Նոր բողոք «Չումբո»–ի դեմ. նախարարության հետ չեն համագործակցում, այլ ՏԻՄ–երի. «Փաստ»

«Փաստ» օրաթերթը գրում է.

«Չումբո» նախաձեռնող խմբի շուրջ նորից կրքեր են թեժանում. Կրթական քաղաքացիական նախաձեռնությունն իր Fecebook–ի էջում տեղեկություն էր տարածել, որ «Չումբո»–ն «կրկին կասկածելի միջոցառման տոմսեր է բաժանում հանրակրթական ուսումնական հաստատություններում և դպրոցներում»: 

«Չումբո» նախաձեռնող խմբի ղեկավար Սմբատ Հակոբյանի խոսքով` դպրոցներում տոմսեր չեն բաժանվել:

«Կասկածելի միջոցառում չի կազմակերպվում, այլ շուրջ տասը հազար երեխաների համար «Ջրաշխարհ» համալիրում կազմակերպվում է բարեգործական ծրագիր, որի շրջանակներում համալիրի մուտքն ու խաղերն անվճար են»,–«Փաստ»–ի հետ զրույցում ասաց նա` նշելով, որ դպրոց չեն մտել, դպրոցների հետ չեն համագործակցում:

Հարցին, թե ԿԳ նախարարության հետ համաձայնեցվա՞ծ է ծրագիրը,պատասխանեց. «Ոչ, քանի որ նախարարության հետ ընդհանրապես ինչ–որ ծրագրերի շրջանակներում չենք համագործակցում: Մենք պետական դպրոցների հետ չենք աշխատում, որ նախարարությունից էլ թույլտվություն ստանայինք, իսկ եթե ԿԳՆ–ի համար կա որևէ հարց, մենք բոլորի համար բաց ենք: Մենք բաց ենք` մութ գործեր չենք անում, լավ միջոցառումներ ենք իրականացնում»:

Եթե չեն բաժանվել տոմսերը, ինչպե՞ս են աշակերտները տեղեկացել: Ի պատասխան` Սմբատ Հակոբյանը նշեց. «Գովազդով և պետական կառույցների միջոցներով է իրազեկում եղել: Քաղաքապետարաններին և մարզպետարաններին ուղղված հատուկ հրավեր ենք տվել, որ անապահով երեխաների այցը կազմակերպեն»:

Նշենք, որ ամիսներ առաջ ԿԳՆ–ն շրջաբերականով դիմել էր ՀՀ մարզպետարաններին ու դպրոցներին, որ հ/կ–ների հետ համագործակցության դեպքում տեղեկացնեն նախարարությանը:

Մեր զրուցակցի համոզմամբ` վերոնշյալ միջոցառումը մանկապատանեկան ծրագիր է, իսկ դպրոցից դուրս երեխան քաղաքացի է: Հաշվի առնելով, որ միջոցառումը սեպտեմբերի 1–ին ժամը 12:00–ից մինչև 16:00–ն է նախատեսված, հարցրեցինք` երեխաները դասը պետք է թողնեն, գա՞ն «Ջրաշխարհ»:

«Ոչ: Դասերը չպետք է թողնեն, դասերին չի խանգարում: Այդ օրը ամբողջական դաս չեն անում: Երկու ժամ են դպրոց գնալու: Բացի այդ` այստեղ որևէ պարտադրանք չկա, կա ինֆորմացիա` ցանկացողները դիմում են և հրավեր են ստանում: Եթե ծնողն իր երեխային ցանկանում է տանել «Ջրաշխարհ», ո՞վ կարող է այդտեղ ինչ–որ բան ասել»,–պատասխանեց Ս. Հակոբյանը:

Իսկ դիտարկմանը, թե Կրթական քաղաքացիական նախաձեռնությունը պնդում է, որ ժամանցի կազմակերպման ձեր նախաձեռնումը հակասում է ՀՀ–ում կրթության քաղաքականության սահմանված նորմերին և սկզբունքներին, նա արձագանքեց.

«Մանկական կարաոկե ակումբներ կան, երեխաները գումարներով գնում են այդ կարաոկե ակումբներ, դրանք չե՞ն հակասում: Դպրոցներից 7000–8000 դրամ փող են հավաքում, գնում են այդ կարաոկե ակումբները: Դա չի հակասում, բարեգործական նախաձեռնություններն են հակասո՞ւմ»:

Հետաքրքրվեցինք` բացի ժամանցային միջոցառումներից, դպրոցականների գիտելիքներն ավելացնելուն ուղղված միջոցառումներ եղե՞լ են:

«Եղել են: Բացի այդ` 2019–ին ՀՀ–ում մեծ գործունեություն ենք պատրաստվում ծավալել: Կստեղծվի Հայաստան–Արցախ–Սփյուռք համահայկական մշակութային հիմնադրամ, որը զբաղվելու է մշակութային խոշոր գործունեությամբ»,–ասաց նա:

Իսկ թե որն է խմբի ֆինանսական աղբյուրը, Սմբատ Հակոբյանը նշեց, որ գումարները գոյանում են իրենց ընկերների և գործընկերների միջոցով:

Հաշվի առնելով, որ հարցի շուրջ ԿԳՆ–ում հավել յալ ուսումնասիրության կարիք կա, ԿԳ մեկնաբանությունն ավելի ուշ կներկայացնենք: