Նաիրա Զոհրաբյանը ճիշտ չի համարում ԵԽԽՎ ձմեռային նստաշրջանը բոյկոտելը

Եվրոպայի խորհրդի խորհրդարանական վեհաժողովի հայաստանյան պատվիրակության անդամ Նաիրա Զոհրաբյանը վեհաժողովի հունվարյան նստաշրջանը բոյկոտելը լավագույն տարբերակը չի համարում:

Անդրադառնալով ԵԽԽՎ-ի քաղաքական և սոցիալական հանձնաժողովների ընդունած հակահայկական զեկույցներին, որոնք հունվարին քննարկվելու են լիագումար նիստում, Նաիրա Զոհրաբյանն ընդգծեց, որ հարկավոր է ընտրել ոչ թե բոյկոտի, այլ խաղի կանոններն ընտրելու ճանապարհը:«Ես կարծում եմ, որ բոյկոտը սխալ տարերակ է:  Եվրոպայի խորհրդի անդամ է 47 երկիր, և Հայաստանն էլ լիիրավ անդամ է:  Մենք պետք է պետք է ընտրենք ոչ թե  բոյկոտի, այլ  խաղի կանոններն ընտրելու ճանապարահը»,-ասաց Զոհր աբյանը:

Անդրադառնալով ԵԽԽՎ հայաստանյան պատվիրակության հասցեին հնչող քննադատությանը՝ Նաիրա Զոհրաբյանն ընդգծեց, որ եթե անգամ փոփոխություններ լինեն պատվիրակության կազմում, պատվիրակությունն էլի շատ բան չի կարողանալու անել: «Մի կողմն դնենք շատերի նյարդերի վրա ազդող խավիարը, նավթադոլարները:  Եթե դրանք հանենք դնենք մի կողմ, անգամ ստարտային պայմաններում այսօր Ադրբեջանը բացարձակ առավելություններ  ունի` հաշվի առնելով միայն այն հանգամանքը, որ շատ մեծ թվով թուրքական պատվիրակությունը և մեծ թվով բրիտանական ու Ալբանիայի պատվիրակությունները մի քանի այլ պատվիրակություններ, որոնց կազմում մեծ թիվ են կազմում հենց ազգությամբ թուրքերն ու ադրբեջանցիները, պաշտպանում են Ադրբեջանին՝ անգամ առանց խավիարն ու նավթադոլարները իրենց գրպանը լցնելու»,- մանրամասնեց Զոհրաբյանը:

Պատգամավորն այն կարծիքին է, որ Հայաստանը պետք է կարողանա ճիշտ օգտագործել հայկական սփյուռքի ներուժը: Նրա խոսքով` սփյուռքի ներկայացուցիչները կարող են Հայաստանի շահերը պատշաճ ներկայացնել միջազգային հարթակներում: «Ես չեմ ասում, որ մենք էլ պետք է պատգամավորների կաշառենք: ԵԽԽՎ-ում էլ  կան պատգամավորներ, ովքեր անկաշառ են: Այնպես չէ, որ բոլորը խավիար են սիրում, ոչ, այդպես չէ: Ուղղակի մենք պետք է կարողանանք ճիշտ աշխատել այդ պատգամավորների հետ: Ես գտնում եմ, որ մենք պետք է որոշակի ռազմավարության մշակենք»,- հավելեց Նաիրա Զոհրաբյանը:

ԵԽԽՎ հայաստանյան պատվիրակության ներկայացուցիչը, անդրադառնալով ԵԽԽՎ սոցիալական հարցերի հանձնաժողովի ընդունած հերթական հակահայկական զեկույցին Սարսանգի ջրամբարի վերաբերյալ, նկատեց, որ չի ցանկանում թերագնահատել այդ զեկույցը, ինչպես չի թերագնահատել վեհաժողովի քաղաքական հանձնաժողովի ընդունած հակահայկական զեկույցը:  «Դրանք խորհրդատվական բնույթ են կրում, բայց դրանք ունեն քաղաքական ազդեցություն: Եվ,  մասնավորապես, Ադրբեջանի նախագահ Ալիևի համար դրանք ունեն կենսական նշանակություն՝ միջազգային հարթակում մթնոլորտ փոխելու և նաև Ադրբեջանի ներսում այդ քաղաքական զեկույցների շահարկման համար: Չնայած դրանք խորհրդատվական բնույթի են, բայց մեկ րոպե անգամ չեմ թերագնահատի այդ զեկույցների քաղքաքական ազդեցությունը: Ինչ վերաբերում է կոնկրետ Սարսանգի ջրամբարի վերաբերյալ զեկույցին, դա  նույնպես կունենա այն ազդեցությունը, ինչ Ուոլթերի զեկույցը:  Ըստ էության,  պարբերությունները բառացի արտագրված են հենց Ուոլթերի զեկույցից»,- եզրափակեց պատգամավորը:

ԵԽԽՎ սոցիալական հարցերի հանձնաժողովը 9 դեմ, 16 կողմ ձայների հարաբերակցությամբ ընդունել է Սարսանգի ջարամբարի վերաբերալ հակահայկական զեկույցը: Հանձնաժողովի նիստին հայկական պատվիրակությունից մասնակցել են Վահան Բաբայանը և Նաիրա Կարապետյանը: ԵԽԽՎ-ն ընդունել է բոսնիացի պատգամավոր Միլիցա Մարկովիչի խիստ կողմնակալ և քաղաքական բառապաշարով զեկույցը: Զեկույցը կրում է «Ադրբեջանի սահմանամերձ շրջանների բնակիչները միտումնավոր զրկված են ջրից» խորագիրը: