«Ցանկացած դիմադրություն ավելի վատ հետևանքների է բերելու». «Փաստ»

«Փաստ» օրաթերթը գրում է.

Սեպտեմբերի 23–ին տեղի ունեցածը ոչ թե Երևանի ավագանու ընտրություն էր, այլ հեղափոխության արժեքներին հավատարիմ լինելու հանրաքվե: «Փաստ»–ի հետ զրույցում նման տեսակետ հայտնեց «Նախաձեռնությունների ազգային կենտրոն» հասարակական միավորման ղեկավար Վարդան Թունյանը՝ ընդգծելով, որ «Իմ քայլը» դաշինքի ստացած 81 տոկոսը սպասելի էր:

«Սպասելի էր, որ որովհետև հարցադրումն այնպես էր դրված, որ մարդիկ պետք է ընտրություն կատարեին հնի և նորի մեջ: «Քաղաքացիական պայմանագիրն» իր քարոզարշավը հենց այդպես էլ տարավ: Իրենք չտարան այն ուղղությամբ, թե, օրինակ, ո՞ր քաղաքապետն ավելի լավ կկառավարի, կամ իրենց թեկնածուն արդյո՞ք կոմպետենտ է, կամ էլ՝ ո՞վ ավելի լավ գիտի Երևանի խնդիրների մասին: Ժողովուրդը ոչ թե այդպիսի, այլ մեկ ընտրության առաջ էր կանգնած. տա՞լ վստահություն վարչապետ Նիկոլ Փաշինյանին և իր թիմին, թե՞ ոչ»,–ասաց նա՝ հավելելով, որ հների ու նորերի, սևերի ու սպիտակների բաժանումն այնպես սրեցին, որ մարդիկ միահամուռ պաշտպանեցին հեղափոխության արժեքները: Նրա խոսքով՝ բոլոր կուսակցությունները պետք է շատ լուրջ հետևություններ անեն, դասեր քաղեն: 

Վարդան Թունյանն այդքան էլ չի կիսում խորհրդարանական ընտրություններին ընդառաջ նոր ուժերի անհրաժեշտության գաղափարը: «Նոր ուժերը միանգամից վստահության չեն կարող արժանանալ, որովհետև, ամեն դեպքում, անցած ճանապարհ է պետք: Այս ընտրություններին մենք համոզվեցինք, որ նոր ծնված ուժերը շանս չունեն հաջողության հասնելու: Խնդիրը քաղաքական դաշտի վերախմբավորման մեջ է՝ կուսակցությունների ներսում էլ պետք է հեղափոխություններ լինեն, և առաջինը՝ մտածելակերպի հեղափոխություն: Մարդիկ չպետք է կաղապարված մտածեն, պետք է ձերբազատվեն ընտրողներին ստանդարտ առաջարկներ ներկայացնելուց: Պետք է նորովի մտածեն, նոր խնդիրներ առաջարկեն, ասելիքի բովանդակությունը նորը պետք է լինի»,–նշեց մեր զրուցակիցը: 

Ինչ վերաբերում է քաղաքական օրակարգի թիվ մեկ՝ ԱԺ–ն ցրելու, արտահերթ խորհրդարանական ընտրություններ անցկացնելու խնդրին, Վ. Թունյանը նշեց. «Ճիշտ կլիներ, որ խորհրդարանը ցրվեր հեղափոխության հաղթանակից հետո՝ միանգամից և առանց որևէ ձևականությունների: Պետք է ցրվեր այդ հեղափոխության ուժով: Մինչև անգամ ավագանու ընտրություններից առաջ կարելի էր ԱԺ ընտրություններ անցկացնել: Ն. Փաշինյանը նախընտրեց մի քիչ ավելի խուճուճ ճանապարհ, որը, փաստորեն, արդյունք չտվեց: Հիմա ԱԺ ընտրություններն օր առաջ պետք է անցկացվեն, որ ամեն ինչ իր տեղն ընկնի: Որ մարդիկ հասկանան՝ ով ով է քաղաքական դաշտում, ով ինչ ուժ է ներկայացնում: Երկիրը պետք է վերադառնա իր բնականոն ընթացքին, որը նաև կնպաստի տնտեսության զարգացմանը, և մարդիկ վստահություն կունենան իշխանությունների նկատմամբ: Իսկ այս պարագայում գործադիրը հեղափոխական, օրենսդիրը՝ էլի իշխանության կրողն է: Սա վստահություն չի ներշնչում թե՛ ներքին, թե՛ արտաքին գործարար աշխարհին: Որևիցե մեկը վստահ չէ և երաշխիք չունի, որ ՀՀԿ–ն միշտ այդպես փափուկ կկատարի Նիկոլ Փաշինյանի կամքը: Կարող է լինել իրավիճակի փոփոխություն, և  նրանք արագ կանցնեն այլ գործողությունների»:

Նրա խոսքով՝ Նիկոլ Փաշինյանը զգում է այդ վտանգը և կարևորում հեղափոխության հաղթանակը կապիտալիզացնելու անհրաժեշտությունը. «Այդ իմաստով ողջունելի է ընտրությունները հնարավորինս շուտ անցկացնելու հայտարարությունը: Շատ սպասելու կարիք էլ չկա: Իսկ ՀՀԿ–ն որևէ լուրջ հակափաստարկ չի կարող ներկայացնել: Որևէ լուրջ դիմադրություն չեն կարող առաջացնել, որովհետև վերոնշյալ ընտրություններից հետո ավելի համոզվեցին, որ իրենք շատ թույլ են, և հասարակությունն առավել քան երբևէ կոնսոլիդացված է հեղափոխության լիդերի շուրջ: Ցանկացած դիմադրություն ավելի վատ հետևանքների է բերելու»:

Վարդան Թունյանի դիտարկմամբ՝ ԱԺ–ն ցրելու և ընտրությունների շուրջ սպասվելիք առաջիկա քննարկումներն ուժային բանակցություններ են լինելու:

«Այդ ուժային բանակցությունների միջոցով ՀՀԿ–ին համոզելու են, որ արագ պետք է կապիտուլացվեն: Ի դեպ՝ կարծում եմ, որ ՀՀԿ–ն ընդհանրապես դեմ էլ չէ այդ ամենին: Ըստ իս՝ իրենց ընդամենը փոքրիկ, գուցեև անհատական մակարդակով երաշխիքներ են պետք: Խոսքն այնպիսի երաշխիքների մասին է, համաձայն որոնց՝ պաշտոններից ազատվելուց հետո շատ արագ չեն ձերբակալվելու և յուրաքանչյուրի դեմ տասնյակներով քրեական գործեր չեն բացվելու: Կփորձեն ձգձգել, մզմզալ, որ որոշակի անձնական երաշխիքներ ստանան և շատ արագ գնան ու իրենց բիզնեսները ղեկավարեն: Դա իրենց համար հարմար կլինի»,–ասաց նա:

Մեր զրուցակիցը շեշտեց, որ իր մտավախությունն այլ է. «Այդ ընտրությունների ժամանակ քաղաքական դաշտն արդյո՞ք պատրաստ կլինի որևիցե այլընտրանքային ուժ ներկայացնել, որ խորհրդարանում ևս չլինի այն պատկերը, որը կա ավագանիում: Ինչքան էլ հավատանք, սիրենք մեր վարչապետին, ամեն դեպքում հեղափոխական արժեքներ կրող մարդկանցից պետք է ստեղծվի ընդդիմություն: Հիմա այդ գաղափարը չի ընկալվում: Մարդիկ Ն. Փաշինյանին հակակշռող ուժ ասելով՝ հասկանում են Սերժ Սարգսյան, ՀՀԿ, Ռոբերտ Քոչարյան: Բայց պետք է հասունանանք ու հասկանանք, որ հեղափոխությունը հաղթել է ու ամենևին կարիք չկա վախենալ Սերժ Սարգսյանից կամ չար ուժերից: Կարիք կա ստեղծել ճիշտ և ուժեղ ընդդիմություն: Այնպիսի ուժեղ բևեռ, որը կհավասարակշռի»: