Տասը երկիր դեռ չի վավերացրել Հայաստանի եւ ԵՄ-ի միջեւ համաձայնագիրը, բայց նրանք պատրաստվում են դա անել, եւ քաղաքական որեւէ խոչընդոտ չկա։ Այս մասին ասել է Հայաստանի ԱԳ նախարար Զոհրաբ Մնացականյանը ԱՄՆ Մարշալի Գերմանական հիմնադրամին տված հարցազրույցում։
«Դա պարզապես ներքին ընթացակարգ է։ Իրականում բոլոր դրույթների 80 տոկոսն իրականացման փուլում է։ Մենք համաձայնեցրել ենք ճանապարհային քարտեզը իրականացման համար, եւ իրականացումն ընթանում է լրիվ թափով»,- ասել է նա։
Մնացականյանն ընդգծել է, որ Եվրոպան օրակարգի մշտական մասնակից է Հայաստանի զարգացման գործում, նրա ինստիտուտների, պետության զարգացման եւ նրա տնտեսության զարգացման գործում։ «2018 թվականի թավշյա հեղափոխությունից հետո մենք ինտենսիվորեն եւ ակտիվորեն մասնակցում ենք ԵՄ-ի հետ քաղաքական եւ տնտեսական գործունեությանը։ Այդ գործընթացի շրջանակում մենք կցանկանայինք տեսնել ԵՄ-ի հետ վիզային ռեժիմի ազատականացման երկխոսություն, որը կհանգեցնի համաձայնագրի»,- ավելացրել է նա։
Արտաքին գործերի նախարարն ասել է, որ Հայաստանի եւ ԵՄ-ի միջեւ Համապարփակ եւ ընդլայնված գործընկերության համաձայնագիրը (CEPA) նախատեսում է Հայաստանի եւ ԵՄ-ի միջեւ մերձեցում եւ առեւտրի ու ներդրումների ընդլայնում։ «Այդպիսով, CEPA-ն մեզ համար գործիք է այն նորմերի կամ չափորոշիչների հանդեպ մեր նորմերի հետագա կատարելագործման նպատակով, որոնք կարող են նպաստել մեր երկրի զարգացման կարեւոր հիմքի ստեղծմանը»,- ավելացրել է նա։
