Թվային հեռարձակման կցուրդ սարքերը շուտով կմատակարարվեն Հայաստան

ОБЩЕСТВО 6 Ноябрь, 2015 10:15

Հայաստանը դեռևս հունիսին ավարտել է երկրի ողջ տարածքը թվային ծածկույթով ապահովելու գործընթացը: Հանրապետության բոլոր բնակավայրերում արդեն հասանելի է թվային հեռարձակումը:

«Արմենպրես»-ի հետ զրույցում ՀՀ տրանսպորտի նախարարությանն առընթեր «Հայաստանի հեռուստատեսային և ռադիոընդունիչ ցանց» ՓԲԸ-ի ղեկավար Գրիգոր Ամալյանն ասաց, որ ստեղծվել է թվայնացման ամբողջ տեխնիկական ենթակառուցվածքը և կատարվել են համակցումները բոլոր հեռուստաընկերությունների հետ: Հայաստանում հունիսից լիարժեք մատակարարվում է թվային ազդանշան:

«Թվային լիարժեք հեռարձակման անցնելու համար աշխատանքներ են ընթանում ևս 2 ուղղությամբ: Առաջին ուղղությունը օրենսդրական բարեփոխումների և կարգավորումների մշակումն ու իրականացնում է, որը իրականացնում է օրենսդիր մարմինը, մյուսը սոցիալապես անապահով մարդկանց թվային ազդանշան ստանալու համար կցուրդ սարքերի տրամադրումն է, որը ՀՀ կառավարության իրավասությունների շրջանակում է»,- նշեց Ամալյանը:

Այս ուղղությամբ, ՀՀՌՑ ղեկավարի տեղեկացմամբ, աշխատանքներ արդեն տարվում են: Հայտարարվել է մրցույթ կցուրդ սարքերի ձեռք բերման համար, կա հաղթող կազմակերպություն, որը ձեռնամուխ է եղել Հայաստանի Հանրապետություն կցուրդ սարքերի մատակարարմանը:

«Կառավարությունն իր քայլերն արել է, շուտով մենք կունենանք այդ սարքերի մատակարարումը: Մշակված է օրենսդրական կարգավորումների համակարգ, իսկ տեխնիկական համակարգը գործում է դեռևս ամռան ամիսներից»,- հավելեց նա:

Նախատեսված է, որ թվային հեռարձակման անցնելուց հետո, ամբողջովին պետք է դադարեցվի անալոգային հեռարձակումը 2016-ի հունվարի 1-ին: Սակայն եթե առաջանա այնպիսի իրավիճակ, որ սոցիալապես անապահով ընտանիքներն ամբողջությամբ ապահոված չլինեն սարքերով, գուցե օրեսդիր մարմինն ու երկրի ղեկավարությունը որոշում կայացնեն անալոգային հեռարձակումից թվայինի անցման ժամկետների երկարացման:

Դա, ըստ Ամալյանի, ցանկալի սցենար չէ, քանի որ անալոգային հեռարձակման անջատումը ոչ թե ներքին ցանկություն կամ անհրաժեշտություն է պետության համար, այլ միջազգային պայմանավորվածությունների շրջանակներում է: Կա միջազգային կարգավորում, որը տարածվում է նաև Հայաստանի Հանրապետության վրա, բոլոր պետությունները կոորդինացնում են թե ընդհանուր հաճախություններն ինչպես օգտագործել:

Անդրադանալով նաև թվային հեռարձակման առավելություններին անալոգայինի նկատմամբ, ՀՀՌՑ ղեկավարը նշեց, որ թվային հեռարձակումն ունի 3 գլոբալ առավելություն՝ հեռարձակման բարձր որակ, ինտերակտիվություն, որը հնարավորություն է տալիս հեռուստադիտողին իր նախընտրությամբ օգտվել հեռուստաալիքներից և հեռահաղորդակցական էկոնոմիկայի առավելություններ:

Հայաստանում անալոգայինից թվային հեռարձակմանն անցման ծրագրի համար նախատեսվող ծախսը կազմում է 16.9 մլն դոլար, որից 2.5 մլն նախատեսված է բացառապես կցուրդ սարքերը ձեռք բերելու համար :