Կարո՞ղ է արդյոք օտարերկրյա քաղաքացին ՀՀ-ում ստեղծել հասարակական կազմակերպություն

ОБЩЕСТВО 2 Июль, 2019 15:34

«Փաստ» օրաթերթը շարունակում է ներկայացնել «Ճանաչեք և պաշտպանեք ձեր իրավունքները» խորագիրը: Շատ են դեպքերը, երբ քաղաքացիները չեն կարողանում պաշտպանել իրենց իրավունքները, քանի որ իրազեկված չեն, իսկ երբեմն էլ որոշ պետական հիմնարկներ էլ ավելի են շփոթեցնում նրանց:

Օրաթերթը, համագործակցելով ՀՀ փաստաբանների պալատի հետ, այսուհետ հանրային իրազեկման արշավ է կազմակերպում, որը կօգնի մեր քաղաքացիներին իմանալ և պաշտպանել իրենց իրավունքները: Նշենք նաև, որ յուրաքանչյուր հինգշաբթի՝ ժամը 10:00-ից մինչև 17:00-ն փաստաբանների պալատի հանրային պաշտպանի գրասենյակն անվճար խորհրդատվություն է տրամադրում ՀՀ բոլոր քաղաքացիներին:

Հարց- Կարո՞ղ է արդյոք ՌԴ քաղաքացին ՀՀ-ում ստեղծել հասարակական կազմակերպություն կամ անդամակցել դրան:

Պատասխանում է փաստաբան Էդգար Գրիգորյանը:

«Հասարակական կազմակերպությունների մասին» ՀՀ օրենքով կարգավորված են օտարերկրյա քաղաքացիների կողմից Հայաստանի Հանրապետությունում հասարակական կազմակերպություններ ստեղծելու և դրանց անդամագրվելու հարցը: Մասնավորապես՝ նշված օրենքի 2-րդ հոդվածի համաձայն՝ հասարակական կազմակերպությունը Հայաստանի Հանրապետության քաղաքացիների, օտարերկրյա պետությունների քաղաքացիների, քաղաքացիություն չունեցող անձանց (այսուհետ` ֆիզիկական անձ) և (կամ) իրավաբանական անձանց հասարակական միավորում է, որն ունի ոչ առևտրային կազմակերպության կարգավիճակ:

Հասարակական կազմակերպության գույքը, այդ թվում՝ ձեռնարկատիրական գործունեությունից ստացված շահույթը նրա անդամների միջև չի բաշխվում, իսկ հասարակական կազմակերպության կողմից իրականացվող ձեռնարկատիրական գործունեության արդյունքում ստացված շահույթն օգտագործվում է միայն կազմակերպության կանոնադրական նպատակների ուղղությամբ:

Մարդու` միավորումներ կազմելու ազատությունն ամրագրված է ՀՀ Սահմանադրությունում, համաձայն որի՝ յուրաքանչյուր ոք ունի այլոց հետ ազատորեն միավորվելու, դրանց անդամագրվելու իրավունք: Ընդ որում՝ միավորումների ազատությունը կարող է սահմանափակվել միայն օրենքով` պետական անվտանգության, հասարակական կարգի, առողջության և բարոյականության կամ այլոց հիմնական իրավունքների և ազատությունների պաշտպանության նպատակով:

Վերոգրյալից պարզ է դառնում, որ օտարերկրյա քաղաքացին (տվյալ դեպքում՝ ՌԴ քաղաքացին) կարող է Հայաստանի Հանրապետությունում ստեղծել կամ անդամագրվել արդեն իսկ ստեղծված հասարակական կազմակերպությանը: