ՀԱԿ-ը վստահ է՝ իրենց և «Նոր Հայաստան»-ի հանրահավաքները միմյանց ոչ թե խանգարում, այլ փոխլրացնում են

ПОЛИТИКА 20 Ноябрь, 2015 20:19

Ինչպես հայտնում է Past.am-ը, Երևանի Ազատության հրապարակում նոյեմբերի 20-ին կայացավ հանրահավաք՝ ընդդեմ սահմանադրական փոփոխությունների:

Հանրահավաքին ելույթ ունեցան «Չե՛ք անցկացնի» նախաձեռնության, ՀԱԿ-ի, ՀԺԿ-ի, «Ժառանգության», «Հիմնադիր խորհրդարանի» ներկայացուցիչներ, ինչպես նաև ազատամարտիկ Սմբատ Հակոբյանը: ՀԱԿ փոխնախագահ Արամ Մանուկյանը,որը վարում էր հանրահավաքը, կոչ արեց, որպեսզի համացանցով և հեռուստացույցով նայողները նույնպես միանան իրենց՝ գալով Ազատության հրապարակ:

«Ֆեյսբուքյան ընդդիմությունից Գալուստ Գրիգորիչը չի վախենում»,- հավելեց նա:

«Չե՛ք անցկացնի» նախաձեռնության ներկայացուցիչ Արշակ Մուսախանյանն իր ելույթում նշեց. «Մոտ 700 հազար «այո»-ի ապահովումն իշխանությունների համար բարդագույն խնդիր է, գնալով ավելի ու ավելի ենք համոզվում, որ իշխանությունները սոցիալական որևէ հենարան չունեն:

Նրանց վարկանիշը 0 է, իսկ «ոչ»-ի համակիրների ակտիվ մասնակցության դեպքում իշխանության վերարտադրման պլանը կտապալվի»: Ազատամարտիկ Սմբատ Հակոբյանն էլ հայտարարեց, որ «Ազատամարտիկների դաշինքում» ընդգրկվածները համոզված են՝ մեր երկրում սահմանադրական փոփոխությունների անհրաժեշտություն չկա:

«Մենք համագործակցելու ենք բոլոր ուժերի հետ, ովքեր իրենց նպատակը իշխանափոխությունն են համարում ՝ժամ առաջ հանցավոր ռեժիմից ազատվելը»,-ասաց ազատամարտիկը: Հակոբյանը կոչ արեց, որպեսզի կայանալիք հանրաքվեին ընդառաջ բոլորը միասնական «ոչ»-ով հանդես գան: ՀԺԿ նախագահ Ստեփան Դեմիրճյանի խոսքով՝ անընդունելի է բոլոր բացասական երևույթները սահմանադրության վրա բարդելը:

«Հայաստանին պետք են իրական փոփոխություներ , ոչ թե մի խումբ մարդկանց շահերից բխող և հապճեպ իրականացնվող սահմանադրական փոփոխություներ, բայց այդ փոփոխությունը չի կարող իրականցնել այն իշխանությունը,որի գործունեության հետևանքով երկիրը հայտվել է համակողմանի ճգնաժամի մեջ:

«Ոչ»ասելով՝ մենք «ոչ» ենք ասում կեղծիքներին, մենք «ոչ» ենք ասում իշխանության յուրացմանը: Հայաստանին անհրաժեշտ է ժողովրդի կողմից ընտրված, ազնիվ, անկաշկանդ իշխանություն»,-ասաց Դեմիրճյանը: Երևանի նախկին քաղաքապետ, ՀԱԿ անդամ Վահագն Խաչատրյանի կարծիքով՝ գալիք տարվա բյուջեով հպարտանալ չի կարելի, այն ոչ մի հարց չի լուծում, բյուջեով շատ քիչ գումար է նախատեսված ներդրումների համար:

Ըստ նրա՝ դա նշանակում է, որ հաջորդ տարիներին զարգացման մասին չենք կարող խոսել: «Դեկտեմբերի 6-ին ասել «ոչ», որը «ոչ» է ոչ միայն Սահմանադրությանը, այլ իշխանությանը: Ամսի 6-ին կազմակերպենք «ոչ», տեր կանգնենք մեր «ոչ»-ին և դրանից հետո ավելի հեշտ կլինի փոխել»,- շեշտեց Խաչատրյանը:

Լևոն Զուրաբյանն էլ նշեց, որ այսօր կա իրական ընդդիմադիր ուժերի աննախադեպ կոնսոլիդացիա, համախմբում, ընդդիմության մեջ որևէ բաժանարար գիծ չկա:

«Ակնհայտ է, որ ժողովրդի մեծամասնությունը մերժում է սահմանադրական փոփոխությունների պլանը: Կարճ ասած՝ ժողովուրդը կողմնորոշվել է և ոչ է ասում այս իշխանություններին»,- ավելացրեց ՀԱԿ խմբակցության ղեկավարը:

Վերջինիս պնդմամբ՝ ընդամենը պետք է մի կողն դնել հիասթափվածությունը, հուսահատությունը, «ոչ» քվեարկել տեղամասերում: Զուրաբյանը տեղեկացրեց, որ հաջորդ հանրահավաքը տեղի կունենա դեկտեմբերի 3-ին: Լևոն Զուրաբյանը նաև վստահություն հայտնեց, որ իրենց և «Նոր Հայաստան»-ի հանրահավաքային պայքարը միմյանց ոչ թե խանգարում, այլ փոխլրացնում են: Հանրահավաքն ավարտվեց երթով:

Լևոն Փանոսյան