Արգամիչը բոլորին խանգարում է

 

ԶԼՄ-ներում այսօր տեղեկություն է հրապարակվել, որ ԱԱԾ-ն խուզարկություն է կատարել Մխչյան գյուղում Հովիկ Աբրահամյանի տանը: Ըստ տեղեկությունների՝ ձերբակալվել է Հովիկ Աբրահամյանի եղբայրը՝ Ջոնիկ Աբրահամյանը՝ ապօրինի զենք-զինամթերք պահելու համար: Ըստ նախնական վարկածի՝ հայտնաբերված զենքն օգտագործվել է Մարտի 1-ի իրադարձությունների ժամանակ: Ավելի ուշ ԱԱԾ-ն տարածեց հաղորդագրություն, որտեղ նշվում էր

ՀՀ հատուկ քննչական ծառայության վարույթում գտնվող, 2008 թվականի մարտի 1-ից 2-ն ընկած ժամանակահատվածում Երևան քաղաքում տեղի ունեցած դեպքերի վերաբերյալ քրեական գործի շրջանակներում ՀՀ ազգային անվտանգության ծառայության աշխատակիցների կողմից իրականացված օպերատիվ-հետախուզական միջոցառումների արդյունքում տվյալներ են ստացվել, որ ՀՀ նախկին վարչապետ Հովիկ Աբրահամյանին փաստացի պատկանող, Ամբիկ Գևորգյանի անվամբ ձևակերպված` ՀՀ Արարատի մարզի Մխչյանի նախկին մեխանիկա-վերանորոգման գործարանում ապօրինի պահվում է մեծ քանակությամբ զենք և ռազմամթերք:
Ինչպես տեղեկացնում է ԱԱԾ-ի մամուլի կենտրոնը, ստացված տվյալների հիման վրա 2018թ. օգոստոսի 6-ին և 7-ին ՀՀ ԱԱԾ աշխատակիցների և ՀՔԾ քննիչների կողմից նշված վայրում իրականացված խուզարկության արդյունքում հայտնաբերվել է ապօրինի պահվող զենք և ռազմամթերք, այդ թվում` 3 հատ ձեռքի գնդացիր, 7 հատ «ԱԿ-74» տեսակի ինքնաձիգ, 2 հատ «ՍՎԴ» տեսակի դիպուկահար հրացան, 3 հատ տարբեր տեսակի հրացաններ, 2 հատ ատրճանակ և ռազմամթերք հանդիսացող տարբեր տրամաչափի մեծ քանակությամբ փամփուշտներ:
«Ապօրինի կերպով հրազեն և ռազմամթերք ձեռք բերելու և պահելու կասկածանքով ձերբակալվել են Ամբիկ Գևորգյանն ու Հովիկ Աբրահամյանի եղբայրը` Հենրիկ Աբրահամյանը:
ՀՀ ազգային անվտանգության ծառայությունը և ՀՀ հատուկ քննչական ծառայությունը համատեղ իրականացնում են անհետաձգելի օպերատիվ-հետախուզական միջոցառումներ և քննչական գործողություններ` ստուգելու համար խուզարկությամբ հայտնաբերված զենքերի ձեռքբերման աղբյուրները և դրանց` 2008 թվականի մարտի 1-ին և 2-ին գործադրված լինելու հանգամանքը»,- նշվում է հաղորդագրության մեջ:

Զենքի հարցով, իհարկե, պետք է զբաղվեն իրավապահները, բայց առաջին հայացքից անհավատալի է, որ անգամ վերջին իրադարձություններից հետո Արգամիչը իր տարածքում ապօրինի զենք է պահել և քայլեր չի ձեռնարկել դրանք հանձնելու կամ էլ գոնե թաքցնելու, գոնե այլ տարածք տեղափոխպելու ուղղությամբ: Ինչևէ, սա խոսակցության առանձին թեմա է: Բայց զուտ հետհեղափոխական գործընթացների տեսանկյունից կատարվածն, իհարկե, այսպես կոչված հակահեղափոխության գործուն կենտրոնների թիրախավորված ոչնչացումն է: Առաջիկա արտահերթ խորհրդարանական ընտրություններից առաջ հնարավոր հզոր մրցակիցներին թուլացնելն ու չեզոքացնելը մաթեմատիկական հաշվարկով է իրականացվում:

Գաղտնիք չէ, որ Հովիկ Աբրահամյանը ազդեցիկ կերպար է Արարատում և ունի բավարար ազդեցություն ու խարիզմա ոչ միայն իր մարզում, այլ նաև դրա սահմաններից դուրս՝ իր շուրջը համախոհների բանակ համախբելու: Ի դեպ, դա նրան լավագույնս հաջողվել էր և՛ Ազգային ժողովում, և՛ կառավարությունում, որտեղ անգամ ամենաթունդ ընդդիմադիրների հետ Արգամիչը լավ հարաբերություններ ուներ: Եվ ընդհանրապես Հովիկ Աբրահամյանը համարվում է և՛ Ռոբերտ Քոչարյանի, և՛ հատկապես Սերժ Սարգսյանի իշխանական թիմի ընտրական գործընթացի լավագույն կազմակերպիչը: Չնայած այս հանգամանքին՝ վերջին շրջանում Սերժ Սարգսյանը Հովիկ Աբրահամյանին փաստացի մեկուսացրեց: Աբրահամյանը ստիպված եղավ հեռանալ ՀՀԿ-ից, որի առաջին փոխնախագահն էր երկար տարիներ: Նրա այդ քայլը Սերժ Սարգսյանը որակեց մայր գետից զատված առվակ, որը դատապարված է մարելու: Իրականում, սակայն, այդ քայլով Աբրահամյանը որոշակիորեն մաքրվեց ՀՀԿ-ի մեղքերից, հատկապես Սերժ Սարգսյանի երրորդ ժամկետի պաշտոնավարման խայտառակ որոշման պատասխանատվությունից: 

Բայց Նիկոլ Փաշինյանը մեկ քայլ առաջ է ընկել՝ նա արել է քայլ, որով փակում է Հովիկ Աբրահամյանի ճանապարհը, միաժամանակ ուսուցողական դաս տալիս մյուս նախկիններին, ովքեր մտովի կարող են տրվել վերադառնալու գայթակղությանը:

 

Հայկ Դավթյան

bsp;