ՀԱՕԿ–ից կոչ են անում՝ թարմացնել հիշողությունը. «Փաստ» օ

«Փաստ» օրաթերթը գրում է.

Հայաստանի բռնցքամարտի ֆեդերացիայի նախագահ Արթուր Գևորգյանը լրագրողների հետ հանդիպման ժամանակ անդրադառնալով «Հայաստանի բռնցքամարտի ֆեդերացիայի» նախագահի վերջին ընտրություններին, ՀԱՕԿ–ի և սպորտի նախարարության հնչեցրած մեղադրանքներին` նշել էր, որ ֆեդերացիայում առկա է շահերի ընդհանրություն և բոլորի կարծիքների հետ հաշվի են նստում: Սակայն, կա մի բայց, համաձայն որի ինքը արտաքին լուրջ միջամտություն է տեսնում, որն, ըստ Գևորգյանի, ինքնակառավարման սկզբունքի խախտում է: 

Հիշեցնենք, որ ՀԱՕԿ–ը և սպորտի նախարարությունն անօրինական են համարում օգոստոսի 2–ին ՀԲՖ անցկացված ընտրությունները` համարելով, որ դրանք անցել են մի շարք խախտումներով: «Այս ընտրությունների թե՛ ընթացակարգը, թե՛ արդյունքները ճանաչվել և հաստատվել են ԱԻԲԱ–ի կողմից և ստացել եմ շնորհավորանքներ: Այսինքն՝ այստեղ որևէ խնդիր որևէ խախտում չի եղել»,– իր խոսքում մասնավորապես նշել էր Արթուր Գևորգյանը:

Նման հայտարարությունն ինքնին տարօրինակ է, քանզի ՀԱՕԿ գլխավոր քարտուղար Հրաչյա Ռոստոմյանը նշել էր, որ ՄՕԿ–ի խարտիայի համապատասխան կետերի համաձայն` յուրաքանչյուր մարզաձևի ազգային ֆեդերացիա առաջին հերթին պետք է ճանաչի տվյալ երկրի ազգային օլիմպիական կոմիտեն: Միևնույն ժամանակ ազգային օլիմպիական կոմիտեն իրավունք ունի իր կողմից չճանաչված ազգային ֆեդերացիան հետ կանչելու միջազգային ֆեդերացիայի կազմից:

Ռոստոմյանը Ա. Գևորգյանի հնչեցրած գնահատականների վերաբերյալ հանդես էր եկել հայտարարությամբ, որում մասնավորապես կոչ էր արել ՀԲՖ նախագահին թարմացնել հիշողությունը:

«Ինչ վերաբերում է օլիմպիական խաղերին մեր մարզիկների մասնակցությանը: Ինչպես գիտեք, բռնցքամարտի աշխարհի 2015 թվականի առաջնությունից մեր մարզիկները որևէ օլիմպիական վարկանիշ չկարողացան ձեռք բերել: Մինչ օլիմպիական խաղերը մնացել էր ընդամենը մեկ վարկանիշային մրցաշար, որն անցկացվում էր Թուրքիայում: Դա մեր մարզիկների վարկանիշ նվաճելու վերջին շանսն էր: Սակայն, ի զարմանս մեզ, Արթուր Գևորգյանն արգելել էր, որ մեր թիմը մասնակցի վարկանիշային այդ մրցաշարին: Այսօր ես պաշտոնապես հայտարարում եմ, որ Թուրքիայում ի վերջո ձեռքբերված 5 վարկանիշների հետ բռնցքամարտի ֆեդերացիան և Արթուր Գևորգյանը բացարձակապես որևէ առնչություն չունեն: Դա միմիայն ՀԱՕԿ–ի նախագահ Գագիկ Ծառուկյանի և մեր հավաքականի մարզիկների ու մարզիչների նվաճումն է: Ես չեմ ուզում իջնել անձնական երկխոսությունները հրապարակելու մակարդակի վրա, պարզապես Արթուր Գևորգյանին կոչ եմ անում փոքր-ինչ թարմացնել սեփական հիշողությունը և վերհիշել, թե ՀԱՕԿ–ը ինչպիսի տիտանական ջանքեր էր գործադրում այդ օրերին, որպեսզի բռնցքամարտը փրկվի օլիմպիական խաղերին չմասնակցելու խայտառակությունից»,– մասնավորաբար հայտարարել է Հ. Ռոստոմյանը:

Անդրադառնալով հայ մարզիկների մարզահագուստի վերաբերյալ հարցին՝ ՀԱՕԿ գլխավոր քարտուղարը նշել է, որ Ռիոյի օլիմպիական խաղերից առաջ ՀԱՕԿ–ը մեր մարզիկներին 28–ից ավելի մարզահագուստ և համապատասխան մասնագիտական գույք էր տրամադրել: 

«Այս ամենն ընտրել էին հենց մարզիկները, իսկ ՀԱՕԿ–ը հոգացել էր դրանց ձեռքբերման համար անհրաժեշտ ծախսերը: Սակայն օլիմպիական խաղերի ժամանակ ֆեդերացիայի նախագահ Արթուր Գևորգյանն ինձ խնդրել էր, որպեսզի իր անձնական պայմանավորվածության համաձայն մեր մարզիկները իր նախատեսած մարզական մասնագիտական գույքով մասնակցեն խաղերին, քանի որ դա բխում է հավաքականի ու ֆեդերացիայի կոմերցիոն շահերից: Ես ընդառաջել եմ՝ հաշվի առնելով նրա անձնական խնդրանքը և այսօր առնվազն անպարկեշտություն է ասել, թե ՀԱՕԿ–ը մարզագույք չի տրամադրել մեր բռնցքամարտիկներին»,– ասել է Հ. Ռոստոմյանը:

Խոսելով այն մասին, որ ՀԱՕԿ–ն էլ բռնցքամարտի ֆեդերացիային չի օգնում, Հ. Ռոստոմյանը նշել էր, որ միայն նախաօլիմպիական տարում 2 անգամ 6–ական միլիոն դրամ ինքն անձամբ է փոխանցել Արթուր Գևորգյանի օգնականին՝ ֆեդերացիայի մարզիկների ու մարզիչների աշխատավարձերը վճարելու նպատակով:

ՀԱՕԿ գլխավոր քարտուղարը հայտարարել է նաև, որ, անկախ ստեղծված իրավիճակից, բռնցքամարտի աշխարհում ի հայտ եկած տարաձայնություններից ու խժդժություններից, ՀԱՕԿ–ը մշտապես եղել և մնում է մարզաշխարհի կողքին, քանի որ սա մի մեծ ընտանիք է, որտեղ տեղ չունեն սուտն ու սեփական ամբիցիաները առաջ տանելու գործելաոճը և հույս հայտնել, որ կարճ ժամանակում առկա խնդիրները կհարթվեն և բռնցքամարտի ֆեդերացիայում կգտնեն այնպիսի լուծումներ, որոնք լինելու են ի նպաստ հայրենի սպորտի զարգացման և առաջխաղացման: