգտագործում էր Մաքս Ֆակտորի գյուտը: Ժամանակակից արտադրողները այսօր առաջարկում են տարբեր երանգների և տարբեր հիմքերով քսուկների հսկայական ընտրանի: 

Ներկայումս բոլոր տոնային քսուկները տարբերակվում են խտության աստիճանով: Ամենաթեթևները անվանվում են տոնային խոնավացուցիչներ: 

Դրանք կարող են օգտագործել մաքուր մաշկով աղջիկները ցերեկային քսուկի փոխարեն, եթե կարիք չունեն թաքցնել դեմքի թերությունները: 

Այդ քսուկները միայն մի քիչ հավասարեցնում են տոնայնությունը, խոնավեցնում և սնուցում են մաշկը: 

Միջին խտության տոնուսային քսուկները կարող են կատարյալ կերպով հավասարեցնել մաշկի գույնը և թաքցնել որոշ թերություններ, ինչպես թեփոտությունը և կարմրությունը: 

Եվ վերջապես, բարձր խտությամբ քսուկները մասնագիտական խնամքի միջոցներ են և օգտագործվում են լուրջ թերությունները թաքցնելու համար, ինչպես պզուկները, սպիները և այլն: 

Առաջարկվող տոնային քսուկների շրջանակը շատ լայն է, ուստի ժամանակակից կանայք հեշտությամբ կարող են ընտրել իրենց տոնային քսուկը` կախված մաշկի տեսակից և գույնից:

Նյութը հրապարակման պատրաստեց Past.am-ը