Խրախճանքը կա` հացի մասը կաղում է. «Փաստ»

«Փաստ» օրաթերթը գրում է.

Քաղաքագետ Գագիկ Համբարյանը կիսում է այն կարծիքները, որ նոր կառավարության համար 100 օրն այդքան էլ մեծ ժամանակահատված չէ, քանի որ նախկին իշխանությունից ուղղակի ավգյան ախոռներ է ժառանգել: «Իսկ այդ ավգյան ախոռները մաքրելը շատ դժվար է հատկապես այն դեպքում, երբ նոր կառավարության անդամների մեծ մասն ուղղակիորեն գործին ծանոթ չէ: Դրսից բերեցին ու նախարարներ դրեցին, և հիմա նրանք սեփական սխալների, սեփական սայթաքումների և բազմաթիվ սկանդաների մեջ ընկնելով` փորձում են ինչ–որ քայլեր ձեռնարկել: Բացի կոռուպցիայի, մենաշնորհների դեմ պայքարից` այլ ձեռքբերում չեմ տեսնում: Առավել ևս` երբ սոցիալ–տնտեսական իրավիճակը շարունակում է էլ ավելի վատթարանալ»,–«Փաստ»–ի հետ զրույցում ասաց քաղաքագետը` մեջբերելով հին հռոմեական մի ասույթ. «Հաց և խրախճանք: Խրախճանքը կա` ԱԱԾ–ի կողմից բացահայտվող դեպքերն են, ոստիկանության ձերբակալությունները, ՊԵԿ–ի բացահայտումները: Դրանք թատերական մասն են, բայց հացի մասը կաղում է, որովհետև կառավարությունը դեռ որևիցե կոնկրետ և շոշափելի քայլեր չի ձեռնարկել այդ ուղղությամբ»,– ասաց նա: 

Քաղաքագետի համար տարօրինակ չէ այն, որ ՀՀԿ–ի ներկայացուցիչները վերջին մի քանի օրերի ընթացքում աչքի են ընկնում նոր կառավարության անդամներին ուղղված քննադատական հայտարարություններով:

«ՀՀԿ–ն հիմա ուշիուշով հետևում է կառավարության անդամների` հատկապես  վարչապետի և նախարարների գործողություններին: Ես սա չէի որակի որպես հակահեղափոխություն: Տեղի է ունեցել իշխանափոխություն, նախկին ընդդիմությունը հիմա իշխանության է եկել և հակադրվելուն պետք է ավելի նորմալ վերաբերվել: Բացի դրանից, Նիկոլ Փաշինյանն էլ պետք է հասկանա, որ քննադատությունը օգուտ է իր կառավարությանը, որ իր կառավարությունը չլճանա, քիչ սխալներ անի: Եթե նախկին իշխանավորների հայտարարությունների մեջ կան կեղծ տեղեկություններ, զրպարտություններ, դրանք շատ հեշտ կարելի է պարզաբանել: Իսկ այն, ինչ տեղի է ունենում հիմա, չեմ ընդունում: Քննադատողներին ամենավերջին վիրավորանքներն են տալիս, մյուս կողմն էլ իր հերթին է վիրավորում և խիստ քննադատության ենթարկում: Սա նորմալ չէ: Ե՛վ իշխանությունը, և՛ ընդդիմությունը պետք է հասկանան, որ գործ ունենք հասարակության հետ. եթե չափն անցնում են, իրավիճակը սրվում է նաև հասարակության տարբեր խմբերի միջև գոյություն ունեցող հարաբերություններում: Այդ առումով երկու կողմերին էլ կոչ կանեմ ավելի զգույշ լինել և ավելի զուսպ պահել իրենց: Առողջ քննադատությունը կարևոր է բոլոր ժողովրդավարական երկրներում»,–ասաց մեր զրուցակիցը: 

