«Եթե հանկարծ Քոչարյանը փորձի քաղաքական հայտ ներկայացնել, ապա կհավաքի մինուս 120 % ձայն». «Փաստ»

«Փաստ» օրաթերթը գրում է.

ՀԱԿ փոխնախագահ Արամ Մանուկյանը համարում է, որ Երևանի ավագանու արտահերթ ընտրությունների ժամանակ «Իմ քայլը» դաշինքի մոտ 81 % ձայնը խոսում է այն մասին, որ ժողովուրդը պատրաստ է պայքարել հեղափոխության շարունակության և այն իր տրամաբանական ավարտին հասցնելու համար: «Այդ ընտրության ժամանակ որոշվելու էր, թե ժողովրդական այս շարժումը շարունակություն ունենալո՞ւ է, թե՞ ոչ: Եվ փողոցային պայքարի ու մարդկանց տրամադրությունները վերածվեցին քվեաթերթիկի: Կարևորը դա էր: Այսինքն, խնդիր էր դրված պարզել, թե ժողովրդական շարժումը միայն փողոցո՞ւմ է, թե՞ այն կարող է նաև իրավական լուծում ստանալ: Խնդիրը լուծվեց և ստացավ նաև իրավական լուծում: Այսինքն, այսօր կարող ենք ասել, որ դե ֆակտո ժողովրդի աջակցությունը դե յուրե ամրագրվեց»,– ասաց Ա. Մանուկյանը:

ՀԱԿ փոխնախագահի կարծիքով, չի կարելի, սակայն, համարել, որ դրա հետևանքով քաղաքական դաշտն ամայացել է: Երևանի ավագանու ընտրությունների ժամանակ ընդամենը «այո»–ի և «ոչ»–ի խնդիր է դրված եղել և այն լուծվել է, ու եթե դրան գումարում ենք մի քանի այլ գործոններ, ապա պատկերն ավելի տեսանելի է դառնում: 

«81 %-ըը ոչ միայն քաղաքապետի թեկնածուի, այդ շարժման, քաղաքական ուժի օգտին, այլև նախկին քաղաքական ուժին և նախկին իշխանությանը տրված «դեմ» ձայների հանրագումարն է: Այդ պատճառով է տոկոսն այդքան բարձր, որն իրականում շարժման փաստաթղթային ձևակերպումն էր: Հաջորդ ընտրություններն ավելի քաղաքական կլինեն, քանի որ այդ ժամանակ արդեն կմրցակցեն կուսակցությունների քաղաքական ծրագրերը: Այսինքն, այդ «այո»–ի և «ոչ»–ի տարբերակը, որը գերակշռում էր այս ընտրությունների ժամանակ, ավելի քիչ կլինի: Ի դեպ, ինչքան ուշ լինեն խորհրդարանական ընտրություններն, այնքան ավելի քաղաքական կլինեն, բայց այսօրվա խնդիրն ավելի շատ հեղափոխական ցիկլն ավարտելու մեջ է: Եվ ընտրությունները շուտ կամ ուշ անցկացնելու հարցի մասին ես ասել եմ և հիմա էլ պնդում եմ, որ ինչքան շուտ այն անցկացվի, այնքան լավ: Հարկավոր է այս ցիկլը փակել և ժողովրդին մի քիչ հանգիստ թողնել, ոչ թե անընդհատ սպասել, որ ժողովուրդն իշխանություններին աջակցի»,– ասաց Ա. Մանուկյանը:

Խոսելով առաջիկայում ՀՀԿ–ի քայլերի մասին՝ ՀԱԿ փոխնախագահի կարծիքով, ժամանակն է, որ մի քիչ էլ հանրապետականները հանգստանան, այս պահին որոշ ժամանակով «թայմ աութ» հայտարարեն, ինչը, ըստ նրա, կլինի ամենախոհեմ ու ամենաբարենպաստ որոշումը նրանց համար: Մանուկյանը զուգահեռներ անցկացրեց իրենց կուսակցության ներկայացուցիչների իշխանության և ներկայի միջև և հիշեցրեց, որ իրենք էլ իշխանությունից հեռանալուց հետո այդ իրավիճակում են եղել: Նույնիսկ երկու անգամ երկար ժամանակով են ընդմիջում ունեցել, բայց միևնույն ժամանակ դիմացել են այդ փորձությանը: 

«Սա էլ թող իրենց համար փորձություն լինի: Թող դիմանան այդ փորձությանը, ի՞նչ է եղել, որ: Քաղաքական ուժը պարտություններին ու փորձություններին դիմանալու համար է նաև: Այդ որոշումը նրանց համար կլիներ ամենանպաստավորն ու ամենախոհեմը: Վստահ եմ, որ նրանց մեջ կան նաև մարդիկ, որոնք այդպես են մտածում: Վերջապես մեղք են այն մարդիկ, ովքեր անընդհատ երազել են իշխանությունը պահելու մասին: Մի քիչ էլ ռեալությունից կտրված լինելով՝ չեն ուզում հավատալ, որ իրենց գնացքը գնացել է: Դեռ թպրտում են և փորձում են պահել այն, ինչը պահել հնարավոր չի: Այդ մարդկանց էլ է պետք վերջնականապես հիմնավորապես ցույց տալ, որ հին իշխանությունները, հին քաղաքական ռեժիմը, իշխանությունը գողացողները այլևս առաջիկա քաղաքական պայքարում չկան ու չեն կարող լինել, քանի որ այլևս գոյություն չունեն: Եվ այդ պատճառով էլ, ես կարծում եմ, որ ինչքան շուտ անցկացվեն պառլամենտական ընտրությունները, այնքան լավ»,– ասաց Ա. Մանուկյանը:

Խորհրդարանական ընտրությունները շուտ անցկացնելու դեպքում արդյոք չի՞ կրկնվի նույն պատկերը և մենք այս անգամ արդեն խորհրդարանում էլ չե՞նք ունենա նույն՝ 81%–անոց արդյունք հարցին նախկին պատգամավորը պատասխանեց, որ ի տարբերություն Երևանի ավագանու, ընտրական օրենսդրությունը պառլամենտական ընտրությունների մասով սահմանափակում է, ինչը թույլ չի տալիս, որ որևէ քաղաքական ուժ 65 %–ից ավելի քվեներով ներկայացված լինի խորհրդարանում:

«Դա նշանակում է, որ ուժը որքան էլ շատ ձայներ հավաքի, միևնույն է, ձայների 35 %–ը պետք է բաժանվեն այլ քաղաքական ուժերի միջև: Եվ այդ մասով կարելի է մտահոգությունը փարատված համարել: Եվ ես համոզված եմ, որ այդ 35%–ի մեջ միանշանակ մեծ մասը կլինեն ընդդիմության ներկայացուցիչներ: Ի դեպ, քաղաքականության մեջ կա նաև մի այսպիսի կանոն՝ քաղաքականությունը միատարրություն չի սիրում: Եվ եթե անգամ նման բան տեղի ունենա, չի բացառվի, որ հենց ներսից ծնվեն ընդդիմադիրներ: Մենք այդ փորձն ունենք, և ես դրանից էլ չեմ վախենում: Այսինքն, եթե անգամ իշխանությունը մեծամասնություն լինի խորհրդարանում և ունենալով ժողովրդի աջակցությունը՝ կարողանա ռեֆորմների ճանապարհով գնալ՝ իր թիկունքին զգալով ժողովրդի հևքը, ապա թող լավ աշխատի և թող ընդդիմության գործն էլ քիչ լինի»,– ասաց Ա. Մանուկյանը: 

Խոսելով Քոչարյանի քաղաքականություն վերադառնալու և դրանով պայմանավորված քաղաքական նոր իրողություն ձևավորվելու մասին, ՀԱԿ փոխնախագահը նշեց, որ այն չի կարող քաղաքական գործոն լինել, քանի որ այդ պարագայում գործ ունենք ընդամենը փողի և այդ փողին ծախվողների և բանակի հետ, ինչն արդեն խոսում է բարոյականության մասին: 

«Անգամ այդ ամենով հանդերձ Քոչարյանը երբեք չի կարողանա մտնել իրավական և քաղաքական դաշտ: Ատելությունը ձեր ասած մարդու նկատմամբ այնքան շատ է ու խիտ, որ նրա վերադարձը պարզապես բացառվում է: Եվ եթե հանկարծ նա փորձի նման հայտ ներկայացնել, ապա կհավաքի մինուս 120 % ձայն: Պետք է հասկանալ, որ այդպիսի քաղաքական գործիչ գոյություն չունի,և եթե նա մի քանի միլիարդ ունի, ապա դա դեռ չի նշանակում, որ կարող է ժողովրդի կամքը, զայրույթը, ատելությունը այդ փողով գնել: Ես այդ հարցում էլ եմ հանգիստ և վերջին քվեարկությունը ցույց տվեց, որ նա քաղաքական դաշտում ընդհանրապես գոյություն չունի: Եթե, այնուամենայնիվ, ուզում է երևալ, ապա դա նշանակում է, որ դեռ չի զգում, թե ինչ է տեղի ունենում մեր երկրում», – ասաց Ա. Մանուկյանը: