Բասեն համայնքի բնակիչները եկեղեցի են կառուցում սեփական միջոցներով

Բասենցիները վստահ են՝ վերջապես կունենան եկեղեցի: Շիրակի մարզի Բասեն համայնքը եկեղեցի ունեցել է, սակայն 1842  թվականին կառուցված «Սուրբ Աստվածածին» եկեղեցին մեկ անգամ չէ որ խոնարհվել է: Եկեղեցին առաջին անգամ վերականգնվել է 1906 թվականին:  Ապա, ինչպես խորհրդային տարիներին մյուս եկեղեցիները, վերածվել է պահեստի՝ անտերության մատնվելով, իսկ 1988 թվականի երկրաշարժի հետևանքով այն հիմնովին փլվել է: Կարևորելով համայնքում հավատքի տուն ունենալու  անհրաժեշտությունը՝   համայնքի բնակիչները սեփական միջոցներով ու սեփական նախաձեռնությամբ որոշեցին վերականգնել եկեղեցին՝ նույն տարածքում, հին եկեղեցու քարերով: Նախ մաքրվեց եկեղեցին, ապա սկսվեցին շինարարական աշխատանքները:

Ինչպես տեղեկացրեց համայնքի ղեկավար Համլետ Պետրոսյանը, նախաձեռնությունն այնքան ոգևորիչ էր, որ այս աշխատաքներին մասնակցեցին համայնքի բոլոր բնակիչները՝ մեծից մինչև փոքր՝ ավելի քան 80 մեքենա աղբ  թափվեց, որից հետո սկսվեցին եկեղեցու կառուցման հիմնային աշխատանքները:

Սա այն եզակի դեպքերից է, որ համայնքն ինքն  իր միջոցներով է փորձում իրականացնել եկեղեցու շինարարությունը: Սակայն շինարարությունը շատ ավելի արագ կիրականացվեր, եթե չլիներ Շիրակի պատմական միջավայրի պահպանության մարզային ծառայության հետ կապված խնդիրները՝ համայնքը հին եկեղեցու փոխարեն նորի կառուցման աշխատանքները մեկնարակել էր առանց հուշարձանների պաշտպանության համապատասխան օրենքների փաթեթի տարրը պահպանելով, իսկ «եկեղեցու շինության նկատմամբ իրականացված գործողությունները (տարածքի մաքրում« քանդված պատերի ապամոնտաժում« հիմքերի փորում) հակասում են «Պատմության եւ մշակույթի անշարժ հուշարձանների ու պատմական միջավայրի պահպանության եւ օգտագործման մասին» ՀՀ օրենքի պահանջներին:

«Երկարատև քաշքշուկից հետո, Շիրակի թեմի առաջնորդ Միքայել եպիսկոպոս Աջապահյանի աջակցությամբ աշխատանքները կրկին առաջ են գնում: Պատրաստ է նախագիծը, շինարարական աշխատանքներն իրականացվում են»,-նշեց Համլետ Պետրոսյանը՝ վստահեցնելով, որ ՀՀ մշակույթի նախարարության հետ կա բանավոր պայմանավորվածություն ըստ որի որոշակի փոփոխություններ պետք է իրականացվեն նախագծում՝ հիմնականում եկեղեցու կամարների և սյուների հետ կապված: «Այդ փոփոխությունները պետք է ներկայացնենք ՀՀ մշակույթի նախարարությանը, բայց քանի դեռ շինարարությունն այդ փուլում չէ, դեռ այդ պահանջը չենք իրականացրել»,-փաստեց համայնքի ղեկավարը:

Եկեղեցու շինարարությունից  հետո, կառույցի հարավային հատվածում կկառուցվի 12 մետր բարձրության զանգակատուն: «Իմ համար, որպես համայնքի ղեկավարի, համայնքում առավել կարևոր է եկեղեցաշինությունը: Կարծում եմ, սա ամենալուրջ խնդիրն է՝ համայնքը պետք է եկեղեցի ունենա: Հատկապես այն դեպքում, երբ համայնքում, բոլորն են դա կարևորում: Երիտասարդներն իրենք են պատրաստ ցանկացած աշխատանք իրականացնել հանուն այդ նպատակի: Հուսամ՝ շատ շուտով համայնքը եկեղեցի կունենա»,-ավելացրեց Համլետ Պետրոսյանը :