Գագիկ Համբարյանի խոսքով` այն, ինչ հիմա կա Հայաստանում, քաղաքական ճգնաժամ է: «Այն, որ Ազգային ժողովի մեծամասնությունը հասարակության ճնշման ներքո ձևավորեց կառավարություն, մի փոքր կարգավորեց իրավիճակը: Հիմա խնդիրը հետևյալն է. այն, ինչ հիմա կա` ձեռնտու չէ Նիկոլ Փաշինյանին: Նա թե՛ քաղաքական, թե՛ տնտեսական ոլորտներում ավելին է ուզում ստանալ: Այո՛, հեղափոխություն եղել է, բայց երկրի համար կարևորագույն ռեսուրսները դեռ իր հակառակորդների ձեռքում են: Խոսքը թե՛ ինֆորմացիոն դաշտի, թե՛ տնտեսության և թե՛ օրենսդիր դաշտերի մասին է: Իսկ հակահեղափոխություն ասվածի դեմ այնպես պետք է պայքարել, որ պայքարը չանցնի օրենքների սահմաններից: Եթե հակահեղափոխության դեմ պայքարեն այն նույն մեթոդներով, որոնցով Սերժ Սարգսյանն իր թիմով երկիր էր ղեկավարում և ընդդիմության դեմ էր պայքարում, ապա ի՞նչ տարբերություն նախկին և ներկայիս իշխանությունների միջև: Բոլոր հարցերը պետք է լուծվեն օրինականության դաշտում և որքան հնարավոր է` շատ արագ: Սա զգոնության կոչ է, որովհետև չեմ ուզում, որ Նիկոլ Փաշինյանի իշխանությունն ապագայում նմանվի այն «բեսպրեդելին» ու անպատժելիությանը, որը կար Սերժ Սարգսյանի օրոք և որից օգտվում էին բազմաթիվ ՀՀԿ–ականներ»,–նշեց նա: 

Ինչ վերաբերում է ՀՀԿ–ին, քաղաքագետն ընդգծեց, որ այդ կուսակցությունն ինքնամաքրման փուլում է. «Կփորձեն ազատվել օդիոզ ֆիգուրներից և այլ կերպ ներկայանալ: Օրինակ` որպես ինտելեկտուալ ընդդիմություն, իսկ թե հասարակությունն ինչպես կընդունի` չեմ կարող ասել: Ավելի խելացի կլինեն, որ կուսակցությունը ռեբրենդինգի ենթարկեն»:

Իսկ քաղաքականություն վերադառնալու մասին երկրորդ նախագահ Ռոբերտ Քոչարյանի հայտարարությունը, ըստ քաղաքագետի, հատուկ նպատակ ունի:

«Ռոբերտ Քոչարյանը շատ լավ գիտի, որ հասարակության մոտ իր վարկանիշը շատ ցածր է: Որևիցե ակնկալիք չունի, որ կարող է շատ մեծ թիմ ձևավորել: Ռոբերտ Քոչարյանին ձեռնտու է քաղաքականություն վերադառնալու մասին հայտարարությունը: Այդ կերպ ապագայում իր հետ տեղի ունեցող բոլոր իրադարձությունները նա կդիտարկի քաղաքական պրիզմայի ներքո. եթե իրեն ձերբակալեն` դա արդեն քաղաքական հետապնդում է իր նկատմամբ: Իսկ թե հետագայում իրեն ինչ կհաջողվի` ժամանակը ցույց կտա: Պետք է հաշվի առնենք, որ նա բավականին մեծ ֆինանսական ռեսուրսների է տիրապետում, իսկ քաղաքականության մեջ ֆինանսները շատ մեծ դեր են կատարում: Եթե ԱԺ արտահերթ ընտրություններին անձամբ ինքը չմասնակցի, այդուհանդերձ, այնպես կանի, որ իր կողմից հովանավորվող որոշ ուժեր ներթափանցեն ԱԺ: Իսկ այդ ուժերն ապագայում անպայման կուղղորդվեն իր կողմից»,–ասաց նա` հավելելով, որ ընդհանուր առմամբ`15–20 օր հետո քաղաքական գործընթացներն ակտիվ փուլ կմտնեն: